İlyas Hüseynov: “Hesab edirəm ki, bu əldə olunan nailiyyətlərin inkişaf etdirilməsi və eləcə də dialoqun daha da dərinləşməsi hər iki tərəfə faydalı olacaq”
Avropa İttifaqı və Azərbaycan yeni tərəfdaşlıq və əməkdaşlıq sazişi üzrə danışıqları bərpa etmək barədə razılığa gəliblər. Bunu Avropa İttifaqının xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallas Azərbaycanın xarici işlər naziri Ceyhun Bayramovla birgə mətbuat konfransı zamanı deyib.
“Bu tərəfdaşlıq qarşılıqlı hörmət, o cümlədən Aİ-yə üzv dövlətlərə hörmət, habelə qanunun aliliyi və insan hüquqları kimi fundamental prinsiplər üzərində qurulmalıdır", - o bildirib.
O qeyd edib ki, Aİ ilə Azərbaycan arasında uzunmüddətli tərəfdaşlıq mövcuddur. Xüsusilə, Aİ Azərbaycanın ən böyük ticarət tərəfdaşı və eyni zamanda ən böyük investorudur.
"Aİ həmçinin Azərbaycanda minatəmizləmə əməliyyatlarına əhəmiyyətli dəstək verir, münaqişənin nəticələrinin aradan qaldırılmasına və insanların həyatını xilas etməyə kömək edir. Əməkdaşlığımızın gələcək inkişafı üçün böyük potensial var", - o əlavə edib.
Məsələni şərh edən politoloq İlyas Hüseynov baki-xeber.com-a bildirdi ki, Aİ və Azərbaycan arasında da “Şərq Tərəfdaşlığı” proqramı çərçivəsində münasibətlər mövcuddur və bu münasibətlər hər zaman dinamik şəkildə inkişaf etməyib: “Çünki burda Avropa Parlamentinin, Aİ-nin bir sıra qərəzli addımları ikitərəfli əməkdaşlığı yubadıb, soyudub və bu əməkdaşlığa inam azalıb. Bu inamı azaldan əsas səbəb Brüsselin ikili standartlar siyasətindən çıxış etməsi, qərəzli və selektiv yanaşması olub. Lakin Azərbayan Aİ-yə üzv dövlətlərə hörmətlə yanaşır və ölkəmizin ərazi bütövlüyünə, suverenliyinə hörməti tələb edir. Eyni zamanda Aİ ilə Azərbaycan arasında xüsusilə enerji tərəfdaşlığı sahəsində çox strateji münasibətlər qurulub. Avropa Komissiyasının rəhbəri Ursulla fon der Leyenin Azərbaycana səfəri zamanı Azərbaycanın Avropaya nəql etdiyi enerji həcmlərinin iki dəfəyə qədər artırılmasına dair mühüm strateji sənəd imzalanıb. Bununla yanaşı olaraq Aİ Azərbaycanda neft-qaz sektorunda fəal iştirak edir və Azərbaycanın əsas iqtisadi tərəfdaşı Aİ-yə üzv olan dövlətlərdir. Burada sərmayələr sahəsində də çox əlverişli iş mühiti formalaşıb. Hesab edirəm ki, bu əldə olunan nailiyyətlərin inkişaf etdirilməsi və eləcə də dialoqun daha da dərinləşməsi hər iki tərəfə faydalı olacaq. Aİ xüsusilə böyük bir coğrafiyada Şərqə doğru dialoqu inkişaf etdirməkdədir, rəsmi Bakıda da bunu diqqətlə izləyirlər. Xüsusilə Mərkəzi Asiyada keçirilən zirvə toplantısı, məsləhətləşmələr, dialoq, sammitin keçirilməsi fonunda Cənubi Qafqaza da maraq artmaqdadır”.
İradə SARIYEVA
