İctimai-siyasi fəaliyyət yalnız idarəçilik bacarığı ilə ölçülmür. Bugünkü dövrün çağırışları siyasətçidən daha geniş baxış, elmi düşüncə, humanitar yanaşma, sosial məsuliyyət və insanlarla canlı bağ tələb edir. Bu baxımdan Milli Məclisin deputatı, fəlsəfə doktoru Cavanşir Feyziyev Azərbaycanın ictimai-siyasi həyatında diqqət çəkən simalardan biri kimi çıxış edir. Onun fəaliyyəti siyasət, elm, maarifçilik, humanitar dəyərlər və sosial məsuliyyət xəttində formalaşan çoxşaxəli bir fəaliyyət modelidir.
Cavanşir Feyziyev haqqında danışarkən ilk növbədə onun intellektual portretinə diqqət yetirmək lazımdır. O, yalnız siyasi proseslərin iştirakçısı deyil, həm də həmin prosesləri elmi baxımdan analiz edən, dünyanın mürəkkəb geosiyasi dəyişikliklərini nəzəri əsaslarla şərh edən tədqiqatçıdır. Cavanşir Feyziyevin elmi yaradıcılığı geopolitika, etnosiyasi münasibətlər, humanitar siyasət, milli dövlətçilik və Türk dünyasının inteqrasiyası kimi mühüm istiqamətləri əhatə edir. Xarici dilləri peşəkar səviyyədə bilməsi ona dünya elmi ədəbiyyatını orijinaldan oxumaq, müxtəlif nəzəri məktəblərlə tanış olmaq və beynəlxalq elmi fikrin inkişaf dinamikasını yaxından izləmək imkanı yaradıb. Onun tədqiqatlarında diqqəti cəlb edən mühüm xüsusiyyətlərdən biri, məsələlərə yalnız nəzəri çərçivədə deyil, real siyasi hadisələr fonunda yanaşmasıdır. Bu yanaşma onun əsərlərini həm akademik dairələr, həm də siyasi analitiklər üçün maraqlı edir. Türk dünyasının inteqrasiyası məsələsi onun elmi yaradıcılığında xüsusi yer tutur. Bu istiqamətdə yazdığı əsərlərdə ortaq tarix, ortaq dil, mədəni yaddaş və strateji əməkdaşlıq faktorları geniş şəkildə təhlil edilir. O, Türk dünyasının yaxınlaşmasını duyğusal çağırış deyil, beynəlxalq münasibətlər sisteminin tələb etdiyi geosiyasi zərurət kimi qiymətləndirir. Hər kəsə məlumdur ki, bir ölkənin inkişafının əsas göstəricilərindən biri təhsil sistemidir. Bu həqiqəti dərindən anlayan şəxslərdən biri kimi Cavanşir Feyziyevin fəaliyyətində təhsil sahəsinə xüsusi diqqət müşahidə olunur. Onun dəstəyi ilə həyata keçirilən məktəb layihələri, təhsil təşəbbüsləri, gənclərin inkişafına yönələn fəaliyyətlər, sadəcə sosial layihə deyil, gələcəyə hesablanmış strateji baxışın ifadəsi kimi dəyərləndirilə bilər. Çünki, məktəb yalnız bina deyil, məktəb düşüncənin, şəxsiyyətin, vətəndaş mövqeyinin formalaşdığı məkandır. Kənd məktəblərinə, bölgələrdə təhsil imkanlarının yaxşılaşdırılmasına verilən diqqət xüsusilə əhəmiyyətlidir. Çünki, istedad yalnız böyük şəhərlərdə yaranmır. Sabahın alimi, müəllimi, mühəndisi, həkimi, dövlət xadimi ucqar kənd məktəbində də yetişə bilər. Cavanşir Feyziyevin fəaliyyətinin mühüm istiqamətlərindən biri də humanitar və sosial məsuliyyət sahəsidir. İmkansız ailələrin övladlarına dəstəyin göstərilməsi, tələbələrin təhsil haqlarının ödənilməsinə yardım, xəstə insanların müalicəsinə kömək, şəhid ailələri və qazilərin problemlərinə həssas yanaşma onun fəaliyyətində xüsusi yer tutur. 