Rusiyadakı yanacaq böhranı məhsul yığımı mövsümünü ciddi təhdid edir. Fermerlər dizel yanacağı tapa bilmirlər, istehsalçılar məhsul yığımının gecikməsinin milyonlarla rubl itkiyə səbəb ola biləcəyi barədə xəbərdarlıq edirlər. Süd məhsulları istehsalçıları da istehsallarını yarıya endirməyə məcbur qalıblar.
Xüsusilə Rusiyanın çörək mənbəyi olan Stavropol diyarında vəziyyət daha kritikdir. Bölgədəki fermerlər məhsul yığımı mövsümünün zirvəsində yanacaq tapmaqda çətinlik çəkirlər. Bir fermer vəziyyətin ciddiliyini belə təsvir edib: "Biz dizelin son damlası ilə işləyirik. Biz onu “Rosneft”dən ala bilmirik. Nə baş verəcəyini bilmirəm, pul itirməyə başlayacağıq".
Oryol bölgəsindən olan bir fermer isə problemin yalnız məhsul yığımını gecikdirməyəcəyini, həm də məhsulun keyfiyyətinə təsir edəcəyini deyir: "Yağış yağanda məhsul cücərir və keyfiyyətini itirir. Üçüncü dərəcəli buğda əvəzinə dördüncü dərəcəli və ya yem buğdası olur. Qiymətlər tamamilə dəyişir".
Mütəxəssislərin fikrincə, məhsul yetişdikdən sonra məhsul yığımı maksimum 10 gün ərzində aparılmalıdır. Əks halda, məhsul tökülməyə başlayacaq və yağış tarlanı əlçatmaz hala gətirə bilər.
Böhran təkcə tarla bitkilərinə deyil, həm də heyvandarlığa təsir göstərir. Moskva yaxınlığındakı Luhovitsidə bir ferma sahibi dizel çatışmazlığı səbəbindən gündəlik süd emalı gücünün 1 tondan 600 litrə düşdüyünü deyir.
Hökumət böhranı həll etmək üçün dizel ixracını müvəqqəti olaraq dayandırıb. Lakin fermerlər bu tədbirin kifayət edəcəyindən narahatdırlar. Bir çox təsərrüfatlar birbaşa yanacaq təchizatı müqavilələrinə baxmayaraq, məhdudiyyətlər və saxlama problemləri üzündən yanacaq tapmaqda çətinlik çəkir.
Ekspertlər hesab edir ki, məhsul yığımının gecikməsi, keyfiyyət itkisi və istehsalın azalması həm ərzaq qiymətlərini, həm də gələn ilin əkin planlarını təhdid edir. Əgər hökumət tədbirləri böhranın daha da artmasının qarşısını almaq üçün yetərli olmazsa, Rusiyanın kənd təsərrüfatı istehsalı ciddi şəkildə azala bilər.
Tahir TAĞIYEV
