Məhəmməd Əsədullazadə: "Bu o deməkdir ki, indi Azərbaycan daha azaddır"
"Bilirsiniz, işğal dövründə bizim təbii olaraq xarici siyasətimizin böyük hissəsi bu istiqamətə yönəlirdi. İndi isə - tarixi Zəfərimizdən sonra biz xarici siyasətimizdə daha sərbəstik və bu münasibətlə bir neçə kəlmə demək istərdim: müstəqil, prinsipial xarici siyasət bizim əsas istiqamətimizdir". Bunu Prezident İlham Əliyev VII çağırış Milli Məclisin ilk iclasındakı çıxışında deyib.
Ölkə başçısının sözlərinə görə, biz heç kimə qarşı heç vaxt heç bir iş görməmişik, heç kimin işinə qarışmamışıq: "Amma bizim işimizə qarışmaq istəyənlərə də hər dəfə dərs vermişik ki, bunu etməsinlər. Belə cəhdlər var, olacaq. Düzdür, onların heç bir əhəmiyyəti yoxdur. Ancaq bizim xarici siyasət istiqamətində bu amil təbii olaraq həmişə nəzərə alınacaq. Kim bizimlə ikitərəfli formatda, qarşılıqlı hörmət əsasında əməkdaşlıq etmək istəyirsə, biz ikiqat əməkdaşlıq edəcəyik. Amma əgər kimsə hesab edir ki, bizə gəlib nəsə diktə edəcək, yaxud da ki, bizi əsassız olaraq ittiham edəcək, ya da ki, hansısa vasitələrlə bizi qaralayacaq və sanki heç nə olmamış kimi bu ölkələrlə biz dostluq edəcəyik, bu, səhv təsəvvürdür, bu, olmayacaq!".
Maraqlıdır, Prezident "tarixi Zəfərimizdən sonra biz xarici siyasətimizdə daha sərbəstik" deməklə nə demək istədi?
"İşğal dövründə regionda geosiyasi rəqabətdə müəyyən problemlər var idi"
Sözügedən məsələyə aydınlıq gətirən politoloq Məhəmməd Əsədullazadə "Bakı-Xəbər"ə açıqlamasında bununla bağlı bir sıra məqamlara toxundu: "İşğal dövründə Azərbaycan Minsk Qrupunun həmsədr dövlətləri ilə işləmişdir. Üstəlik, müəyyən məsələlərdə ölkəmiz kompromislərə gedirdi. Çünki Birinci Qarabağ müharibəsində Azərbaycan məğlub olmuşdu. İstəsək də, istəməsək də belə bir reallıq var idi. Ancaq indi o reallıqlardan əsər-əlamət qalmayıb. Çünki Azərbaycan hərb yolu ilə öz ərazi bütövlüyünü təmin edib. Əsgərlərimiz canları və qanları hesabına torpaqları azad ediblər. Suverenliyimiz tam təmin edildi. O baxımdan bu o deməkdir ki, indi Azərbaycan daha azaddır. Ona görə də öz xarici siyasətini tam müstəqil şəkildə qurur. Çünki işğal dövründə regionda geosiyasi rəqabətdə müəyyən problemlər var idi. Cənubi Qafqaz uğrunda Rusiya ilə Qərb arasında açıq mübarizə gedirdi. Azərbaycanın 20 faiz ərazisi işğal altında idi. İşğal amili ölkəmizin manevr imkanlarını daraldırdı. Bəzi ölkələr, dairələr Azərbaycana təzyiq göstərərək öz maraqlarını təmin etməyə çalışırdılar. Azərbaycan da məhz işğal faktoruna görə müəyyən qədər məsafəli siyasət aparırdı. Bəzi məsələlərdə kompromislərə gedirdi. Hazırda isə bu maneələr ortadan qalxıb. Çünki işğala son qoyulduğu üçün heç bir dövlət Azərbaycana təzyiq göstərə bilməz. O üzdən, Azərbaycan öz xarici siyasətini müstəqil, prinsipial və milli maraqlar üzərində qurur. Bunu da uğurla davam etdirir. Məhz Prezident Əliyevin parlamentdə çıxışı gösdərdi ki, Azərbaycan yeni bir strategiya həyata keçirəcək. Yeni dünya nizamında daha çevik siyasət yeridəcək. Görünən odur ki, Azərbaycanın xarici siyasətində yeni imkanlar açılıb və dövlətimiz də bundan istifadə etməkdə qərarlıdır".
Vidadi ORDAHALLI
