Bəhruz Quliyev: "Kommunikasiyaların açılması Ermənistana daha vacib görünür"
"İrəvan və Bakı kommunikasiyaların açılması üzrə qarşılıqlı məqbul həll yolu tapa bilərlər". Bunu Ararat Mirzoyan Finlandiya mediasına müsahibəsində bildirib.
"Biz Ermənistan mallarının Azərbaycan üzərindən tranzitini və əksinə, Azərbaycan məhsullarının Ermənistan vasitəsilə tranzitini təşkil edə bilərik. İlkin mərhələdə dəmiryol tranziti bərpa edilə və sonradan genişləndirilə bilər", - Mirzoyan bildirib.
A.Mirzoyan deyir Azərbaycan bizim, biz də Azərbaycan üçün tranzit ola bilərik. Ekspertlər qeyd edirlər ki, Mirzoyan nə dediyini anlamır. Düşünmür ki, Azərbaycanın Ermənistandan tranzit kimi istifadəyə ehtiyacı yoxdur. Bizim buna ehtiyacımız yoxdur, onların bizə ehtiyacı var. Ekspertlərə görə, "Zəngəzur dəhlizini" açmırlarsa hansı kommunikasiyadan söhbət gedə bilər? Təbii, biz Ermənistandan tranzit ölkə kimi istifadəyə ehtiyac duymuruq. Onsuz da bütün məhsullarımızı Gürcüstan, Rusiya, İran vasitəsilə xaricə çıxara bilirik. Bu halda Ermənistan bizim üçün nə tranzit ölkə ola bilər ki? Amma bəli, Azərbaycan Ermənistan üçün çox böyük tranzit məntəqə ola bilər. Amma gərək Ermənistan da özünü normal aparsın, "Zəngəzur dəhlizini" açsın. Ekspertlərə görə, bu dəhliz açılmadan hansısa kommunikasiyanın açılmasının mənası yoxdur.
"Ermənistanın daxilindən hər hansı kommunikasiyanın keçməsi Azərbaycan üçün bir o qədər də əhəmiyyət kəsb etmir"
Məsələyə münasibət bildirən SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev "Bakı-Xəbər"ə bildirdi ki, ümumiyyətlə, Azərbaycan tərəfinin Ermənistana qarşı heç bir ərazi iddiası yoxdur: "Baxmayaraq ki, rəsmi İrəvan əsrlər boyu Azərbaycana qarşı etnik təmizləmə siyasəti apararaq, torpaq iddiası irəli sürüb. Amma bütün bunlara rəğmən Azərbaycan tərəfi heç bir zaman onlara qarşı torpaq iddiası irəli sürməyib. Sadəcə olaraq, öz tarixi torpaqlarının qaytarılması istiqamətində hüquqi addımlarını atıb. 2020-ci il tarixli 44 günlük Vətən müharibəsi də göstərdi ki, Azərbaycan öz hədəflərini çox yaxşı dərk edərək işğal altında olan torpaqlarını azad etdi. Bildiyiniz kimi, rəsmi Bakı uzun illər boyu bu məsələnin hüquqi yolla həllinin tərəfdarı idi. Amma təəssüflər olsun ki, o hüquqi yol heç cür mümkün olmadı və nəticədə Azərbaycan güc yolu ilə öz torpaqlarını geri qaytardı.
10 noyabr 2020-ci il tarixində Azərbaycan, Ermənistan və Rusiya arasında imzalanan üçtərəfli bəyanatda sülhə aparan istiqamətlər var. Kommunikasiyaların açılması, digər əlaqələrin qurulması və s. bəyanatda açıq-aydın öz əksini tapmışdır. Lakin təəssüflər olsun ki, hələ də Ermənistanın sözü ilə əməli üst-üstə düşmür. Nəticədə də regionda sülhə nail olmaq mümkünsüz görünür".
Bəhruz Quliyev fikirlərinə əlavə edib ki, bu gün Ermənistanın xarici işlər naziri Ararat Mirzoyan Azərbaycanla uzlaşmaq haqqında fikirlər səsləndirirsə, kommunikasiyaların açılmasının vacibliyini dilə gətirirsə, deməli, bu proseslər Ermənistana daha vacib görünür: "Ermənistanın daxilindən hər hansı kommunikasiyanın keçməsi Azərbaycan üçün bir o qədər də əhəmiyyət kəsb etmir. Çünki ölkəmizin özünün alternativ yolları və kommunikasiya vasitələri mövcuddur. Hesab edirəm ki, qarşı tərəf kommunikasiyaların açılmasına cəhd etməlidir. Ən əsası. sözləri ilə əməlləri üst-üstə düşməlidir ki, real sülhə yaxın olsunlar. Təbii ki, bölgədə də sülh olduğu təqdirdə bölgə dövlətləri bundan yararlanacaq və bu proseslərdə öz payı olacaq".
İradə SARIYEVA
