Mətləb Salahov: “Artıq əksər NATO dövlətləri əvvəlki kimi ABŞ rəhbərini ciddiyə almır, onun iştirakı olmadan Avropanın təhlükəsilziyi üçün çarə axtarırlar”
“NATO-nun Ankarada keçirilən son sammiti qəbul edilən qərarlarla yanaşı, daima özünü Alyans daxilində hegemoniya kimi aparan ABŞ Prezidenti Donald Trampa olan münasibətlə də yadda qaldı. Xüsusilə əvvəlki illərdən fərqli olaraq Qərb dövlətləri artıq qocaman Ağ Ev rəhbərindən çəkinmək əvəzinə onun sərt riktorikasına eyni sərtliklə cavab verir, Alyans üzvlərinin maraqlarını qorumaq üçün okeanın o tayından gələn hədə və tapşırıqları qulaqardına vururlar. İş o yerə çatıb ki, Ankaradakı Sammitə qatılan Lüksemburqun XİN rəhbəri Ksavye Betel Qərb KİV-lərinə açıqlamasında Türkiyəyə D.Trampı razı salmaq üçün deyil, Avropanın təhlükəsizliyi üçün çarə tapmağa gəldiyini elan edir. Bu fakt, daima əsib-coşmaqla, digər Qərb liderlərini alçaltmaqla “məşhurlaşan” milyarder ABŞ Prezidentinə olan “artıq yerini bil” mesajıdır”. Bu fikirləri "Bakı Xəbər"ə açıqlamasında jurnalist-ekspert Mətləb Salahov bildirib. O qeyd edib ki, İrandakı uğursuz müharibə və D.Trampın əksər vədlərini yerinə yetirmək gücündə olmaması, üstəlik öz şəxsi maraqları naminə Avropanın təhlükəsizliyini risqə atması “qoca qitənin” şəxsən D.Trampa artıq etibar etməməsinə əsas yaradır. “Artıq Avropa liderləri D.Tramp olmadan Avropanın təhlükəsizliyi üçün çarə axtarırlar. Çünki bu adam dünya siyasətini nəinki Prezidenti olduğu ABŞ dövlətinin maraqlarına, həttda öz şəxsi varlanmaq məqsədlərinə görə müəyyənləşdirir. Demək olar ki, bəzi post-sovet ölkələrini və bir çox başqa ölkələri də “Fələstinə yardım” adı ilə “Sülh Fondu”na vəsaitlər ödəməyə məcbur edir. İlk hakimiyyətə gəldiyi vaxtlarda Ukrayna münaqişəsini birdəfəlik bitirəcəyini desə də, sonradan silah ticarəti və çirkli pulların “yuyulduğu” bu müharibəni bitirmək heç onun yadına da düşmür. Bu azmış kimi İranda mənasız müharibə yaradaraq orada ABŞ-ın ciddi dövlət imicini də torpağın dibinə “basdırır”. Görünür, artıq D.Trampın başqalarını aşağılamaqla qorxutmaq dövrü başa çatır”.
Namiq Quliyev
