Zaur İbrahimli: “Azərbaycanın Amerika üçün strateji dəyəri yüksəkdir”
“Onların indiki siyasəti daha çox Amerikanın milli maraqlarına əsaslanacaq və qeyd edə bilərəm ki, hazırda onlarla çox güclü münasibətlər bu bölgə üçün vacibdir”.Bu sözləri Prezident İlham Əliyev ADA Universitetində keçirilən "Yeni dünya nizamına doğru" mövzusunda beynəlxalq forumda çıxışı zamanı deyib.
İqtisadi baxımdan güclü, enerji resurslarına, ordusu döyüş meydanında sübuta yetirilmiş gücə malik olan ölkə olduğumuzu vurğulayan Prezident əlavə edib: “Buna görə biz Birləşmiş Ştatlar üçün çox mühüm tərəfdaş ola bilərik”.
Prezident İ.Əliyevin dediyindən belə aydın olur ki, Azərbaycan ABŞ üçün mühüm tərəfdaş ola bilər. Ölkə başçısı bununla nə demək istəyib?
“Gələcəkdə Vaşinqton-Bakı münasibətləri inkişaf edəcək, strateji tərəfdaşlıq üçün yeni imkanlar yaranacaq”
Siyasi şərhçi Zaur İbrahimli “Bakı-Xəbər”ə şərhində bildirdi ki, Bayden administrasiyanın iqtidardan getməsi Azərbaycanla strateji əməkdaşlığın yaranmasına yeni imkanlar açıb: “Tramp hakimiyyəti sülhpərvər, sağlam düşüncəlidir. ABŞ-ın xarici siyasət prioriteti hazırda rasional təməl üzərində qurulur. İqtisadi əməkdaşlıq qarşılıqlı ticarət və hər iki tərəfi razı salacaq təhlükəsizlik maraqlarının uzlaşdırılmasından ibarətdir. Ümumiyyətlə, Tramp administrasiyası ideloji münasibətlərdən uzaqdır, hər hansı subyektiv təsirlərə açıq deyil”.
Həmsöhbətimiz bildirdi ki, Azərbaycan regional iqtisadi layihələrlə xarici ölkələrin diqqətini cəlb edir: “Azərbaycanın xarici siyasət yanaşması da milli maraqlara söykənir, kənar təsirlərdən uzaqdır. Azərbaycanın xarici siyasət yanaşması ilə Tramp hakimiyyətinin xarici siyasət düşüncəsinin prinsiplərində böyük oxşarlıq var. Ölkəmiz qarşılıqlı maraqlara söykənən, hər iki tərəf üçün faydanı təmin edəcək prinsiplərə əsaslanır. Bu baxımdan Azərbaycanın Amerika üçün strateji dəyəri yüksəkdir. Onu da nəzərə almaq lazımdır ki, Azərbaycan Avrasiyanın nəqliyyat qovşaqlarından biridir. Həmçinin, Azərbaycanın fəal tərəfdaşları ABŞ-la yaxın münasibətdədir. Macarıstan, İtaliya, İsrail və digər ölkələri misal çəkmək olar. Bütün bu amillər gələcəkdə Vaşinqton-Bakı münasibətlərinin inkişaf edəcəyini, strateji tərəfdaşlıq üçün yeni imkanlar yaranacağını göstərir”.
Günel CƏLİLOVA
