Hindistan və Pakistan əsgərləri arasında toqquşmalar başlayıb. İki ölkə arasında gərginlik Hindistanın Kəşmir bölgəsində 26 turistin ölümünə səbəb olan hücumdan artıb.
Çərşənbə axşamı Kəşmir bölgəsindəki Pahalqamdakı turistik məkanda insanların tətil edənlərə yaxın məsafədən atəş açması nəticəsində 25 hindistanlı turist və bir Nepal vətəndaşı həlak olub. Hücumu "Kəşmir Müqaviməti (TRF)" adlı təşkilat öz üzərinə götürüb, Cammu və Kəşmir polisi hücumun 2-si pakistanlı olmaqla 3 şübhəli tərəfindən həyata keçirildiyini açıqlayıb. Hindistan hücumdan sonra qonşusu Pakistanla diplomatik münasibətləri aşağı salıb. Pakistan hökuməti isə hücumla hər hansı əlaqəni təkzib edib və hücumla bağlı beynəlxalq araşdırmaya ehtiyac olduğunu bildirib.
Hücumdan sonra iki nüvə ölkəsi arasında münasibətlər gərginləşib. Pakistan öz hava məkanını Hindistan hava yolları üçün bağlayıb, Hindistan isə Hind çayı və onun qollarında suyun paylaşılmasını tənzimləyən 1960-cı ildə imzalanmış Hind Su Müqaviləsini dayandırıb. Pakistan hökuməti su axınına istənilən müdaxilənin müharibə aktı kimi qiymətləndiriləcəyini açıqlayıb. İki ölkə həmçinin qarşılıqlı viza prosedurlarını dayandırmaq və sərhəd qapılarını bağlamaq qərarına gəlib.
Bundan başqa, məlumatlara görə, Pakistan Xarici İşlər Nazirliyi Hindistan hərbi məsləhətçilərinin 48 saat ərzində ölkəni tərk etmələrini tələb edib.
Bu gün isə tərəflər arasında toqquşmalar başlayıb. Qarşıdurmalarda itkilər barədə hələlik rəsmi açıqlama yoxdur.
Kəşmir məsələsi 1947-ci ildən bəri iki ölkəni bir-birilə üz-üzə qoyur. 2003-cü ildə atəşkəs razılaşmasına baxmayaraq, bölgədə tez-tez toqquşmalar baş verir. Son hadisələr regionda gərginliyi daha da artırıb, beynəlxalq ictimaiyyət isə tərəfləri sakitliyə çağırır.
TAHİR
