İbrahim Rüstəmli: "Azərbaycan bu məsələyə xüsusi diqqət yetirir, günün tələbləri səviyyəsində öz hərbi sənayesini formalaşdırmağa çalışır"
"...Digər amil ondan ibarətdir ki, bu gün dünya silah bazarında aparıcı rol oynayan ölkələrin başı öz işlərinə qarışıb. Onlar daha çox öz daxili tələbatını ödəmək üçün çalışırlar. Ona görə dünya silah bazarında təbii olaraq qıtlıq yaranıbdır. Biz bunu da nəzərə almalıyıq.
Eyni zamanda, bu sahə bizə imkan verəcək ki, hərbi-texniki məhsullarımızın ixrac coğrafiyasını genişləndirək. Onsuz da bu gün Azərbaycan onlarla ölkəyə hərbi sənaye kompleksinin məhsullarını ixrac edir və ildən-ilə bu coğrafiya genişlənir. Bu bizim bir çox ölkələrlə apardığımız danışıqların, o cümlədən iqtisadi və sərmayə qoyuluşu sahəsində aparılan danışıqların tərkib hissəsidir - biz yaxın gələcəkdə dünya silah bazarında önəmli oyunçuya çevrilək və bu imkanlar var.
Siz onu da yaxşı bilirsiniz ki, artıq bu yaxınlarda biz bu sahəni özəl sektor üçün də açıq elan etmişik və şadam ki, mənim çağırışıma özəl sektor da müsbət reaksiya vermişdir. Artıq bir neçə yerli Azərbaycan şirkəti, özəl şirkət hərbi sənaye kompleksinin inkişafında iştirak edir, təbii olaraq, müvafiq dövlət qurumlarından lisenziyalar almaq şərti ilə. Beləliklə, bu, bizə imkan verəcək ki, bir neçə ildən sonra bu sahədə istehsal olunan məhsul milyardla dollarla ölçülsün". Bu fikirləri Prezident İlham Əliyev VII çağırış Milli Məclisin ilk iclasındakı çıxışında səsləndirib.
Prezident bildirir ki, dünya silah bazarında aparıcı rol oynayan ölkələrin başı öz işlərinə qarışıb, hərə öz işi ilə məşğuldu. Ona görə də dünya silah bazarında bir qıtlıq yaranıb. Bu vəziyyət bizə öz hərbi sənaye məhsullarımızın yayım coğrafiyasını genişləndirmək imkanı verəcək. Burda Prezident nə demək istəyir?
Silah bazarında yaranmış qıtlıq, dünya silah bazarının əsas oyunçularının başının öz işlərinə qarışması və sair nə deməkdi?
"Azərbaycanın gələcəkdə dünya silah bazarında yer tutacağı şübhəsizdir və bunun üçün də əsaslar var"
Hərbi ekspert İbrahim Rüstəmli "Bakı-Xəbər"ə şərhində bildirdi ki, əslində, bu gün dünya düzənində baş verən hadisələrə nəzər salsaq və əlimizi dünyanın hansı nöqtəsinə uzatsaq orada münaqişənin, soyuq və isti müharibənin getdiyini müşahidə edəcəyik. "Bütün bunlar da, əlbəttə, dünya silah bazarında çox ciddi qıtlığın yaranmasına gətirib çıxarıb. Söhbət təkcə silah istehsalından getmir, məsələ burasındadır ki, silah istehsalçılarının özləri də hazırda bu və ya digər səviyyədə münaqişə içərisindədirlər. Baxın, Amerika başda olmaqla Qərbin, Fransa başda olmaqla bir sıra Avropa dövlətlərinin, Almaniyanın və digərlərinin üzərinə düşən əsas məsələ dünənə kimi Ukrayna cəbhəsində qələbə qazanmaq idisə, bu gün artıq parametrlər dəyişib. Məsələ burasındadır ki, istər Qərb, istərsə də bir sıra Avropa dövlətləri ciddi həyəcan içindədirlər. Həyəcanın arxasında dayanan əsas məsələ də ondan ibarətdir ki, Rusiya Ukrayna üzərində qələbə qazanarsa növbəti hədəf, İkinci Dünya müharibəsi dövründə olduğu kimi, yenə də Avropa dövlətləri olacaq. Yəni cənab Prezidentin dediyi fikirlərin arxasında dayanan əsas məqam da bundan ibarətdir. Bir sıra Qərb dövlətləri, başda ABŞ olmaqla, Avropa dövlətlərinə artıq bu barədə ciddi xəbərdarlıq ediblər. Yəni yaxanızı kənara çəkməyin, əgər yaxanızı kənara çəkib Rusiya-Ukrayna münaqişəsindən uzaqlaşsanız, bu dolayısı