Rusiya prezidenti Vladimir Putin bir neçə gün əvvəl İstanbula gəlmək istəyib. Lakin Kremlin irəli sürdüyü şərtlər qəbul edilmədiyindən Putin də Türkiyəyə gəlməkdən imtina edib.
“Türkiye” qəzeti diplomatik mənbələrə istinadən yazır ki, Putin mümkün təxribatlara qarşı İstanbula Rusiya hərbi təyyarələrinin müşayiəti ilə gəlmək istəyib. Ankara isə bütün təhlükəsizlik tədbirlərinin görüldüyünü Rusiya tərəfinə çatdıraraq, beynəlxalq təcrübəyə uyğun olaraq lazımi həssaslığın göstərilməsini istəyib.
Putinin görüşə qatılmamasının bir digər səbəbi isə Krımla bağlı olub. Belə ki, Rusiya Krım məsələsinin heç bir şəkildə masaya gətirilməməsi şərtini irəli sürüb. Ancaq Ukrayna rusların şərtinə qarşı nümayəndə heyətinin rəhərliyinə Krım türkü Rüstəm Umarovu gətirib və bütün bunlardan sonra Putin İstanbula gəlməkdən imtina edib.
Qeyd edək ki, mayın 16-da İstanbulda Türkiyənin də iştirakı ilə Rusiya və Ukrayna nümayəndələri arasında görüş keçirilib. Danışıqlarda gözlənilən atəşkəslə bağlı nəticə əldə edilməyib, sədəcə iki ölkə arasında təmasların davam etdirilməsi və əsirlərin dəyişdirilməsi ilə bağlı razılıq əldə olunub.
Adının çəkilməsini istəməyən ukraynalı bir mənbə iddia edib ki, Rusiya nümayəndə heyəti danışıqlarda atəşkəsin əldə olunması üçün Ukrayna ordusunun Donetsk, Zaporojye, Xerson və Luqansk vilayətlərindən geri çəkilməsi şərtini irəli sürüb. Rusiya nümayəndə heyətinin atəşkəsin yalnız bundan sonra baş tutacağını bildirdiyini deyən mənbə, tələblərin ABŞ-ın ötən ay Moskva ilə məsləhətləşmələrdən sonra təklif etdiyi sülh sazişi layihəsindən də kənara çıxdığını bildirib.
Bildirilir ki, məhz bundan sonra danışıqlar dalana dirənib və hətta Ukrayna tərəfi masadan qalxmaq istəyib. Lakin Türkiyənin müdaxiləsi ilə danışıqlar davam etdirilib.
TAHİR
