Ceyhun Məmmədov: “Bu, bir daha Ermənistanın kapitulyasiyaya məcbur olduğunu açıq-aydın göstərir”
Mayın 15-də “Hərbi-sənaye kompleksi haqqında” qanuna dəyişikliklərin müzakirə edildiyi Ermənistan parlamentində vəziyyət yenidən kəskin şəkildə pisləşib.
Bu dəfə gərginliyə səbəb parlamentin müxalif “Şərəfim var” fraksiyasının deputatı Anna Mkrtçyanın çıxışı olub. Deputat xüsusilə qeyd edib ki, ölkənin hərbi-sənaye kompleksinin inkişafı ilə bağlı tədbirlərlə bağlı müzakirə olunan məsələ fonunda “2018-ci ildə Ermənistanda hakimiyyəti ələ keçirən şəxs Azərbaycana 6 milyard dollar dəyərində silah verib. Etiraf etməliyik ki, həmin şəxs Azərbaycandan Ermənistanın zəbt etdiyi ərazilərin qaytarılmasını tələb etmək iqtidarında deyil. Sonda nə təqdim olunan qanun layihəsi, nə də başqa bir layihə Ermənistan Respublikasının əsgərinə atəş açmamaq əmri verməsini dəyişdirməyəcək”.
Bütün bunlardan sonra parlamentin iclası qapalı elan edilib.
Ümumilikdə, bütün bunlar Ermənistanda iqtidar-müxalifət qarşıdurmasından doğan məsələlər olsa da, digər məqamlar da var. Yəni bütün bunlar bir daha təsdiq edir ki, həqiqətən Azərbaycan 44 günlük müharibədə Ermənistandan çox böyük məbləğdə hərbi qənimət əldə edib. Bu, həm də onun təsdiqi deyilmi ki, doğrudan da müharibə Ermənistanın kapitulyasiyası ilə yanaşı, onların əlində olan hərbi gücünün tam şəkildə Azərbaycan tərəfindən ələ keçirilməsi ilə nəticələndi? Bu rəqəm həqiqətən də Ermənistanın kapitulyasiya olunduğunu təsdiq edən növbəti fakt sayıla bilərmi?
“Bu qədər silahın qənimət olaraq ələ keçməsində ordumuzun sürətli hücumu da önəmli rol oynayıb”
Sözügedən məsələni “Bakı-Xəbər”ə şərh edən millət vəkili Ceyhun Məmmədovun fikrincə, Ermənistan uzun illər milyardlarla dəyəri olan silah və texnika alaraq Qarabağda möhkəmlənməyə çalışdı: “Həmin silahların bir hissəsi Ermənistana hədiyyə edilmişdi. Digər hissəsi isə kredit formasında Ermənistana verilmişdi. Söhbət dəyəri milyardlarla ölçülən hərbi texnika və silahdan gedir. Əslində bu, bir daha onu göstərir ki, Azərbaycan cənab Prezidentin rəhbərliyi ilə necə bir qələbəyə imza atıb. Eyni zamanda Ermənistanı necə kapitulyasiyaya məcbur edib. Bu bir daha, Ermənistan nə qədər etiraf etməsə də, qəbul etməsə də kapitulyasiyaya məcbur olduğunu açıq-aydın göstərir. Yəni söhbət dəyəri 6 milyard dollara qədər olan silahın ordumuz tərəfindən qənimət olaraq ələ keçirilməsindən gedir. Çünki Azərbaycan hücum etdikdən sonra Ermənistan ordusu çoxsaylı silah və texnikanı ataraq qaçdı. Silah-sursatı ataraq döyüş mövqelərini tərk edirdilər. Bu qədər silahın qənimət olaraq ələ keçməsində ordumuzun sürətli hücumu da önəmli rol oynayıb. Yəni sürətli hücum düşmənə imkan vermədi ki, həmin silahları özləri ilə aparsınlar. Hərbi texnikanın digər hissəsini isə hərbi hava qüvvələrimizin, artilleriyanın dəqiq zərbələri hesabına sıradan çıxarılıb. Həm 44 günlük Vətən müharibəsi, həm 2023-cü ilin sentyabrında keçirilən antiterror əməliyyatları zamanı çoxsaylı hərbi texnika qənimət olaraq ordumuzun əlinə keçib. Ermənistan parlamentində bununla bağlı keçirilən müzakirələr bütün bunları qarşı tərəfin etiraf etməsi anlamına gəlir. Söhbət kifayət qədər böyük həcmdə silah və sursatdan gedir”.
Vidadi ORDAHALLI
