Moskvadan İrəvana yeni təlimat gəlib - Köçəryanla Sarkisyanı heç cür barışdırmaq olmur...
Ermənistan müxalifətinin baş nazir Nikol Paşinyanı devirmək arzusu hələ də gözündə qalıb. Bunun əsas səbəblərindən biri də müxalifətin dağınıq vəziyyətdə olmasıdır. Bu durumda Ermənistanın ikinci prezidenti Robert Köçəryan müxalifətlə birləşməyə hazır olduğunu bildirib. Bura Ermənistanın keçmiş prezidenti Serj Sarkisyanın rəhbərlik etdiyi komanda da daxil edilir.
Robert Köçəryanın fikrincə, ölkədəki vəziyyəti dəyişmək üçün müxalifət qüvvələrinin əməkdaşlığı mümkündür, lakin o, bu qüvvələrin yanaşma və təsəvvürlərindəki fərqlilikləri, eləcə də şəxsi münasibətləri nəzərə alaraq seçkilərdə vahid alyansla iştirakını real hesab etmir. Bununla belə qeyd edir: “Konkret məqsəd ətrafında, bəli, görürəm ki, birləşmək olar”. Ermənistan Universitetinin tələbələri və müəllimləri ilə görüşdə Köçəryan təkcə baş nazir Nikol Paşinyanın 2020-ci il müharibəsini uduzmasından deyil, həm də müxalifət meydanını birləşdirib birgə mübarizə aparmaq imkanlarından danışıb: "Nə qədər müxalifətçi olduğunu başa düşsək, qrup toplayıb "hamımız bir yerdə olacağıq" deməklə özümüzü aldatmayaq. Taktika baxımından müəyyən razılaşmalar ola bilər. Mən bir məqsəd üçün getməyi, oyunun qaydalarını düzəltməyi, bir-birimizlə razılığa gəlməyi real hesab edirəm. Uğur qazananlar bir yerdə çalışacaqlarsa, o zaman birlikdə örnək olacaqsınız”. Maraqlıdır ki, bütün bunlar Serj Sarkisyanın Robert Kəçəryanı sərt ittiham etməsindən sonra səsləndrilir. Sarkisyan da ölkədə rejim dəyişikliyi uğrunda mübarizə aparacağını vəd edib. O, aprelin 14-də Ermənistan Respublika Partiyasının 35-ci ildönümü tədbirində Koçaryanın adını çəkməsə də bildirib ki, onun tərəfdarları küçə etirazlarına qatılaraq Sarkisyanın istefasına səbəb olublar. Bu səbəbdən də Paşinyanın sonrakı illərdə Ermənistana və Qarabağa yaşatdıqlarında onların da əli olduğunu deyib. Onun sözlərinə görə, həmin şəxslər indi də “çox uzaq olmayan keçmişlərini təmizləmək” məqsədilə onu 2018-ci ilin “məxməri inqilabı”nda günahlandırırlar. Sarkisyan həmin şəxsləri gələcək seçkilər ərəfəsində müxalifətin səslərini oğurlamağa cəhd etməkdə ittiham edib. İndi Sarkisyanın partiyasından olan deputat Anna Mkrtçyanın qeyd edir ki,Köçəryanla o vaxt əməkdaşlıq etmək olar ki, bu komanda Ermənistan Respublika Partiyasının şərtlərini qəbul etsin. O vurğulayır ki, müxaliflər seçki proseslərində ən praqmatik formatda iştirak etməlidir və bu, maksimum uğuru təmin edəcək: “Biz çox gözəl başa düşürük və keçən dövr də açıq şəkildə göstərdi ki, Nikol Paşinyanla hüquqi, konstitusiya və hüquqi vasitələrlə mübarizə aparmaq, onun oyun qaydalarına əməl edəcəyinə ümid etmək mümkün deyil. Biz hamımız gözümüzün önündə 2018-ci ilin nifrət nitqini, 2021-ci ilin seçki kampaniyasını, ya da hansısa qeyri-qanuni proses təşkil etməsi üçün dövlət resurslarından istifadəsi dövrünü gördük. Nikol Paşinyanın təşkil etdiyi hər hansı müntəzəm və ya fövqəladə proses onun hakimiyyətdən uzaqlaşdırılmasına səbəb ola bilməz”. “Robert Köçəryanla əməkdaşlıq imkanını görüb-görmədiyinə” dair sualına yanaşmalardakı fərqləri nəzərə alaraq, deputat belə cavab verib: “Mən düşünmürəm ki, real müxalifət qüvvələri, əməkdaşlqıdan qaçsınlar. Amma şərtlərimizə əməl edilməlidir”. İkinci prezidentin özü də Respublikaçılar Partiyası ilə Köçəryanın tərəfdarları arasında mövqe fərqlərinin olduğunu bildirir. O, Nikol Paşinyana seçkilərdə qalib gəlməsinin mümkünlüyündə israr etmişdi, bu mövqe, məsələn, Ermənistanın üçüncü prezidentinin yanaşması ilə üst-üstə düşmür. Köçəryan qeyd edir: “Respublikaçılar öz müsahibələrində bu tezisi deyirlər ki, seçki yolu ilə heç bir uğur əldə etmək mümkün deyil, elə deyilmi? Mən belə düşünmürəm. Bu, fikir ayrılığıdır? Bəli, fikir ayrılığıdır, amma bu, dialoqa, bəzi məsələlərin müzakirəsinə yol açırmı? Təbii ki, yox”.