44 günlük Vətən müharibəsindən sonrakı dövrdə qazilərin sosial həyata adaptasiyası istiqamətində Cavanşir Feyziyevin göstərdiyi təşəbbüslər də, cəmiyyət tərəfindən olduqca müsbət qarşılanıb. Ehtiyac içində olan ailələrin problemlərinə dəstək vermək, insanların çətin günündə yanında olmaq, yalnız ictimai vəzifə deyil, həm də mənəvi məsuliyyət nümunəsidir. Burada xüsusi vurğulanmalı bir məqam var ki, deputatın gördüyü işlərin əhəmiyyətli hissəsi nümayiş və reklam xarakteri daşımadan həyata keçirilir. Cavanşir Feyziyevin şəxsiyyət portretini tamamlayan əsas cəhətlərdən biri onun sadəliyi, səmimiliyi və təvazökarlığıdır. Yüksək statusa malik olmaq hər zaman insanı sadə saxlamır. Lakin, bəzi insanlar vəzifə yüksəldikcə insanlara daha yaxın olmağı bacarırlar. Cavanşir Feyziyevi yaxından müşahidə edənlərin tez-tez qeyd etdiyi xüsusiyyətlərdən biri seçicilərlə münasibətlərindəki təbiilikdir. Seçicilərlə görüşlərə gedərkən hər zaman sadə geyimlərə üstünlük verməsi, bəzən ən köhnə geyimlərini geyinərək insanlarla görüşməsi diqqətdən yayınmayan məqamlardandır. Bu, zahiri detal kimi görünə bilər, amma əslində xarakter göstəricisidir. Bu davranışın arxasında mühüm bir düşüncə dayanır: özünü insanlardan üstün tutmamaq, vəzifə ilə insan arasına məsafə qoymamaq, sadə vətəndaşın dərdini dinləyərkən rəsmi protokol arxasına sığınmamaq. Məhz buna görə də, onun haqqında danışan bir çox insanlar ilk növbədə vəzifəsini deyil, insanlığını, səmimiyyətini və əlçatanlığını vurğulayırlar. Cavanşir Feyziyevin fəaliyyətinə nəzər saldıqda, qarşımızda yalnız siyasi fəaliyyətlə məhdudlaşmayan geniş bir portret canlanır. Burada elmə bağlılıq, milli dövlətçilik düşüncəsi, təhsilə verilən dəyər, humanitar baxış, sosial məsuliyyət və insani münasibətlərin harmoniyası görünür. Hər bir insanın həyat yolu onun söylədiyi fikirlərdən çox, gördüyü işlərlə ölçülür. İllər ərzində həyata keçirilən elmi, ictimai və humanitar fəaliyyətlər onu deməyə əsas verir ki, Cavanşir Feyziyev Azərbaycanın ictimai, eləcə də siyasi həyatında özünəməxsus dəsti-xətti olan simalardan biridir. 12 iyul tarixində ömrünün 63-cü ilinə qədəm qoyan millətimizin həqiqi vəkili, xalqın adamı Cavanşir Feyziyevə möhkəm can sağlığı, uzun ömür, ailə səadəti, tükənməz enerji, elmi, ictimai və siyasi fəaliyyətində yeni uğurlar arzulayırıq. Onun Azərbaycanın inkişafına, milli dövlətçilik düşüncəsinə, elmə, təhsilə və humanitar dəyərlərə xidmət edən fəaliyyətinin bundan sonra da davamlı olmasını diləyirik. Qarşıdakı illərin ona yeni nailiyyətlər, xoş günlər, mənəvi məmnunluq və həyata keçəcək böyük məqsədlər gətirməsini arzu edirik. Cavanşir Feyziyevin elmə, dövlətçiliyə, təhsilə və insan amilinə xidmət edən çoxşaxəli fəaliyyətinin gələcək illərdə də uğurla davam etməsini, həyata keçirdiyi təşəbbüslərin ölkəmizin inkişafına və cəmiyyətimizin tərəqqisinə yeni töhfələr verməsini diləyirik. Lamiyə İsazadə, yazıçı-publisist, Prezident təqaüdçüsü.
