Qulamhüseyn Əlibəyli: “Başa düşdü ki, Rusiyanın forpostu olmaq hələ Ermənistan üçün hər şey demək deyil”
Ermənistanın Baş naziri Nikol Paşinyan parlamentarilərə bildirib ki, 2022-ci ildə Azərbaycanın Dağlıq Qarabağa hüquqlarını tanımaqla ölkəni mühasirədə olan qaladan suveren dövlətə çevirib:
“Dağlıq Qarabağı itirdiyimiz barədə çox danışılır. Mən bu məsələ haqqında çox düşünmüşəm və gəldiyim qənaət budur: biz Dağlıq Qarabağı itirməmişik, Ermənistan Respublikasını qazanmışıq. Oktyabrın 6-da mən ölkəmizin ərazi bütövlüyünün qonşularımızın bütövlüyü ilə iç-içə olduğunu anlayaraq Ermənistanın ərazi bütövlüyünü tanıdım. Və mənim üçün bu, "forpost"un baş nazirinin Ermənistanın baş nazirinə çevrilməsinin başa çatdığı məqamdır. Qarabağ məsələsi Ermənistan müstəqil və suveren dövlətə çevrilməsin deyə ilgək kimi istifadə olunub. İndi isə Ermənistan Respublikası suveren dövlət olur”.
Paşinyanın çıxışında yeni bir şey olmasa da, əslində “forpost”un baş nazirinin Ermənistanın baş nazirinə çevrildiyini deməklə Rusiyaya eyham vurur. Çünki Ermənistan kimin forpostu idi?
Sözügedən məsələni “Bakı-Xəbər”ə şərh edən sabiq millət vəkili, hüquqşünas Qulamhüseyn Əlibəyli buna bir neçə prizmadan yanaşdı: “Vaxtilə Ermənistan rəsmiləri də, Rusiya rəsmiləri də Ermənistanı Rusiyanın forpostu hesab edirdilər və bununla fəxr edirdilər. Belə yanaşma Azərbaycan ərazilərinin işğal olunması və təxminən 30 il müddətində işğalda saxlanmasına səbəb olmuşdi. Yəni Azərbaycan ərazilərini təkcə “forpost” Ermənistan yox, həm də Rusiya işğal etmişdi. Paşinyan da ilk dövrlər Ermənistanı Rusiyanın forpostu hesab edirdi və buna görə də sərxoş vəziyyətdə Şuşada yallı gedir, “Qarabağ Ermənistandır, nöqtə” deyə hayqırırdı. 44 günlük Vətən müharibəsi dövründə başına dəmir yumruq dəydikdən sonra Paşinyan başa düşdü ki, Rusiyanın forpostu olmaq hələ Ermənistan üçün hər şey demək deyil. Həmçinin Ermənistan Rusiyaya arxayın olub təcavüzkar siyasətini davam etdirə bilməz. Ona görə də yeni hami axtarmalıdır. Belə bir hami isə ABŞ və Avropa dövlətləri ola bilər. Bu gün Paşinyan daha uzaqgedən məqsədləri üçün Azərbaycanın ərazi bütövlüyünü tanıdığını, Qarabağı Azərbaycan ərazisi hesab etdiyini, Türkiyə ilə münasibətlərin normallaşdırılmasına çalışdığını bəyan edir. Tez-tez dolaşıq, ziddiyyətli və bir-birini inkar edən fikirlər bildirsə də, yaxşı başa düşür ki, sözdə Azərbaycanın ərazi bütövlüyünü tanıdığını, tezliklə sülh sazişinin imzalanmasına təərəfdar olduğunu bildirməsə, revanşist əhval-ruhiyyəli çağırışlardan imtina etməsə Ermənistan dövlətçiliyi üçün daha təhlükəni ola bilər. Bütün bunlar isə Ermənistanı dövlətçilikdən məhrum edə bilər. Ona görə də Rusiyanın təsir məkanından çıxaraq ABŞ və Avropanın təsir məkanına daxil olmaq istəyini belə büruzə verir”.
Vidadi ORDAHALLI
