Akif Nağı: "Passiv revanşıstlər düşünür ki, guya nə vaxtsa regionda qüvvələr nisbəti dəyişə bilər, həmin vaxt hərəkətə keçsinlər və qisas alsınlar"
Prezident İlham Əliyev ADA Universitetində keçirilən “Yeni dünya nizamına doğru” mövzusunda beynəlxalq forumda Ermənistanla sülh sazişi mövzusunda suallara cavabında deyib:
"Biz onlara bildirmişik ki, özlərinə dost hesab etdikləri qüvvələrə o qədər də arxalanmasınlar. Çünki reallıqda onlar bizimlə üz-üzə, baş-başa qalacaqlar. Biz isə maraqlarımızı müdafiə etmək üçün siyasi iradəyə malikik. Bizə qarşı hər hansı bir siyasi təzyiq göstərilə bilməz ki, biz siyasətimizdən kənara çəkilək. İkinci Qarabağ məsələsi və antiterror əməliyýatından sonra baş verənlər onu göstərir ki, biz Ermənistanın sürətlə silahlanması fonunda müdafiə qabiliyyətinə malikik. Ermənistanın yeni dostları onu yeni ölümcül silahlarla təmin edirlər. Bu isə heç də sülh və sabitliyə xidmət etmir. Bu yalnız yeni gərginlik ocaqlarının yaranmasına xidmət edəcək. Biz bilirik ki, Ermənistanda çox güclü revanşist qruplar mövcuddur. Onları hətta iki yerə bölmək olar. Aktiv revanşistlər o kəslərdir ki, 30 illik işğala cavabdehdirlər. Passiv revanşistlər isə bugünkü Ermənistan hakimiyyətidir. Onlar sözdə konstriktiv mövqe nümayiş etdirir, ancaq eyni qisas və revanş hissləri ilə yaşayırlar".
İndiyə qədər biz erməni müxalifətini revanşist adlandırırdıq, hakimiyyətin "passiv revanşist" adlandırılmasi ilə razısınızmı?
Baki-xeber.com saytına açıqlamasında politoloq Akif Nağı bildirdi ki, Ermənistanda revanşistlərin hamısının aktiv olduğunu hesab edir: "Sadəcə olaraq, onlardan bəziləri özlərinin revanşist hisslərini gizlətməyə çalışırlar. Həmin qruplar Azərbaycana qarşı "cavab tədbirlərı görmək" üçün məqam gözləyirlər. Sarkisyan-Koçaryan cütlüyü, eyni zamanda Levon Ter-Petrosyan Azərbaycana qarşı 30 illik işğal siyasətinə rəhbərlik ediblər. Onlar indi Ermənistanda müxalifət sayılır. Bu gün Azərbaycan Ermənistan konstitusiyasının preambulasında 1990-cı ildə qəbul edilmiş Ermənistan müstəqillik bəyannamasinə istinadın aradan qaldırılmasını istəyir. Bu sənəd Ter-Petrosyanın prezidentlik dönəmində qəbul edilib.
1 dekabr 1989-cu ildə qəbul edilmiş müstəqillik bəyannamasində Azərbaycanın Dağlıq Qarabağ bölgəsinin Ermənistana birləşdirilməsi ifadə edilir.
Özünü ağıllı adam kimi göstərən Ter-Petrosyan Azərbaycana qarşı ən qanlı cinayətlərdə iştirak edib, o, bu münaqişənin bünövrəsini qoyub. Sonrakı illərdə Xocalı soyqırımı ilə bağlı onun çox ağır məsuliyyəti var. Sarkisyan və Koçaryanın da bu məsələdə bu və ya digər şəkildə iştirakı var. Çünki onlar Qarabağın idarəçiləri idi. Ter-Petrosyan isə Ermənistan prezidenti olaraq bu işə rəhbərlik edirdi. Bu şəxslərin hamısı cəzalarının almalıdır, inanıram ki, alacaqlar.
