Bəhruz Quliyev: “Belə dinləmələr, ABŞ-ın neytrallıq və obyektivlik prinsiplərinə ziddir”
Aprelin 29-da ABŞ Konqresinin Tom Lantos İnsan Haqları Komissiyasında “COP29 BMT-nin İqlim Dəyişikliyi Konfransından sonra Azərbaycanda insan haqları” adlı xüsusi dinləmələr keçirilib. Dinləmələr zamanı komissiyanın sədri senator Kris Smit bildirib ki, “Azərbaycanda Demokratiya Aktı” adlı qanun layihəsi hazırlanır.
Məsələnin təəssüf doğuran məqamı odur ki, Konqresdə keçirilən erməni separatçılarına geniş meydan verilib. Dinləmələrdə həmçinin Qarabağdakı keçmiş separatçı rejimin “dövlət naziri” və “ombudsman”ı olmuş Artak Beqlaryan, keçmiş separatçı rejimin “dövlət naziri” olmuş, hazırda Bakıda mühakimə olunan Ruben Vardanyanın vəkili Cared Qenser çıxış edib. Beqlaryan 2023-cü ilin sentyabrında özü və ailəsi daxil olmaqla 150 mindən çox erməninin “zorla” məcburi köçkünə çevrildiyini bildirib. O, Azərbaycanda azı 23 erməni əsirin həbsdə olduğunu, işgəncəyə məruz qaldığını deyib. Beqlaryan həmçinin Azərbaycanı 2020-2023-cü illərdən bəri itkin düşən azı 200 nəfərin, yoxa çıxan 80 nəfərin taleyi barəsində məlumat verməməkdə ittiham edib. Özü də Azərbaycana qarşı dinləmələr məhz ermənipərəst Demokratlar Partiyasının təşəbbüs və dəstəyi ilə keçirilib.
“Azərbaycan insan hüquqları və hüquqi dövlət prinsiplərinə sadiq qalaraq...”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, ABŞ Konqresində dinləmələrdə birtərəfli, qərəzli və əsassız ittihamların səsləndirilməsi dərin təəssüf hissi doğurur: “Dinləmələrdə Azərbaycanın suverenliyinə və ərazi bütövlüyünə qarşı yönəlmiş separatçı fəaliyyətlərdə iştirak etmiş şəxslərə - keçmiş qondarma rejimin nümayəndələrinə, o cümlədən Artak Beqlaryana və Ruben Vardanyanın vəkilinə söz verilməsi, bu tədbirin insan haqlarından çox siyasi təzyiq aləti kimi təşkil olunduğunu göstərir. Beqlaryanın guya 150 min erməninin "zorla" köçürülməsi, 23 nəfərin "əsir götürülməsi" və "işgəncələrə məruz qalması" ilə bağlı iddiaları heç bir beynəlxalq hüquqi əsasla və sübutla dəstəklənmir. Qeyd edilməlidir ki, 2023-cü ilin sentyabrında Azərbaycan öz suveren ərazilərində konstitusiya quruluşunu bərpa edib. Əhalinin könüllü şəkildə Ermənistan ərazisinə keçidinə şərait yaradıb. Bu, beynəlxalq müşahidəçilərin və aidiyyəti qurumların hesabatlarında da öz əksini tapıb. Azərbaycan insan hüquqları və hüquqi dövlət prinsiplərinə sadiq qalaraq, qanun qarşısında hamının bərabərliyini təmin edir. Hazırda istintaqda olan şəxslər barəsində aparılan proseslər beynəlxalq hüquq normalarına uyğun şəkildə həyata keçirilir. Təəssüf doğuran məqamlardan biri də odur ki, belə birtərəfli dinləmələr ABŞ Konqresində bəzi ermənipərəst dairələrin və xüsusilə Demokratlar Partiyasına mənsub üzvlərin təşəbbüsü ilə təşkil olunub. Belə dinləmələr, ABŞ-ın neytrallıq və obyektivlik prinsiplərinə ziddir. O cümlədən, regionda sülh və əməkdaşlıq üçün təhlükə yaradır. Azərbaycan tərəfi beynəlxalq ictimaiyyəti və ABŞ Konqresini bölgədəki reallıqları obyektiv qiymətləndirməyə, birtərəfli siyasi təzyiqlərdən uzaq dayanmağa və konstruktiv dialoqa dəvət edir. Azərbaycanın dövlət qurumları və vətəndaş cəmiyyəti belə qərəzli yanaşmaları qətiyyətlə pisləyir və ölkəmizin milli maraqlarının beynəlxalq platformalarda qorunması üçün bütün imkanlardan istifadə olunacaqdır”.
Vidadi ORDAHALLI
