Elşad Həsənov: “Yüksək rütbəli zabitinin faşizmi tərənnüm etməsi ermənilərin əsl simasını ortaya qoyur”
Ermənistan Müdafiə Nazirliyinin keçmiş mətbuat katibi, polkovnik-leytenant Artsrun Ovannisyanın mayın 9-da ölkənin İctimai televiziyasında səsləndirdiyi fikirlər Rusiyada böyük narazılıq doğurub. Ovannisyan deyib ki, Almaniyanın İkinci Dünya müharibəsində qələbə qazanması Ermənistan üçün daha faydalı olardı.
Rusiyanın Ermənistandakı səfiri Sergey Kopırkin polkovnikin çıxışını sərt şəkildə tənqid edib. Səfir Ermənistanın müdafiə naziri Suren Papikyana məktub ünvanlayıb. Məktubda Ovannisyanın çıxışının SSRİ-nin tərkibində Hitlerin ordusuna qarşı savaşan ermənilərin fəaliyyətinə kölgə saldığı bildirilir: “Müdafiə Nazirliyinin keçmiş rəsmi nümayəndəsi Artsrun Ovannisyanın bu müqəddəs gündə ölkənin əsas televiziya kanalında səsləndirdiyi faşist Almaniyasının təcavüzünə faktiki haqq qazandıran tarixi yalan və küfrləri geniş vüsət alıb. Böyük Vətən müharibəsinin məşhur komandiri, iki dəfə Sovet İttifaqı Qəhrəmanı adını almış marşal Baqramyanın adını daşıyan Ermənistan Respublikası Müdafiə Nazirliyinin Hərbi Akademiyasının Komandir-qərargah İnstitutuna hazırda rəhbərlik edən şəxsin ağzından belə ifadələri eşitmək xüsusilə ağrılı idi. Belə bir əməli Hitlerin SSRİ xalqlarını əsarət altına almaq və məhv etmək planlarına mane olan, eləcə də bəşəriyyəti “qəhvəyi vəba”dan xilas edən qəhrəman əcdadlarımızın xatirəsini ləkələmək cəhdindən başqa bir şey kimi qiymətləndirmək çətindir”.
Madam Rusiya səfiri sözügedən məsələyə belə etiraz edir, o zaman Koprkin 9 ildir İrəvanda heykəli ucaldılan faşist Qaregin Njdeni bəs niyə görməzdən gəlir? Niyə həmin heykəlin ləğvi ilə bağlı tələblərlə çıxış etmir?
“Rusiya ziddiyyətli davranır, Ovannisyanın fikirlərinə etiraz edir, faşist Njdenin heykəlini görməzdən gəlir”
Sözügedən məsələni “Bakı-Xəbər”ə şərh edən siyasi ekspert Elşad Həsənovun fikrincə, bütün bunlar erməni məkrinin, bicliyinin ifadəsidir: “Böyük Vətən müharibəsində ermənilərin bir çoxu cəbhədə faşistlərə qarşı vuruşduğu halda, başda Njde olmaqla digərləri Hitler Almaniyasına xidmət edirdi və SSRİ-yə qarşı döyüşürdülər. Bütün bunlar erməni millətinin məkrli siyasətidir. Bunlar hər zaman belə olublar. Bunlar həmin ermənilərdir ki, Abxaziyada separatizm fəaliyyəti başlayanda “Baqramyan” batalyonunda birləşərək gürcülərə qarşı vuruşurdular. Ermənistanın yüksək rütbəli zabitinin açıq şəkildə faşizmi tərənnüm etməsi bunların əsl simasını ortaya qoyur. Çünki bunların özləri də faşistsayağı dövlət qurublar. Məsələ ondadır ki, Ermənistan monoetnik dövlətdir. Orada olan bütün etnikləri demək olar deportasiya ediblər. Əvvəl Ermənistanda ermənilərdən sonra ikinci xalq azərbaycanlılar idi. Mərhələli şəkildə soydaşlarımızı deportasiya etdilər. Daha sonra kürdlər və digər xalqlar Ermənistandan didərgin salındı. Çünki ermənilər də faşist xislətinə sahibdilər. Bu baxımdan polkovnik-leytenant Artsrun Ovannisyanın səsləndirdiyi fikirlər təəccüblü görünməməlidir. Ermənilərin siyasəti faşizm elementləri üzərində qurulub. Məsələnin təəccüblü tərəfi həm də odur ki, Rusiyapərəst Serj Sarkisyanın prezidentliyi dövründə faşist Njdeyə İrəvanın mərkəzində heykəl ucaldıldı. Ancaq nə o zaman, nə də ondan sonra Moskvadan buna kəskin etiraz edilmədi. O cümlədən, həmin heykəlin sökülməsi ilə bağlı tələb səslənmədi. Düzdür, Rusiya mətbuatı o zaman bunu tənqid etdi, amma rəsmi səviyyədə Rusiya hakimiyyəti bunun üstünə düşmədi. Halbuki, Njde faşistlərə xidmət etdiyi üçün müharibədən sonra həbs edilib və SSRİ həbsxanasında ölüb. Səfir Kopırkinin Njdenin heykəlini görməzdən gəlib Ovannisyanı hədəf alması Moskvadan Paşinyan hakimiyyətinə qarşı verilən komanda ilə bağlıdır. Məqsəd odur ki, növbəti seçkidə Paşinyanı devirsinlər. Bu səbəbdən faşizmin tərənnümü məsələsində Rusiya ziddiyyətli davranır. Ovannisyanın fikirlərinə etiraz edir, faşist Njdenin heykəlini görməzdən gəlir”.
Vidadi ORDAHALLI
