Rizvan Hüseynov: “Erməni kilsəsinin, Eçməidzinin təşvişə düşdüyünü görürük”
Aprelin 10-da Vatikanda Qriqorian Pontifik Universitetində Bakı Beynəlxalq Multikulturalizm Mərkəzi, AMEA-nın Abbasqulu Ağa Bakıxanov adına Tarix və Etnologiya İnstitutu, Azərbaycanın Müqəddəs Taxt-Tacdakı səfirliyi və Alban-Udi Xristian Dini İcmasının birgə təşkilatçılığı ilə “Azərbaycanda xristianlıq: tarix və müasirlik” mövzusunda Qafqaz Albaniyası irsinə həsr edilən XII beynəlxalq elmi konfrans keçirilib.
Elmi konfransda Türkiyə, Qazaxıstan, Özbəkistan, Cənubi Koreya, Rusiya, Polşa, İtaliya, Gürcüstan, Almaniya, Fransa, Kanada, ABŞ, Litva kimi ölkələrdən müxtəxəssislər iştirak edib.
Konfransın keçirildiyi saatlarda Ermənistan mətbuatı ənənəvi olaraq dezinformasiya yaymağa başladı, Qafqaz Albaniyası irsinin gerçək sahibinin Azərbaycan xalqı olması faktını təhrif edərək bu irsə qarşı növbəti cəfəngiyatlar səsləndiriblər. Vatikanda keçirilən tədbirdə Qafqaz Albaniyasının yadigarı olan irsin, Gəncəsər, Xudavəng və Amaras monastırlarının Azərbaycana məxsusluğunun vurğulanması da erməniləri ciddi narahat edib. Bir sözlə, bu tədbirin keçirilməsi erməni saxtakarlığının ifşa olunmasında növbəti rolu oynadı.
“Həm bu tədbir, həm də bu tədbirin nəticələri Azərbaycanın mövqeyinə ciddi dəstək ola bilər ki, heç bir çirkin niyyətlər və qara əllər bizim irsimizə toxunmasın”
Qafqaz Tarixi Mərkəzinin direktoru Rizvan Hüseynov “Bakı-Xəbər”ə “Əslində, biz ermənilərin, daha konkret desək, erməni kilsəsinin, Eçmiə dzinin təşvişə düşdüyünü görürük. 44 günlük müharibədən beş il keçir, amma Eçməidzinin, erməni kiləsinin heç bir sülhpərəst, sülhə yaxın mövqeyini eşitmədik. Yəni Azərbaycan və erməni xalqları arasında sülhlə bağlı hansısa bir təşəbbüsünü görmədik”-deyə bildirdi.
R.Hüseynovun sözlərinə görə, bu da onu göstərir ki, erməni kilsəsi başda olmaqla erməni millətçiləri, xaricdəki diaspor təşkilatları, siyasi dairələr heç də sülh istəmirlər və revanşizm siyasətini davam etdirirlər. “Yəni hələ də gözlərini Azərbaycan torpaqlarına, bizim mədəni, dini irsimizə dikiblər.
Bilirik ki, Vatikan əsrlər boyu erməni kilsəsinin əsas hamisi və dəstəkçisi olub. Bizim region çox ağrılı proseslər keçib və bu prosesdə Vatikanın da ermənilər tərəfindən müdaxiləsi olub. Yəni təkcə Çar Rusiyası, Avropa yox, uzun illər Vatikan da bizim regionda çətin siyasi oyunlarda iştirak edib. Vatikan erməni kilsəsinin, erməni projesinin nəinki dəstəkçisi, bütövlükdə təməlində duran dini siyasi mərkəzdir. Amma indi bəzi məsələlərdə Vatikanın mövqeyi dəyişib, Azərbaycanın ərazi bütövlüyünü və bizə aid olan xristian irsini tanıyır. Bu da bir çox erməni kilsəsində, diasporda, siyasi dairələrdə çox böyük narahatlıq doğurur. Bu baxımdan “Azərbaycanda xristianlıq: tarix və müasirlik” mövzusunda Qafqaz Albaniyası irsinə həsr edilən beynəlxalq tədbirin İtaliyada, Romada, Vatikanda keçirilməsi erməni kilsəsini narahat edir və qorxudur. Bu tədbirin əsas hədəfi azad olunmuş ərazilərdə Azərbaycanın xristian irsinə aid olan kilsə, monastır və başqa abidələrin, obyektlərin müzakirəsidir ki, bu, Azərbaycan irsinin ayrılmaz parçasıdır. Həm orda iştirak edən bu sahədə tanınmış alimlər, həm tədbirin keçirildiyi mötəbər yer-Vatikan Azərbaycanın haqlı mövqeyinə çox ciddi dəstək ola bilər. Həm bu tədbir, həm də bu tədbirin nəticələri Azərbaycanın mövqeyinə ciddi dəstək ola bilər ki, heç bir çirkin niyyətlər və qara əllər bizim irsimizə toxunmasın. Biz heç də şübhə etmirik və bilirik ki, erməni tərəfi çalışır Amerikada, Avropada daim xristian qardaşlığı kartından, xristian təəssübkeşliyi faktorundan, xristian çalarlarından istifadə edərək Azərbaycana qarşı bir kampaniya yürütsün. Buna görə də bunun qarşısını almaq, onlara haqlı cavab vermək üçün bir növ belə beynəlxalq mötəbər tədbirlər çox vacibdir ki, həm xristian dünyası, həm xristian Qafqaz Albaniyası tarixini araşdıran alimlər də Azərbaycanın haqlı mövqeyini dəstəkləsinlər”-deyə R.Hüseynov bildirdi.
İradə SARIYEVA
