Akif Nəsirli: “İran neftinin dünya bazarına çıxışının məhdudlaşdırılması qlobal neft təklifini azalda və qiymətlərin yüksəlməsinə səbəb ola bilər”
ABŞ ordusu, İranın kommersiya gəmilərinə yenidən hücumlarına cavab olaraq, Hörmüz boğazındakı İran hərbi obyektlərinə hava hücumları təşkil edib.
"ABŞ rəsmisinin sözlərinə görə, hədəflər arasında İranın hava hücumundan müdafiə sistemləri, sahil müşahidə sistemləri, yer-hava raketləri, gəmi əleyhinə kruiz raketləri, dron buraxılış qurğuları və liman obyektləri var", - Axios xəbər verir.
ABŞ rəsmisi çərşənbə axşamı həyata keçirilən ABŞ zərbələrinin 10 gün əvvəl Hörmüz boğazında həyata keçirilən zərbələrdən dörd-beş dəfə böyük və daha güclü olduğunu bildirib.
İran dövlət mediası Bəndər Abbas və Sirik liman şəhərlərində, eləcə də Qeşm adasında partlayışların eşidildiyini bildirib.
Xatırladaq ki, ABŞ ordusu 7 iyulda Hörmüzdəki gəmilərə yeni hücumlarda ittiham edərək İrana qarşı zərbələr endirib. Elə həmin gün ABŞ Maliyyə Nazirliyi İran neft əməliyyatları üçün lisenziyanı ləğv edib.
Bilindiyi kimi ABŞ maliyyə Nazirliyinin məlumatına görə, iyulun 7-də İran neftinin ixracına tətbiq etdiyi güzəşti ləğv edib. Halbuki, daha öncədən Amerikanın mövqeyi belə idi ki, İrana avqustun 21-nə qədər neft ixracı sahəsində güzəşt tətbiq olunacaq. Tramp avqustun 21-nə qədər bunu tətbiq etmişdi. Amma ABŞ avqustun 21-ni gözləmədi iyulun 7-də artıq onu ləğv etdi.
Nə baş verəcək? Ola bilərmi İran neftinin ixracına qoyulan bu qadağa uzun müddət davam etsin və bu müvəqqəti güzəşt və sair ləğv olunsun?
Liberal İqtisadçılar Birliyinin rəhbəri Akif Nəsirli baki-xeber.com-a bildirdi ki, ABŞ-ın İran neftinin ixracına tətbiq etdiyi müvəqqəti güzəşti vaxtından əvvəl ləğv etməsi Vaşinqtonun Tehrana qarşı daha sərt siyasət yürütmək niyyətində olduğunu göstərir. “Bu qadağanın uzun müddət davam edib-etməyəcəyi əsasən ABŞ-İran münasibətlərinin inkişafından, bölgədəki təhlükəsizlik vəziyyətindən və qlobal enerji bazarındakı proseslərdən asılı olacaq.
Əgər tərəflər arasında gərginlik davam edərsə və diplomatik danışıqlarda nəticə əldə olunmazsa, sanksiyaların uzun müddət qüvvədə qalması ehtimalı yüksəkdir. Əksinə, münasibətlərdə yumşalma baş verərsə və yeni razılaşmalar əldə olunarsa, gələcəkdə müəyyən güzəştlərin yenidən tətbiqi mümkündür.
İran neftinin dünya bazarına çıxışının məhdudlaşdırılması qlobal neft təklifini azalda və qiymətlərin yüksəlməsinə səbəb ola bilər”.
A.Nəsirlinin sözlərinə görə, bu isə enerji idxalından asılı olan ölkələrdə yanacaq və digər məhsulların maya dəyərinə təsir göstərə, inflyasiya təzyiqlərini artıra bilər. “Hazırkı vəziyyətdə isə bazarlarda gözlənti ondan ibarətdir ki, İran neftinə tətbiq olunan məhdudiyyətlər yaxın dövrdə qüvvədə qalacaq”-deyə A.Nəsirli qeyd etdi.
İradə SARIYEVA
