Elşad Həsənov: “Azərbaycanın artan geosiyasi çəkisi bunu bir növ diktə edir”
Azərbaycan 2026-cı il dekabrın 14-15-də ABŞ-ın Mayami şəhərində keçiriləcək G20 Sammitinə dəvət olunan ölkələr sırasında yer alıb. Bu barədə ABŞ-ın G20-yə sədrliyi üzrə rəsmi internet səhifəsində məlumat dərc olunub.
Məlumata görə, sammitə dəvət edilən ölkələr siyahısına Azərbaycanla yanaşı Qazaxıstan, Özbəkistan, Finlandiya, İrlandiya, Niderland, Norveç, Qətər, Sinqapur, İspaniya və Birləşmiş Ərəb Əmirlikləri də daxil edilib.
Qeyd edək ki, G20 sammiti dünyanın aparıcı iqtisadiyyatlarının və dəvət olunmuş tərəfdaş ölkələrin iştirakı ilə qlobal iqtisadi gündəmin, beynəlxalq əməkdaşlığın və strateji çağırışların müzakirə edildiyi əsas platformalardan biri hesab olunur. 2025-ci ildə G20 sammiti Cənubi Afrika Respublikasının Yohannesburq şəhərində keçirilib.
Mayami şəhərində keçiriləcək G20 Sammitinə ölkəmizin dəvət edilməsi ABŞ-ın Azərbaycana nə qədər böyük önəm verməsinin göstəricisidir. Çünki hər ölkəni sözügedən sammitə dəvət etmirlər.
Sözügedən məsələni baki-xeber.com-a şərh edən siyasi ekspert Elşad Həsənovun fikrincə, Azərbaycan bu günkü gücünü, nüfuzunu ötən illər ərzində apardığı uğurlu xarici siyasət hesabına əldə edib: “Prezident İlham Əliyev Azərbaycan iqtisadiyyatını inkişaf etdirdi, ordusunu gücləndirdi. Əldə edilən iqtisadi artımı əhalinin sosial vəziyyətinə yönəltdi. O cümlədən, yeni kadrlar, gənc nəsil yetişdirdi. Onlar da 44 günlük müharibədə ərazilərimizi işğaldan azad etdilər. Bir sözlə, Azərbaycan qalib ölkə olduğu üçün dünya, aparıcı dövlətlər ölkəmizə hörmət edirlər. Məhz bunun nəticəsi idi ki, ötən ilin avqustunda Trampın iştirakı ilə Vaşinqtonda Azərbaycanla Ermənistan sülh müqaviləsini parafladılar. Düzdür, bəzi dövlətlər Azərbaycanın bu uğurunu həzm edə bilmirlər. Ancaq Azərbaycanın apardığı düzgün siyasət onların planlarını pozur. Ən başlıcası isə Azərbaycanın enerji və nəqliyyat-tranzit daşımalarda önəmi hər keçən gün daha da artır. Rusiya-Ukrayna müharibəsi başlayandan sonra Avropanın Azərbaycanın enerji daşıyıcılarına tələbatı kəskin artdı. Çünki müharibəyə görə Rusiyadan idxal edilən qazın həcmi kəskin şəkildə aşağı salındı. Azərbaycan Avropanın 10 ölkəsinə qaz ixrac edir. Azərbaycan Avropa ilə Asiya arasında önəmli körpü rolunda çıxış edir. Son dövrlər Azərbaycan üzərindən Çindən Avropaya daşımaların həcmi kəskin şəkildə artıb. Üstəlik TRIP layihəsinin həyata keçirilməsi reallaşmaq üzrədir. Bu layihənin də moderatoru qismində Birləşmiş Ştatlar çıxış edir. Nəzərə almaq lazımdır ki, ABŞ-ın Mərkəzi Asiyada maraqları artmaqdadır. ABŞ Orta Asiyada nadir metalların hasil olunmasına xüsusi maraq göstərir. Bütün bunlar təbii ki, ölkəmizə olan diqqəti artırır. Bir sözlə, Azərbaycanın artan geosiyasi çəkisi bunu bir növ diktə edir. Nəticədə Azərbaycan G20 Sammitinə dəvət olunan ölkələr sırasında yer alıb”.
Vidadi ORDAHALLI
