Azər Həsrət: "Ermənistan sıra dışı hərəkətlərə yol verərsə, budəfəki məğlubiyyəti daha acınacaqlı olacaq"
ADA Universitetində keçirilən “Yeni dünya nizamına doğru” mövzusunda beynəlxalq forumda çıxışı zamanı prezident İlham Əliyev Ermənistanda güclü revanşuzmdən, aktiv və passiv revanşuzmdən, yeni müharibə hazırlıqlarından və bu məqsədlə Minsk Qrupunun byraxılmamasından danışdı.
Ermənistanda passiv və aktiv revanşistlər kimlərdi və onlar hansı məqamda yenidən dağıdıcı formada birləşə bilərlər?
Baki-xeber.com saytının sualını cavablandıran siyasi şərhçi Azər Həsrət bildirdi ki, cənab prezident "aktiv revanşistlər" deyəndə Ermənistanın keçmiş prezidentlərini - Sarkisyan, Koçaryan və Ter-Petrosyanı nəzərdə tutur: "Çünki onlar həqiqətən də bu münaqişənin indiki nəticələrlə başa çatmasını istəmirlər. Onlar əllərindən gələni edirlər ki, müharibə yenidən qızışsın. Onların düşüncəsinə görə, guya müharibə yenidən başlayarsa, Azərbaycan üzərində qələbə çalma imkanları hələ də qalır. Bu da ya onların burunlarının ucundan uzağı görə bilməməsindən, ya da ağalarının onlara belə sifariş verməsindən irəli gəlir. Hər halda, ikinci variant daha inandırıcı görünür. Bu adamlar hələ də gerçəklikləri dərk edə bilmirlər. Bəlkə də dərk edirlər, sadəcə qəbul etmək istəmirlər. Ona görə də bu cür "revansizm" xəstəliyindən əziyyət çəkirlər.
"Passiv revanşistlər" dedikdə isə prezident Nikol Paşinyan və onun komandaşını nəzərdə tutur. Baş nazir üzdə özünü sülh tərəfdarı kimi göstərir, Azərbaycanla anlaşma tərəfdarı kimi təqdim edir, amma əslində o da öz sələfləri kimi düşünür, guya Azərbaycanla bu və ya digər şəkildə aktiv hərbi əməliyyatlara başlanılarsa, müttəfiqlərinin yardımı ilə nəyəsə nail ola bilərlər. Ermənistan hakimiyyəti və müxalifəti Azərbaycanın qələbəsini həzm edə bilmir. Əlbəttə, Paşinyan sözdə bəzi etiraflar edir, amma məğlubiyyətlə hələ də barışa bilmir. Ona görə də "revanşizm" xəstəliyindən o da qurtula bilmir.
Amma Azərbaycan üçün Ermənistan müxalifətinin və hakimiyyətinin nə düşündüyü o qədər də maraqlı deyil. Bizim üçün bu heç nəyi dəyişmir. Azərbaycan üçün revanşistlərin aktiv və ya passiv olmasının o qədər də əhəmiyyəti yoxdur. Çünki Azərbaycan doğrudan da güclü dövlətdir, öz imkanları hesabına bütün parametrlər üzrə Ermənistanı bir neçə dəfə üstələyir. Ona görə də Ermənistan sıra dışı hərəkətlərə yol verərsə, budəfəki məğlubiyyəti daha acınacaqlı olacaq. 2020-ci ilin 44 günlük savaşında Ermənistan Azərbaycan torpaqlarından rədd edilmişdisə, bu dəfə müharibəyə başlayacağı təqdirdə o, indi "Ermənistan" adlanan dövlətin gələcəyini risq altına atmış olacaq. Ümumiyyətlə, Ermənistanın revanşizmlə irəliləmək istəyi intihardan başqa bir şey deyil. İntihar etmək istəyirlərsə, buyursunlar, əlbəttə, Azərbaycan bu işdə onlara həvəslə kömək edə bilər. Lakin bir daha təkrar etmək istəyirəm ki, Azərbaycan dövləti də, onun prezidenti də hadisənin bu mərhələyə gəlib çıxmasını arzulamır. Biz doğrudan da dinc-yanası, sülh şəraitində yaşamağın tərəfdarıyıq".
Dəniz NƏSİRLİ