ilə Rusiyanın Avropa üzərindəki qələbəsi kimi dəyərləndiriləcək. Yəni bu dəqiqə Rusiyanın əsas hədəfi Ukraynanı məğlub etməkdən ibarətdir. Düzdümü? Ukrayna məğlub olarsa bu artıq Rusuya üçün ciddi bir revanş, yeni dirçəliş rolunu oynayacaq. Çünki Rusiya yalnız Ukrayna ilə müharibə aparmır ki, Ukraynaya dəstək verən aparıcı Avropa və Qərb dövlətləri var. Onların tək məqsədi Ukraynanı bu müharibədən qələbə ilə çıxarmaqdan ibarətdir. Yəni dolayısı ilə müharibədə iştirak edən xeyli sayda dövlət var. Dəfələrlə vurğulamışıq ki, Rusiya təkcə Ukraynaya qarşı döyüşmür, o bütün dünyaya qarşı döyüşür. Rusiyanın bu müharibədən qalib çıxması bütün dünyanın məğlubiyyəti deməkdir. Bu artıq Rusiya üçün yeni bir mərhələnin başlanğıcı olacaq. Belə bir misal var: qiyam yıxa bilmədiyi dövləti möhkəmləndirir. Ortada Qərb, Avropa dövlətlərinin Rusiyaya qarşı qiyamı var. Əgər bu qiyam Rusiyanı həm iqtisadi, həm hərbi, həm də siyasi baxımdan çökdürməsə, iflic vəziyyətə salmasa onu daha da güclü edəcək. "Onların başları özlərinə qarışıb" deməklə cənab Prezident onu vurğulayır ki, bəli, Avropa dövlətlərinin məqsədi indi öz silah arsenallarını genişləşdirməkdən, cəbbəxanalarını gücləndirməkdən və ordularının döyüş imkanlarını artırmaqdan ibarətdir. Əlbəttə, dünyada narkotik vasitələrdən də güclü alver silah alveridir. Yəni ölkəyə ən çox maliyyə vəsaiti gətirən vasitə silah satışıdır. Silah alveri bütün dövrlərdə ən yaxşı qazanc mənbəyi kimi dəyərləndirlir. Amerikanın da, Avropa dövlətlərinin də, elə Rusiyanın özünün də ən böyük qazancı silah satışından əldə edilir. Düzdür, 44 günlük Vətən savaşında və hətta sonrakı dövrlərdə Rusiya silahlarının heç nəyə yaramadığını gördük, onlar döyüş maşınları, tankları, müasir texnologiyaları, silahları yaradırlar. Bu baxımdan, Rusiyanın istehsal etdiyi silahlar da yararsızdır, Avropa və Qərb texnologiyası ilə rəqabətdə uduzur.
O ki qaldı Azərbaycana, əlbəttə, Azərbaycanın da silah sənayesi institutu var, biz də öz silahlarımızı istehsal edirik. Bu mənada onun dünyanın bir sıra aparıcı dövlətləri, o cümlədən də Türkiyə ilə çox yüksək səviyyədə qurulmuş ikitərəfli əlaqələri də mühüm rol oynayır. Azərbaycan müasir hərbin tələblərinə cavab verən yeni texnologiyaların, yeni hərbi silah-sursatların istehsalı sahəsində artıq müəyyən təcrübə qazanıb və bu təcrübə onun üçün çox ciddi gəlir mənbəyi hesab oluna bilər".
İ.Rüstəmli hesab edir ki, bu gün Azərbaycan üçün dünya silah bazarında yeni imkanlar açılır. O vurğuladı ki, silahların müasir tələblər səviyyəsində istehsal edilməsi və sair Azərbaycan üçün mühüm müəyyənedici rol oynayan məsələlərdir. "Əlbəttə, Azərbaycan da silah ixracatçısı ölkələr sırasındadır. Bu da ölkənin gəlirlərində müəyyən rol oynayan sahədir. İnanıram ki, Azərbaycan gələcəkdə bu istiqamətdə əldə etdiyi uğurlarını daha da genişləndirəcək və silahla bağlı iki, üç, yaxud daha artıq dövlətlərdən aslılığını azaldacaq. Artıq vəziyyət belə şəkil alıb ki, silahsız, sursatsız mümkün deyil. Açıq döyüşlər gedir, soyuq müharibə dövrü artıq sakit şəkildə başa çatıb. Ona görə də, təbii ki, Azərbaycan da bu məsələyə xüsusi diqqət yetirir, günün tələbləri səviyyəsində öz hərbi sənayesini formalaşdırmağa çalışır. Bu baxımdan hesab edirəm ki, Azərbaycanın gələcəkdə dünya silah bazarında yer tutacağı şübhəsizdir və bunun üçün də əsaslar var "-deyə İ.Rüstəmli vurğuladı.
İradə SARIYEVA
