İstanbulda Rusiya ilə Ukrayna arasında aparılan son birbaşa danışıqlarda hər iki tərəf məhbus mübadiləsi ilə bağlı razılığa gəlmişdi. Lakin Rusiya nümayəndə heyətinə rəhbərlik edən Vladimir Medinski dünən açıqlama verərək Ukraynanın razılaşmanı təxirə saldığını bildirib.
Medinski, Kiyevin iyunun 6-da başlayan daha əvvəl razılaşdırılmış məhbus mübadiləsi prosesini və meyitlərin qaytarılmasını qeyri-müəyyən müddətə təxirə saldığını açıqlayıb. Əsir mübadiləsinin humanitar məsələ olduğunu və onun təxirə salınmasının qəbuledilməz olduğunu bildirən Medinski, Ukraynanı İstanbul danışıqlarında əldə olunan razılaşmaya tam əməl etməyə çağırıb.
Rusiya tərəfinin 6 mindən çox ukraynalı əsgərin qalıqlarını təhvil verməyə, yaralı və ağır xəstə olan 25 yaşından kiçik hərbi əsirləri dəyişdirməyə hazır olduğunu bildirən Medinski, soyuducu yük maşınları ilə yola düşən ilk partiyada 1212 cəsədin mübadilə bölgəsinə çatdığını bildirib. Bundan əlavə, 640 məhbusun siyahısı Ukrayna tərəfinə çatdırılıb. Bununla belə, Ukraynanın danışıqlarda iştirak edən nümayəndələrini mübadilə zonasına göndərmədiyi və müxtəlif səbəblərdən prosesi qeyri-müəyyən müddətə təxirə saldığı bildirilib.
Medinski beynəlxalq media qurumlarını da regiona dəvət edib və təklif edib ki, gəlib Rusiyanın razılaşmalara tam əməl etdiyini yerində görsünlər.
İstanbulda keçirilən danışıqların ikinci raundunda əldə olunan razılaşma çərçivəsində “hamı hamıya” prinsipi ilə həyata keçirilməsi planlaşdırılan bu mübadilənin ən azı min nəfəri əhatə edəcəyi gözlənilirdi. Danışıqlar zamanı əsir mübadiləsi və münaqişənin həlli ilə bağlı ilkin mətnlər üzrə razılıq əldə olunub.
Ukrayna tərəfi iddia edir ki, məhbus mübadiləsi və cəsədlərin çatdırılması ilə bağlı gözlənilən prosesin təxirə salınmasına görə onlar məsuliyyət daşımır. Ukrayna Məhbusların Koordinasiya Mərkəzindən verilən açıqlamada İstanbulda aparılan danışıqlarda razılaşdırılan kateqoriyalara uyğun olaraq məhbus siyahılarının Rusiya tərəfinə göndərildiyi, lakin Rusiyanın bu razılaşmaya uyğun gəlməyən fərqli siyahılar təqdim etdiyini bildirib. Ukraynanın lazımi açıqlamalarla cavab verdiyi və hazırda Rusiyadan növbəti addımın gözləndiyi bildirilib. Meyitlərin təhvil verilməsi ilə bağlı prinsipial razılığın əldə olunduğu, lakin tərəflər arasında tarixin müəyyən edilmədiyi vurğulanıb.
TAHİR
