İran-Azərbaycan hərbi təlimlərinin əsas bir hədəfi var, o da alınsa...
Azər Həsrət: “Bu cür təlimlər keçirməklə İranın, SEPAH-ın ölkəmizə münasibətinin dəyişəcəyini deyə bilmərik”
İslam İnqilabı Keşikçiləri Korpusu (SEPAH) və Azərbaycan ordusu Qarabağda birgə hərbi təlimlər keçirir. Bu barədə İranın “Tasnim” agentliyi məlumat yayıb.
Bildirilir ki, bazar günü Azərbaycan Respublikasının işğaldan azad etdiyi Qarabağ bölgələrində "Aras 2025" kod adlı birgə təlimlər başlayıb: “İran İslam İnqilabı Keşikçiləri Korpusu quru qoşunlarının və Azərbaycan Respublikası Ordusunun xüsusi təyinatlı birləşmələrinin iştirak edəcəyi hərbi təlimlər mayın 21-dək davam edəcək".
Onu da qeyd edək ki, bu gün Azərbaycan-İran sərhədində ən böyük problem narkotik trafikidir. Hətta dron vasitəsilə də İrandan narkotik keçirirlər. Keçirilən təlimlər bu kimi problemlərin qarşısını alacaqmı? Sərhədlərdən narkotik keçirilməsinin qarşısının alınmasında SEPAH, İran məlum təlimdən sonra ölkəmizə dəstək verəcəkmi?
“İran dünyada narkotiklərin tranziti, istehsalı, satışı, dünyaya yayılması baxımından öndə gedən ölkələrdən biridir”
Siyasi şərhçi Azər Həsrət “Bakı-Xəbər”ə şərhində bunları bildirdi: “Bu cür təlimlər keçirməklə İranın, SEPAH-ın ölkəmizə qarşı münasibətinin dəyişəcəyini deyə bilmərik. Azərbaycan belə təşəbbüslərə getməklə özünün xoşməramlı olduğunu göstərmiş olur. Bu münasibəti dəyərləndirmək isə İran və SEPAH-ın işidir. Keçirilən təlimlərdən sonra sərhədlərdən narkotik daşınmasının qarşını alınacaqmı, bunu zaman göstərəcək. Nəzərə almaq lazımdır ki, İran dünyada narkotiklərin tranziti, istehsalı, satışı, dünyaya yayılması baxımından öndə gedən ölkələrdən biridir. Belə bir ölkədən bir anda narkotik daşınmasını dayandırmaq asan məsələ deyil. Hətta İran tərəfi dövlət olaraq bunun qarşısını almaq istəsə belə, bacara bilməyəcək. Nəzərə almaq lazımdır ki, İranda fars-molla rejiminin mövcudluğu məhz narkotik satışına borcludur. Onlar ayaqda durmaq üçün narkotik satışından istifadə edirlər. Belə bir şəraitdə narkotiklərin Azərbaycana daşınmasının dayandırılacağı şübhəlidir. Onu da qeyd edim ki, məlum təlimi keçən SEPAH-ın özü də bu işlərin arxasındadır. Indi onlar bu əməllərindən imtina edəcəklərmi? Şəxsən mən əmin deyiləm”.
Günel CƏLİLOVA
