Elşad Həsənov: “Bu və digər səbəblərdən Tramp ermənilərin “soyqırım” yalanlarına alət olmaq istəmir”
Aprelin 24-də dərc olunan bəyanatında ABŞ prezidenti Donald Tramp 1915-ci ildə ermənilərin qətlə yetirilməsini "soyqırımı" kimi təsvir etməkdən imtina edib. Tramp prezidentliyinin ilk müddətində də "soyqırımı" sözünü işlətməkdən çəkinmiş və əvvəlki ABŞ prezidentlərinin nümunəsini izləmişdi.
Diqqəti çəkən məqam həm də odur ki, Avropa İttifaqının (Aİ) Ermənistanın Azərbaycanla sərhədindəki monitorinq missiyası da 1915-ci il hadisələri ilə bağlı paylaşımından "soyqırımı" sözünü çıxarıb. Aİ Mülki Missiyasının X sosial media hesabında yerləşdirilən bəyanatının ilkin variantında "erməni soyqırımı qurbanları" yazılıb, lakin bu ifadə az sonra "1915-1923-cü illərin erməni qurbanları" ilə əvəzlənib. Aİ orqanları və rəsmiləri məsələ ilə bağlı ictimai bəyanatlarında "soyqırımı" sözünü işlətməyiblər.
Görünən odur ki, ABŞ və Avropa İttifaqı eyni vaxtda saxda “erməni soyqırımı”ndan yavaş-yavaş imtina edirlər. Ümumən bu, müsbət tendensiyadır.
“Artıq Avroittifaq da erməni yalanlarına ortaq olmaq istəmir”
Sözügedən məsələni “Bakı-Xəbər”ə şərh edən siyasi ekspert Elşad Həsənovun fikrincə, bu il ermənilərin qondarma “soyqırım”la bağlı gözləntiləri özünü doğrultmadı: “Düzdür, qondarma “genosid”in 110 ilini qeyd etdilər, amma qarşılarına qoyduqları məqsədə çata bilmədilər. Bir sıra ermənipərəst xarici siyasiləri, ictimai xadimləri ələ alsalar da elə bir səmərəsi olmadı. Çünki artıq dünya “erməni soyqırımı” yalanlarına alət olmaq istəmir. Türkiyə prezidenti Rəcəb Tayyib Ərdoğan dəfələrlə bəyan edib ki, belə bir hadisəni tarixçilər araşdırmalıdır. Bundan siyasi məqsədlər üçün istifadə olunmamalıdır. O cümlədən, Ankara təklif edir ki, Türkiyə arxivlərini açmağa hazırdır və ABŞ, Avropa və digər ölkələrin alimləri bu prosesdə iştirak edə bilərlər. Ancaq ermənilər buna getmirlər. Çünki bilirlər ki, belə olacağı halda onların yalanları ortaya çıxacaq. Ona görə ki, 1,5 milyon nəfər erməninin öldürülməsi barədə deyilənlər tamamilə yalandır. Əvvəllər uydururdular ki, guya 300 min erməni “genosidə” məruz qalıb. Sonra bu rəqəm 1,5 milyona yüksəldi. 1915-ci ildə Birinci Dünya müharibəsinin qızğın vaxtı idi. Həmin vaxt ermənilər vətəndaşı olduqları Osmanlı İmperiyasına xəyanət etdilər. Ona görə də onların köçürülməsinə qərar verilib. Məsələnin mahiyyəti budur. Rusiya və digər imperialist güclər ermənilərdən öz məqsədləri üçün istifadə edirlər. Rusiya bizim ərazilər hesabına süni Ermənistan yaratdılar. İndi həmin ermənilər Rusiyaya qarşı üz çevirirlər. Trampın “soyqırım” ifadəsi işlətməməsi gözlənilən idi. Ona görə ki, ABŞ ermənilərinin əksəriyyəti Cozef Baydenə stavka edirdi. Həm 2016-cı ildə, həm də 2020, 2024-cü illərdə keçirilən prezident seçkilərində erməni lobbisi, erməni əsilli vətəndaşlar Demokratlar Partiyasının namizədinə səs veriblər. Bu və digər səbəblərdən Tramp ermənilərin “soyqırım” yalanlarına alət olmaq istəmir. Avropa İttifaqı da Türkiyə faktoruna görə, bu prosesdə ermənilərin yanında olmaq istəmir. Məsələ ondadır ki, ABŞ əvvəlki kimi Avropanın təhlükəsizliyində rol almaq istəmir. Avropa özü öz təhlükəsizliyini qurmaq istəyir. Bu isə, Türkiyəsiz mümkün deyil. Fikrimcə, bu səbəbdən də artıq Avroittifaq da erməni yalanlarına ortaq olmaq istəmir”.
Vidadi ORDAHALLI
