Mübariz Göyüşlü: "Bu gün biz Donald Trampın Rusiya və Vladimir Putinə qarşı alman nazirin dediyi şəkildə mövqeyini görmürük"
ABŞ hakimiyyəti Rusiyaya qarşı yeni sanksiyalar hazırlayır və prezident Donald Trampın əksini bildirməsinə baxmayaraq, onları qəbul edə bilər. Bu barədə Almaniyanın xarici işlər naziri Yohan Vadeful mayın 20-də ZDF telekanalında çıxışı zamanı deyib.
ZDF jurnalisti Trampın mayın 20-də ABŞ-nin Rusiyaya qarşı yeni sanksiyalar tətbiq etməyəcəyi ilə bağlı açıqlamasına diqqət çəkib. "Bu yanlış təəssüratdır. ABŞ Senatında böyük sanksiyalar paketi var, bununla bağlı qanun layihəsi qəbul ediləcək. Onu artıq Senatdakı 80-ə yaxın deputat dəstəkləyib", - Vadeful cavab verib.
Onun sözlərinə görə, NATO xarici işlər nazirlərinin mayın 14-15-də Antalyada keçirilən iclasında yeni sanksiyalar layihəsinin həmmüəllifi respublikaçı senator Lindsi Qremlə danışıb.
"Aydın bir qərar var ki, indi bunun nəticələri olmalıdır. Biz bu barədə hazırda ABŞ-dan olan həmkarlarımızla - həm administrasiya, həm də konqresmenlərlə danışırıq", - Vadeful deyib.
O, sanksiyalarla bağlı danışıqlarda tərəfdaşları arasında ABŞ dövlət katibi Marko Rubionun da adını çəkib.
"Amerika da hərəkətə keçəcək. Bu açıq şəkildə ifadə olunub. İndi strateji səbr lazımdır. Biz bu məsələdə aydın olmalıyıq", - Almaniyanın xarici işlər naziri təkid edib.
"ABŞ hərtərəfli sanksiya paketi hazırlayır. O, indi Konqresə müzakirəyə təqdim olunacaq. Təbii ki, o, yalnız bu müzakirələrdən keçərsə qüvvəyə minə bilər. Amma eşitdiyimə görə, bu baş verəcək. Bu məsələ ilə bağlı həmkarlarımızla sıx təmasdayıq".
ZDF jurnalisti xatırladıb ki, mayın 19-da Vladimir Putinlə telefon danışığından sonra Tramp deyib ki, Rusiya müharibə başa çatdıqdan sonra ABŞ-la “hərtərəfli ticarəti” bərpa etməyə çalışır və o, belə planlarla “razılaşır”.
"Bu yolla Tramp Vladimir Putinə danışıqlar masasına yol açmaq istəyir. Lakin sanksiyalar hazırdır və artıq bununla bağlı növbəti danışıqlara hazırlaşacağımız barədə razılıq var", - Vadeful cavab verib.
"Putin təxəyyül edir və müharibəni davam etdirmək istəyir. Amma yavaş-yavaş hiss edir ki, onun siyasi, hərbi və iqtisadi imkanlarının sonu yaxınlaşır. Buna görə də Tramp, mənim başa düşdüyüm qədər, ona danışıqlar masası arxasına keçmək yolunu təklif edir", - Almaniyalı nazir öz nöqteyi-nəzərini bildirib.
Sizcə, Tramp Rusiya ilə işbirliyinə gedə bilərmi, yoxsa Yohan Vadeful haqlıdır?
Cross Media Təhlil Mərkəzinin analitiki, siyasi şərhçi Mübariz Göyüşlü baki-xeber.com-a məsələ barədə açıqlamasında deyib ki, Trampın adından bu qədər kəskin çıxış etmək bir qədər real görünmür: "Düzdur, Tramp zaman-zaman sərt və təzadli fikirlər söyləyib, Putini sərt sanksiyalarla hədələyib. Amma bu gün biz Donald Trampın Rusiya və Vladimir Putinə qarşı alman nazirin dediyi şəkildə mövqeyini görmürük. Bunu Trampın dolayı təzyiq vasitəsi kimi də qiymətləndirmək olar. Bu təzyiqlə o, Putini yola gətirmək məqsədi güdə bilər. Tramp istəyir ki, müharibə daha çox Ukraynanın güzəştləri ilə sonlansın, amma həm də ədalətli görünsün. Ancaq bu sonluğun ədalətli görünməsi ücün Putin kiçik də olsa güzəştə getməlidir. Lakin Kreml heç bir güzəşti qəbul etmir, yalnız öz şərtlərini diqtə etməkdə israrlıdır.
Bu müharibənin ən qısa müddətdə sonlandırılması Trampın seçicilərə verdiyi əsas vədlər sırasında idi. Hətta Tramp seçki təbliğatı dönəmində Rusiya-Ukrayna müharibəsini bir günə başa çatdıracağını bəyan edirdi. Yanvarın 20-də Tramp səlahiyyətlərini qəbul edəndən sonra jurnalustlər ondan bu barədə soruşmuşdu. O isə zarafatla demişdi ki, hələ qarşıda yarım gün var, hər şey ola bilər.
Trampin səlahiyyət müddətinin beşinci ayı başlayıb, hələ də Rusiya-Ukrayna müharibəsi can almaqda davam edir. Bu, Ağ Ev sahibinin imicinə ciddi zərbə vurur. Trampın səlahiyyətini icra etməsinə başlamasının 100-cü günündə reytinqinin 10% aşağı düsərək rekord qırmasında bu amilin də böyük təsiri var.
Bununla belə, Avropanın ağır və tələblərinə ciddi əməl olunan sanksiyalarla Rusiyanın çökdürülməsi çağırışlarına, hələ ki, Amerika səmimi yanaşmır, gözləmə mövqeyi tutur. Bu, ABŞ-nin imici də sayıla bilər. Amerika həmişə qərarı çətin qəbul edir, amma qəbul etdisə, o qərarın geri çevrilməsi mümkün deyil. Avropa indi arzulayır ki, ABŞ ilə əl-ələ verib, Rusiyaya ağır sanksiyalar qoymaqla və Ukraynaya ciddi yardımlar göstərməklə Moskvanı diz üstə çökdürsün".
Ekspert onu da əlavə etdi ki, Amerika elə bir dövlətdir, orada hər şey prezidentdən asılı deyil. Daha ciddi məsələləri parlament həll edir. O bildirdi ki, sabah Senat qərar qəbul etsə, Donald Tramp bu qərarı icra etmək məcburiyyətində qalacaq: "Almaniyalı nazir də bunu çox gözəl bilir və o, dilə gətirdiyi kimi parlamentin qərarına güvənir. Trampın ümidinə qalsa, bəlkə də Rusiyadan resurslar alıb, bütün Ukraynanı Putinin ixtiyarına verər...".
Dəniz NƏSİRLİ