Bu gün Ter-Petrosyan da, Koçaryan da, Sarkisyan da qisas hissi ilə yaşayır və mövqelərini açıq şəkildə ortaya qoyurlar. Onlar cinayət törətdikləri dönəmi yenidən bərpa etməyə çalışirlar, amma anlamırlar ki, artıq bu mümkün deyil. Bu onlara erməni icması qarşısında bəraət qazanmaq üçün lazımdır. Hazırda onlar çox pis durumdadırlar. Artıq onların qurduğu statis-kvo Azərbaycan ordusu tərəfindən aradan qalxıb, məhv edilib. Ona görə də bu qrup özünü düşgün və məyus durumda hiss edir. Bu səbəbdən də açıq şəkildə revanşist çıxışlar edirlər. Bununla onlar həmin miskin dövrə bəraət qazandirmaq istəyirlər. Amma Ermənistan cəmiyyəti özü həmin dövrü kəskin tənqid edir və o dönəmin qayıtmasını istəmir. Hətta o dövrün yenidən təkrarlanması xofu altında imkanı olanlar ölkəni tərk edir.
Sözügedən qüvvələr populist çıxışlar etməklə özlərinə sosial baza yığmaq istəyir, bu da alınmır. Çünki Ermənistan cəmiyyəti Azərbaycan ordusunun gücünü görüb və bir daha müharibə istəmir.
Müxalifət revanşist ideyalari gündəmdə saxlamaqla istəyir ki, Rusiyanın və erməni lobbisinin dəstəyindən yararlansınlar, həmin mənbələrdən gələn maliyyə vəsaiti dayanmasın. Çünki Ermənistanın Azərbaycana qarşı düşmənçilik ideyasınin mənbəyi də elə xarici qüvvələrdir. İndiki revanşistlərin hakimiyyəti dövründə bu avanturist ideyaya görə Ermənistana milyardlarla dollar pul axıdılıb, indi də bu ideyanı maliyyələşdirsinlər.
Eyni zamanda, Paşinyan da məğlub durumda olmasından məmnun deyil. O, həm dünya erməniləri, həm də cəmiyyət qarşısında özünü pis hiss edir. Paşinyan onu da anlayir ki, Azərbaycana qarşı getmək, yenidən müharibə edib uğur qazanmaq mümkün deyil. Ona görə də məqam gözləyir. Onlar ümid edir ki, hansısa fürsət düşə bilər. Passiv revanşıstlər düşünür ki, guya nə vaxtsa regionda qüvvələr nisbəti dəyişə bilər, həmin vaxt hərəkətə keçsinlər və qisas alsınlar. Hakimiyyət qüvvələri düşünür ki, Paşinyana kimsə çox ciddi dəstək verəcək. Yəni düşünürlar ki, Ukraynaya verilən dəstək, nə vaxtsa Ermənistana da verilə bilər. Bu cür dəstək qazanmaq üçün Paşinyan Qərb ölkələri və xristian dünyası ilə görüşlər keçirir, onlara yalvarır. Papadan belə hamıya yalvarırlar ki, Ermənistana da Ukrayna səviyyəsində dəstək verilsin, kimlərsə gəlsin bunların əvəzindən Azərbaycanla vuruşsun. Əsaslandırmağa çalışirlar ki, guya Azərbaycana qarşı müharibə xristianlığın müdafiəsidir. Hazırda passiv revanşistlər aktiv revanşistlərdən daha təhlükəlidir. Çunki bunların əlində hakimiyyət, ordu var və onlara xaricdən daha çox silah-sursat və yardımlar gəlir. Müəyyən dövrdən sonra passiv revanşistlər də başını qaldiracaq. Onlar başını qaldıran kimi də Azərbaycan onları başından viracaq. Onların ağlı kəsmir ki, silah alacaqlarsa, Azərbaycan onun iki qatını alacaq, ordunu artırmaq istəyəcəklərsə, yenə bizim potensialımız bir neçə dəfə Ermənistandan çoxdur. Bu cür xəstə təfəkkürlə Ermənistan hakimiyyəti - passiv revanşistlər sülh müqaviləsinin imzalanmasını uzadırlar".
Dəniz NƏSİRLİ
