Akif Nağı: "Prezident bu təxribatların da hamısını Ermənistan rəhbərliyinin təşkil etdiyini Azərbaycanın bildiyini göstərir"
"Ermənistanda revanşist qüvvələr baş qaldırır. Bu, təkcə marginal siyasi ünsürlər deyil, eyni zamanda, bugünkü Ermənistan hakimiyyəti bu fikirlərlə, bu xülyalarla yaşayır. Onlar İkinci Qarabağ müharibəsinin və antiterror əməliyyatının nəticələri ilə barışmaq istəmirlər. Üzdə bunu desələr də, onların işləri, siyasətləri, addımları tam əks mənzərə yaradır..." Bu barədə Prezident İlham Əliyev VII çağırış Milli Məclisin ilk iclasındakı çıxışında bildirib.
Yəni faktiki olaraq, Prezident Ermənistanın indiki hakimiyyətini revanşist xülyalarda olmaqda ittiham etdi. Onların ünvanına konkret ittiham səsləndirdi.
Bu bəyanatın nəticəsi necə ola bilər?
"Bəlkə elə o revanşist qüvvələrin meydana çıxmasında Paşinyanın və hakimiyyətin əli var, onları ortaya atıb bu qüvvələrin əli ilə Ermənistan cəmiyyətini…"
Azad Vətən Partiyasının sədri Akif Nağı "Bakı-Xəbər"ə şərhində "Bütövlükdə Ermənistan cəmiyyəti və dünya erməniləri Azərbaycana qarşı aqressiv mövqedədirlər. Sadəcə olaraq müəyyən çərçivədə Ermənistan hakimiyyəti oyun oynayır və Azərbaycana qarşı məkrli niyyətlərini gizlətməyə çalışır. Amma mahiyyət etibarı ilə onlar Azərbayanın əldə etdiyi qələbədən narazıdırlar, qələbənin nəticələrini tanımaq, sülh müqaviləsi imzalamaq istəmirlər. Paşinyan oyun oynayır, hər dəfə bir bəhanə ortaya atıb bu bəhanə ilə sülh prosesini ləngidir. Ortaya özündən müəyyən məsələlər çıxarır, müəyyən təkliflər verir. Onların hamsının kökündə o dayanır ki, Azərbaycanla sülh müqaviləsi imzalamasınlar. Çünki sülh müqaviləsinin imzalanması Ermənistanın öz məğlubiyyətini etiraf etməsidir, təsbit etməsidir. Onlar da vaxtı uzadırlar ki, bəlkə regionda vəziyyət dəyişdi, bəlkə Azərbaycan zəiflədi, yaxud hansısa böyük bir dövlət bunların arxasında daha ciddi şəkildə dayandı, Azərbaycana təzyiq etdi, müharibə ehtimalı ortaya çıxdı. Bu ehtimal da ortada var. Onlar Azərbaycana qarşı bu cür revanşist mövqelərdən çıxış etməklə hansısa məkrli planları hazırlayırlar. Çox böyük ehtimalla, ola bilsin, Azərbaycana qarşı hərbi əməliyyatlara da başlasınlar. Ermənistan sürətlə silahlanır. Yəni Qərbdən silahlar gəlir, Avropa, Amerika onu silahlandırır, Amerikanın hərbi kontingenti artıq Ermənistandadır. Hətta orda "Zəngəzur dəhlizi" üzərində baza yaratmağa çalışırlar. Fransa hərtərəfli şəkildə dəstəkləyir, Avropa Birliyinin orada müşahidəçilər qrupu var, artıq o qrup həddindən çıxıbdır, hərbi qüvvəyə çevriliblər. Ermənistan bunlara arxalanır. Rusiyanın özü də Ermənistandan hələ tam şəkildə əlini üzməyib. Orda hərbi bazası var və Rusiya da müəyyən bir məqamda Ermənistanda hakimiyyəti dəyişə bilərsə onun da Azərbaycana