Yeri gəlmişkən, Robert Köçəryan da etiraf edib ki, onun və Serj Sarkisyanın tərəfdarlarının suları eyni axardan axmır. Ona görə də onun fikrincə, özünə xidmət edən birliklər məyusluqlarla üzləşə bilər: “Açıq desək, birlikdə nəsə etməyə çalışsaq, üçüncü prezidenti qəbul etməyən tərəfdarlarımın bəziləri passivləşəcək, gedəcək, məyus olacaqlar. Bizim barəmizdə də üçüncü prezidentin komandasında oxşar imic yaranacaq”. “Qraparak” müxalifət qüvvələrinin fəallaşması fonunda yazıb ki, Kreml üçün az-çox məqbul sayılan şəxslərin hamısı bu yaxınlarda Moskvaya səfər edib, müxtəlif səviyyələrdə görüşlər keçiriblər. Qəzet yazır ki, Robert Köçəryan bir neçə həftə əvvəl Moskvaya səfər edib və orada Vladimir Putinlə görüşüb. “Azatutyun” radiosu Köçəryanın komanda yoldaşı Aqnesa Xamoyandan Köçəryan-Putin görüşünün Moskvada baş tutub-tutmamasına aydınlıq gətirməyə çalışıb. “Şərhsiz” deyə deputat cavab verib. Yeri gəlmişkən, hakim “Vahid Rusiya” partiyasının dəvəti ilə Serj Sarkisyanın rəhbərlik etdiyi Respublika Partiyasının icra orqanının üzvü Eduard Şarmazanov və parlamentin “Şərəfim var” fraksiyasının katibi Tiqran Abramyan hazırda Moskvadadırlar. Onlar 9 may qələbəsinin 80 illiyinə həsr olunmuş beynəlxalq partiyalararası konfransda iştirak edirlər. Şarmazanov “Facebook” səhifəsində yazıb: Ermənistan Respublika Partiyası və “Vahid Rusiya” partiyalararası əməkdaşlığı yeni inkişaf mərhələsinə qədəm qoyur”. Baş nazir Nikol Paşinyan da Rusiya prezidenti Vladimir Putinin dəvəti ilə mayın 9-da qələbənin 80 illiyinə həsr olunmuş bayram tədbirlərində iştirak etmək üçün yaxın vaxtlarda Moskvaya gedəcək. Bundan əvvəl isə Paşinyan Serj Sarkisyan və Robert Köçəryanı tənqid edərək onları "yarıcanlı" adlandırıb. Paşinyan bu ifadəni keçmiş prezidentlərin onun 2018-ci ildə hakimiyyətə gəlməsinə kimin səbəb olduğu barədə açıq mübahisəsinə cavab olaraq işlədib: "İki yarıcanlı şəxs ətrafındakı insanlarla mənim hakimiyyətə gəlməyimə kimin səbəb olduğu barədə mübahisə edir, bir-birindən həqiqəti deməyi tələb edirlər... Deyin, bu seçki saxtakarlarını və hakimiyyət qəsbkarlarını kim irəli çıxarıb”.
Nahid SALAIYEV
