Rəsul Cahangirli: “Birləşmiş Ştatlarla süni intellekt sahəsində əməkdaşlığın çox böyük perspektivi var”
Müasir dövrdə dövlətlərin beynəlxalq rəqabət qabiliyyəti təkcə təbii sərvətlər, coğrafi mövqe və iqtisadi potensialla deyil, həm də rəqəmsal texnologiyaların tətbiqi, innovasiya ekosisteminin inkişafı, süni intellekt imkanlarından səmərəli istifadə və kibertəhlükəsizlik sahəsində formalaşdırılan milli potensialla müəyyən olunur.
2026-cı ildə qəbul edilən "Azərbaycan Respublikasında rəqəmsal inkişafın sürətləndirilməsinə dair 2026-2028-ci illər üçün Fəaliyyət Planı" isə bu siyasətin institusional və hüquqi əsaslarını daha da möhkəmləndirərək rəqəmsallaşma, innovasiya, süni intellekt və kibertəhlükəsizlik istiqamətlərində kompleks islahatların həyata keçirilməsini nəzərdə tutur.
Müasir texnologiyaların, xüsusilə süni intellektin dövlət idarəçiliyinə və cəmiyyət həyatına inteqrasiyası Fəaliyyət Planının əsas strateji prioritetlərindən biridir. Bu istiqamətdə yüksəksəviyyəli hesablama infrastrukturunun qurulması, dövlət xidmətlərinin süni intellekt əsaslı həllərlə təkmilləşdirilməsi və süni intellektin milli strateji prioritet kimi inkişaf etdirilməsi nəzərdə tutulur.
O da məlumdur ki, bu ilin fevralında Azərbaycanla ABŞ arasında Strateji Tərəfdaşlıq haqqında Xartiya imzalanıb. Xartiyada Süni İntellekt (AI) və Rəqəmsal İnfrastruktur sahəsində əməkdaşlıq da nəzərdə tutulub. Bu sahədə ABŞ-la əməkdaşlıq süni intellektlə bağlı işlərin qurulmasında nə kimi faydası ola bilər?
Sözügedən məsələni baki-xeber.com-a şərh edən ekspert Rəsul Cahangirlinin fikrincə, Birləşmiş Ştatlarla süni intellekt sahəsində əməkdaşlığın çox böyük perspektivi var: “Çünki ABŞ sənaye və texnologiya nəhəngidir. ABŞ süni intellekt texnologiyaları üzrə qlobal liderdir. Texnologiya nəhəngləri sektora 300 milyard dollardan çox sərmayə yatırır. Bu günlərdə ABŞ Dövlət katibinin iqtisadiyyat, enerji və biznes məsələləri üzrə köməkçisi Kaleb Orr 1-ci Azərbaycan-ABŞ iqtisadi dialoquna həsr olunmuş mətbuat konfransında bildirib ki, Birləşmiş Ştatlar Azərbaycanın rəqəmsal infrastrukturunun inkişafı və təhlükəsizliyinin gücləndirilməsi məqsədilə süni intellekt sahəsində əməkdaşlığı genişləndirməyə hazırdır. Azərbaycanın rəqəmsal infrastrukturunun yenilənməsi və təhlükəsizliyinin gücləndirilməsi üçün süni intellekt texnologiyalarının daha geniş tətbiqi istiqamətində ABŞ-ın yardımı önəmli əhəmiyyət kəsb edir. Əsas odur ki, Azərbaycanda süni intellekt texnologiyalarının tətbiqi, inkişafı ilə bağlı güclü baza formalaşdırılsın. Belə olduğu halda bu imkanlardan daha rasional şəkildə faydalanmaq mümkün olacaq. Onsuz başqa çıxış yolu yoxdur. Ona görə ki, əksər dünya dövlətləri buna doğru gedir”.
Vidadi ORDAHALLI
