Müxalifət küçə döyüşlərindən əl çəkməyib və əl çəkməyəcək. Ermənistan parlamentıinin müxalifətdəki "Hayastan" fraksiyasından üzvü və “Daşnaksütyun” partiyasının Ali Orqanının nümayəndəsi İşxan Saqatelyan jurnalistlərə blokun qazandığı mandatları götürmək barədə danışarkən bunları bildirib.
“Daşnaksakan” qəzetinin məlumatına görə, müxalifət qüvvələri Ermənistan cəmiyyətini narahat edən ən vacib məsələlərdə əməkdaşlıq edəcəklərinə dair birgə bəyanat yayıblar. Saqatelyanın qeyd etdiyi kimi, bu əməkdaşlıq əsasında müxaliflər fəaliyyət gündəliyini genişləndirməli və əsas məsələlər üzrə yol xəritəsi qəbul etməlidir: "Buna görə də həm mitinqlər, həm də fəal parlament müzakirələri gözləmək olar. Yeganə sual bütün bunları hansı qüvvələrin və hansı formatda həyata keçirəcəyidir". İşxan Saqatelyan qeyd edib ki, bu addımların effektivliyi müxalifət qüvvələrinin sonrakı fəaliyyətinin nəticələrinə əsasən qiymətləndirilə bilər. Müxalifət nümayəndəsi bəyan edib ki, əks halda müxalifətə səs verən 500 min seçici blok nümayəndələrinin niyə seçki kampaniyası vədlərini yerinə yetirmədiyini düşünə bilər: “Mövcud olan bütün risklərə baxmayaraq, seçicilər qarşısında məsuliyyət məsələsi də məhz burada ortaya çıxır. Bu risklər olduqca ciddidir”.
Ermənistanın "Güclü Ermənistan" Partiyasının sədri Samvel Karapetyan da ölkədə müxalifətin həlledici küçə mübarizəsinə hazırlaşdığını bildirib: "Mövcud hakimiyyətin atdığı addımlar həm yerli, həm də xarici investorların fəaliyyətinə mane olur. Ölkənin əsas investorlarından biri olan Qaqik Tsarukyanın hətta heyvan müqəvvalarını belə əlindən alıblar". Karapetyan müxalifətin vahid koordinasiya orqanı yaratmaq niyyətini də xatırladıb: "Beş əsas müxalifət qüvvəsi bununla bağlı artıq birgə bəyanat yayıb. Bundan sonra növbəti addımlar atılacaq".
Onu da qeyd edək ki, Konstitusiya Məhkəməsinin seçki nəticələrini qüvvədə saxlamasından sonra Ermənistanın "Güclü Ermənistan" və "Hayastan" müxalif blokları parlament mandatlarını götürərək mübarizəni qanunverici orqanda davam etdirəcəklərini bəyan ediblər. Erməni politoloq Armen Baqdasaryan bu qərarın doğru olduğunu və parlament tribunasının hakimiyyət dəyişikliyi üçün əlavə imkanlar yaradacağını bildirib: “Seçki sonrası küçə aksiyaları mərhələsi bitsə də, mandatların götürülməsi gələcək xalq etirazlarını istisna etmir. Hakimiyyət xarici tərəfdaşlarına verdiyi vədləri yerinə yetirməyə və Konstitusiya dəyişikliyi kimi addımlarla mümkün müqavimət ocaqlarını neytrallaşdırmağa çalışacaq. Baş nazir Nikol Paşinyanın müxalif liderləri hədəf alan bəyanatları və son olaraq "Çiçəklənən Ermənistan" partiyasının sədri Qagik Tsarukyanın şirkətlərində aparılan kütləvi axtarışlar da bu təzyiqlərin tərkib hissəsidir. Müxalifət parlamentdəki siyasi hücumlara hazır olmalı və mandatları hakimiyyətin istənməyən addımlarının qarşısını almaq üçün effektiv bir alətə çevirməlidir”.
Samirə SƏFƏROVA
