Rəsul Cahangirli: “Bu, dövlət idarəçiliyində səmərəliliyi, effektivliyi daha da artıracaq”
Məlum olduğu kimi, Birinci vitse-prezident Mehriban Əliyevanın sədrliyi ilə Azərbaycan Respublikasının Rəqəmsal İnkişaf Şurasının ilk iclası keçirilib. İclasda bir sıra məsələlər müzakirə edilib.
Bu istiqamətdə qarşıdakı dövrdə bir sıra işlərin həyata keçirilməsi planlaşdırılır. Məsələn, 1.Ayrı-ayrı dövlət qurumlarının fərdi portal və mobil tətbiqləri mərhələli şəkildə vahid ekosistemə inteqrasiya ediləcək. 2. Vətəndaş və bizneslər dövlət xidmətlərinə çıxış üçün bir neçə mobil tətbiqdən istifadə etməyəcək və bütün proses “mygov” və “mygov biznes” platformaları üzərində aparılacaq. 3.Artıq bu prosesə başlanılıb və qısa müddət ərzində "e-Sosial", "e-Təbib" və "e-Su" tətbiqləri tam şəkildə platformaya inteqrasiya olunub. Bundan əlavə, "e-Polis", "Mobil Notariat", "Azərişıq", "Reseptim", "e-Səhiyyə", "MigAz" və "ASAN Müraciət" tətbiqlərinin bir çox xidmətləri artıq inteqrasiya edilib və ilin sonunadək onların bütün xidmətlərinin tam şəkildə "mygov" üzərindən təqdim edilməsi planlaşdırılır.
Burada əsas məsələ odur ki, müxtəlif dövlət orqanlarının mobil tətbiqləri fərqli-fərqli deyil, hamısı bir sistemə transfer olunur. Nəticədə eyni bir sistem əsasında vətəndaşların dövlət xidmətlərinə çıxışı mümkün olacaq. Ayrı-ayrı dövlət qurumları üzrə bir mobil tətbiq olmayacaq. O baxımdan bunun nə kimi perspektivləri var? Sözügedən işin yaxın iki ilin ərzində tam şəkildə həyata keçiriləcəyi ehtimalı nə qədər yüksəkdir? O cümlədən, bunun dövlət idarəçiliyi səmərəliliyinin artırılması, vətəndaşların məmnunluq nöqteyi-nəzərindən nə kimi nəticələri olacaq?
Sözügedən məsələni baki-xeber.com-a şərh edən ekspert Rəsul Cahangirlinin fikrincə, belə bir qərarın verilməsi çox önəmli hadisədir: “Bu sistemə keçidin çox böyük perspektivi var. Ona görə ki, bütün inkişaf etmiş ölkələr buna keçir. Elə ölkələr var ki, artıq illərdir bundan faydalanır. Çünki müasir tələb, idarəçilik sistemi bunu qaçılmaz bir zərurətə çevirir. O baxımdan hesab edirəm ki, bu sistemə keçidin perspektivi böyükdür. Çünki dünya buna doğru gedir. Hesab edirəm ki, yaxın 2-3 il ərzində bu işin həyata keçirilməsi, oturuşması mümkün olacaq. Ən azından ona görə ki, bununla bağlı ölkədə baza mövcuddur, müəyyən təcrübə var. Digər tərəfdən ən yüksək səviyyədə bununla bağlı müvafiq orqanlar qarşısında vəzifələr qoyulub, fəaliyyət planı müəyyənləşdirilib. Ən nəhayət, heç şübhəsiz bu, dövlət idarəçiliyində səmərəliliyi, effektivliyi daha da artıracaq. Vətəndaş məmnunluğu müqayisə olunmaz dərəcədə yüksələcək. Çünki rəqəmsal sistem sayəsində şəxslərlə təmaslar, bürokratik maneələr, süründürməçilik, vaxt itkisi halları ortadan qalxacaq. Bu da əlbəttə ki, vətəndaşların xeyrinə olacaq”.
Vidadi ORDAHALLI
