Məlum olduğu kimi, İran İslam Respublikasının prezidenti Məsud Pezeşkian Azərbaycanda rəsmi səfərdə olub. Səfər zamanı pezidentlər birgə bəyanat imzalayıb və müxtəlif sahələr üzrə mübadilələr aparılıb.
Həmçinin, Azərbaycan Respublikasının Medianın İnkişafı Agentliyi ilə İran İslam Respublikasının Mədəniyyət və İslami İrşad Nazirliyi arasında media əməkdaşlığı haqqında sənəd imzalanıb.
Müşfiq Ələsgərli: “İnformasiya məsələləri üzrə əməkdaşlıq müqavilələrinin, anlaşma memorondumlarının olması bu kontekstdə mühüm əhəmiyyət daşıyır”
Azərbaycan və İran arasında media sahəsində mübadilənin əhəmiyyəti haqqında fikir bildirən Mətbuat Şurası İdarə Heyətinin üzvü, media eksperti Müşfiq Ələsgərli “Bakı-Xəbər”ə açıqlamasında qeyd etdi ki, Azərbaycan Respublikasının Medianın İnkişafı Agentliyi son illər ərzində Azərbaycanın qonşuluğunda yerləşən, həmçinin, Azərbaycanın sıx təmasda olduğu dövlətlərin kommunikasiyaya cavadeh strukturları ilə əməkdaşlıq müqavilələri, memorondumlar imzalayır. Ötən illər ərzində belə sənədlər Türkiyənin, Qazaxstanın, Özbəkistanın və digər respublikaların uyğun strukturları ilə imzalanıb: “İndi isə İran İslam Respublikasının Mədəniyyət və İslami İrşad Nazirliyi arasında media əməkdaşlığı haqqında Anlaşma Memorandumu” mübadilə edilib. Qonşu dövlətlərin uyğun strukturları ilə media, informasiya sahəsində əməkdaşlıq üzrə sənədlərin razılaşdırılması həm Azərbaycan, həm qarşıdakı dövlətlər, həm də ümumilikdə regionumuz üçün vacibdir. Belə ki, yaşadığımız dövrdə dünya düzəni yenidən tərtib edilir və təəssüf ki, bu proses mübahisəsiz, münaqişəsiz ötüşmür. Böyük güc mərkəzləri dünyanın istənilən nöqtəsində öz maraqlarını təmin etmək üçün münqaişələr, müharibələr törədə bilirlər. Bu kontekstdə ictimai fikri çaşdırmaq, şəxsi maraqlarını diktə etmək üçün informasiya manipulyasiyalarına yol verir, dezinformasiyalar yayır, xalqları, dövlətləri üz-üzə qoya bilirlər. Yaranmış durum informasiya işinə həssas, diqqətli yanaşma tələb edir. Region əhalisini doğru, düzgün məlumatlarla təmin edilməsi üçün informasiyanın ilkin mənbədən, həm də operativ şəkildə alınması zərurəti yaranır. İnformasiya məsələləri üzrə əməkdaşlıq müqavilələrinin, anlaşma memorondumlarının olması bu kontekstdə mühüm əhəmiyyət daşıyır. Məsələnin digər tərəfi ondan ibarətdir ki, Azərbaycan və İran xalqları tarixən bu regionda yaşamış, mədəni, mənəvi, dini birliyi olan xalqlardır. İran İslam Respublikasında bizim milyonlarla soydaşımız yaşayır. Tarixi köklərə dayanan əlaqələrimizin bu gün yeni dövrün çağırışlarına uyğunlaşdırılması zərurəti ortaya çıxır. İnformasiya sahəsində əməkdaşlığın inkişaf etdirilməsi bu kontekstdə də önəmlidir. Bu və digər faktları nəzərə alaraq, demək olar ki, Medianın İnkişafı Agentliyi ilə İran İslam Respublikasının Mədəniyyət və İslami İrşad Nazirliyi arasında media əməkdaşlığı haqqında Anlaşma Memorandumu”nun imzalanması mühüm əhəmiyyət daşıyır”.
Vasif Həsənli: “Azərbaycan və İran arasında bağlanan bu sənəd ölkəmizə qarşı İran mediasında zaman-zaman yayımlanan dezinformasiyaların qarşısının alınmasında xüsusi rol oynayacaq”
“Demokrat.az” xəbər portalının baş redaktoru Vasif Həsənli “Bakı-Xəbər”ə açıqlamasında qeyd etdi ki, Azərbaycan və İran arasında media əməkdaşlığının olması olduqca çox əhəmiyyətli məsələdir. Çünki Azərbaycan və İran bir çox ortaq mədəni, dini və tarixi köklərə malikdir: “Bu mədəni bağların möhkəmləndirilməsi üçün media mühüm vasitədir. Bildiyiniz kimi, zaman-zaman İran mediasında Azərbaycan əleyhinə dezinformasiya və təxribat xarakterli materiallar yayımlanır. Düşünürəm ki, Azərbaycan və İran arasında bağlanan bu sənəd ölkəmizə qarşı İran mediasında zaman-zaman yayımlanan dezinformasiyaların qarşısının alınmasında xüsusi rol oynayacaq. Bu, ilk növbədə İranda Azərbaycanla bağlı ictimai rəyin daha düzgün formalaşması üçün vacibdir”.
Günel CƏLİLOVA
