Faiq Ələkbərli: “Azərbaycanda dini etiqad azadlığının pozulduğunun iddia edilməsi, yanlışdır, çünki bu hərəkət qərəzin bariz nümunəsidir”
ABŞ-nin “Christian Post” nəşri növbəti dəfə Azərbaycanda dini etiqad azadlığının pozulduğu, xristian dini abidələrinin dağıdılması haqqında həqiqəti əks etdirməyən, qərəz və böhtan xarakterli yazı dərc edib.
Həmin yazıda iddia olunur ki, Azərbaycanda xristianlara qarşı zorakılıq son bir ildə kəskin şəkildə artıb, xristian binalarının dağıdılması kimi hadisələr il ərzində üçdən yeddiyə yüksəlib. Minlərlə xristian dini əqidələrinə görə təqiblərə məruz qalaraq evlərini tərk etmək məcburiyyətində olub. Hətta həmin yazıda qeyd edilir ki, guya Azərbaycan rəsmi olaraq dini etiqad azadlığının ciddi şəkildə pozulmasına görə xüsusi narahatlıq doğuran ölkə hesab olunur. Eyni zamanda, “Xristianlara işgəncə verdiyinə görə Azərbaycanı məsuliyyətə cəlb etməyin vaxtı çatıb” deyə çağırış edilir.
“Azərbaycanda dini etiqad azadlığı məsələsi ilə bağlı heç bir problem yoxdur, tarix boyu Azərbaycanda xristianlara münasibət normal olub”
Məlum mövzu ilə bağlı fikir bildirən AMEA-nın Fəlsəfə və Sosiologiya İnstitutunun şöbə müdiri, fəlsəfə doktoru, siyasi şərhçi Faiq Ələkbərli “Bakı-Xəbər”ə şərhində bildirdi ki, Qərb dövlətlərinin Azərbaycanla bağlı qərəzli mövqeyi bütün sahələrdə hiss olunur: “Azərbaycanda hansısa dini etiqad azadlığının pozulduğunu iddia edənlər ilk öncə öz ölkələrində baş verənlərə çönüb baxsınlar. Amerika və ya digər qərb ölkələrində müxtəlif sahələr üzrə problemlər yaşanır. Istər dini etiqad, istərsə də insanların dərisinin rəngi və digər məsələlərlə bağlı kifayət qədər problem var. Təəssüf ki, onlar bu kimi faktları görməzlikdən gəlir və özlərində baş verənləri demokratiyanın nümunəsi hesab edirlər”.
Həmsöhbətimiz xüsusi olaraq vurğuladı ki, Azərbaycanda dini etiqad azadlığı məsələsi ilə bağlı heç bir problem yoxdur. Tarix boyu Azərbaycanda xristianlara münasibət normal olub: “Hansısa xarici media orqanının Azərbaycanda dini etiqad azadlığının pozulduğunu iddia edilməsi yanlışdır, çünki hər şey göz qabağındadır. Onların bu hərəkəti qərəzin bariz nümunəsidir. Həmin materialda iddia olunur ki, guya Azərbaycanda xristian abidələri dağıdılıb, dinə hörmət edilmir. Ancaq ölkəmizdə olan həmin binalar, abidələr mütamadi olaraq təmir, bərpa olunur”.
Günel CƏLİLOVA
