Ramil Məmmədli: “Tramp Zelenskini Kırımı de-yure güzəştə getməyə məcbur edir”
ABŞ prezidenti Donald Tramp Romada Ukrayna lideri Zelenski ilə görüşdən sonra diqqətçəkən açıqlamalar verib. Tramp deyir ki, Rusiya lideri Vladimir Putinin atəşi dayandırmasını və Ukraynadakı müharibənin başa çatması üçün sülh sazişinə razılaşmasını istəyir. Tramp bu açıqlamadan bir gün öncə Papa Fransiskin dəfn mərasimi çərçivəsində Ukrayna prezidenti Volodimir Zelenski ilə üzbəüz görüşüb.
Görüşdən sonra Tramp, Zelenskinin Krımı Rusiyaya verməyə hazır olduğunu bildirib. Roma Papası Fransiskin dəfn mərasimində Ukrayna prezidenti Zelenski ilə görüşən Birləşmiş Ştatlar prezidenti mətbuata danışıb. Görüşün yaxşı keçdiyini deyən Tramp, Ukraynanın sülh sazişinin bir hissəsi kimi Krımı Rusiyaya verməyə hazır olduğunu bildirib.
Maraqlıdır, Tramp nə demək istəyir? Bundan əvvəl Zelenski birmənalı demişdi ki, Krımın güzəştindən söhbət belə gedə bilməz.
“Putin istəyir ki, güzəşt edən tərəf yalnız Ukrayna olsun”
Sözügedən məsələni “Bakı-Xəbər”ə şərh edən hərbi ekspert Ramil Məmmədli hesab edir ki, Trampın belə açıqlama ilə çıxış etməsinin bir səbəbi də Ukrayna ictimai rəyini güzəştlərə kökləməkdir: “Əvvəla, Trampın Rusiya-Ukrayna müharibəsində şəxsi mövqeyi bəllidir. Tramp biznesmen təfəkküründən çıxış edərək Ukraynanın güzəştə getməsini istəyir. Tramp üçün fərqi yoxdur Krım, Donbas kimin nəzarətində qalacaq. Tramp üçün önəmli olan odur ki, müharibə dayansın, Ukraynanın nadir metallarına yiyələnsin, Rusiya ilə yeni müqavilələr bağlasın və s. Yəni alverçi təfəkkürünə malik olan bir şəxsdən nə desən gözləmək olar. Tramp şüurlu şəkildə fevralın 28-də Zelenskini medianın qarşısında aşağıladı. Məqsəd o idi ki, Ukrayna hakimiyyəti Rusiyanın şərtlərini qəbul etsin və işğalla barışsın. Ancaq bunun tam əksi baş verdi. Zelenskinin dirəniş göstərməsi onun ictimai reytinqinə müsbət təsir göstərdi. Əksər Avropa İttifaqı dövlətləri birmənalı olaraq Ukraynanı dəstəklədilər. Üstəlik, məlum oldu ki, Putin müharibəni dayandırmaq fikrində deyil. Çünki böyük itkilər hesabına olsa da Rusiya ordusu Ukraynada irəliləyir. Putin istəyir ki, güzəşt edən tərəf yalnız Ukrayna olsun. Bütün bunların fonunda belə görünür ki, Tramp Zelenskini Kırımı de-yure güzəştə güzəştə getməyə məcbur edir. Donbasa gəldikdə isə, de-fakto o ərazilər Rusiyanın nəzarətində qalır, amma Ukrayna və dünya bunu de-yure tanımır. Rusiya Xarkov şəhəri istiqamətində tutduğu kiçik ərazini geri qaytarır. Zaparoje və Xerson vilayətlərinin işğal olunmayan ərazilərinə Rusiya iddia etmir. Təxminən aşağı-yuxarı hazırlanan atəşkəsin mahiyyəti bundan ibarətdir. Çox güman Tramp bununla bağlı Papası Fransiskin dəfn mərasimində Zelenskiyə ciddi təzyiq göstərib. Ancaq o da var ki, Zelenskinin Krımı güzəştə getməsi onun siyasi baxımdan sonu olacaq”.
Vidadi ORDAHALLI