qarşı məkrli niyyətləri ortaya çıxa bilər. Ermənistandakı bu vəziyyəti Azərbaycan Prezidenti düzgün təhlil edir və aydın şəkildə görür ki, təkcə hakimiyyətdən kənar qüvvələr, revanşistlər, radikallar tərəfindən yox, hakimiyyətin özündə də Azərbaycana qarşı məkrli planlar qurulur. Bu da hərblə bağlıdır. Bu mesajı göndərməklə Azərbaycan Prezidenti bildirmək istəyir ki, biz sizin daxilinizdə hansı proseslər getdiyini, arxanızda kimlərin dayandığını, hansı planlar qurduğunuzu bilirik. Azərbaycan bunu da çatdırmaq istəyir ki, Ermənistan arxasında dayananların sifarişi, onların təkidi ilə hansı addım atacaqsa və o addımına görə peşman olacaq. Azərbaycan Prezidenti demək istəyir ki, biz 30 il gözlədik, 30 il dözdük, beynəlxalq birlik qarşısında öhdəliklərimizi yerinə yetirdik, məsələnin sülh yolu ilə həllinə çalışdıq, amma alınmadı, onda da Azərbaycan hərbi güc tətbiq etmək haqqını bərpa etdi. Ondan sonrakı dövrlərdə Azərbaycan yenə də gözlədi, "Laçın dəhlizi" ilə bağlı da gözlədi ki, orada Azərbaycanın nəzarəti bərpa olunsun. Amma onlar bunun əvəzində Azərbaycana qarşı hansısa məkrli planlar qurdular, "Laçın dəhlizi" ilə hərbi yüklər, silah daşıdılar, öz məkrli niyyətləri üçün istifadə etməyə başladılar, Azərbaycanın xəbərdarlıqlarına fakir vermədilər, ona görə Azərbaycan "Laçın dəhlizini" də nəzarətə götürdü. Bundan sonra Azərbaycan dəfələrlə beynəlxalq təşkilatlara müraciət etdi ki, Xankəndi, Xocalı, Əsgəran, Ağdərə Azərbaycanın tarixi ərazisidir, Ermənistan tərəfindən işğal olunub, Azərbaycana qaytarılmalıdır. Amma onlar müxtəlif bəhanələrlə məsələni uzadırdılar. Vəziyyət təhlükəli bir həddə çatanda, orda artıq silahlı qüvvələrin olduğu bir şəraitdə, Ermənistanın 10 minə yaxın hərbi silahlısının qanunsuz şəkildə orada yerləşdirilməsi faktlarının qarşısında Azərbaycan nəhayət qərar verdi ki, gözləmək, bu yalanlara dözmək olmaz, bununla bağlı addımını atdı"-deyə A.Nağı bildirdi.
A.Nağı qeyd etdi ki, Azərbaycan silahlı dəstələrə, Ermənistanın silahlı qüvvələrinə qarşı döyüşdü, amma dinc əhaliyə heç bir zərər vurmadan öz haqqını bərpa etdi, Xankəndiyə, digər ərazilərmizə daxil oldu, Azərbaycan Bayrağı dalğalandı, suveren hüquqlarımız bərpa olundu. A.Nağı bildirdi ki, 20 sentyabr Azərbaycan Prezidentinin sərəncamı ilə Dövlət Suverenliyi Günü kimi tarixə yazıldı. "İndi də Azərbaycan xəbərdarlıq edir, Ermənistandan oyunlara son qoymasını tələb edir. Zəngəzur, Naxçıvan istiqamətində atəşkəs tez-tez pozulur, orada Azərbaycana qarşı müəyyən planlar qururlar, Azərbaycana qarşı hədələyici hərəkətlər edirlər. Bunları da Azərbaycan bilir. Prezident bu təxribatların da hamısını Ermənistan rəhbərliyinin təşkil etdiyini Azərbaycanın bildiyini göstərir. Bəlkə elə o revanşist qüvvələrin meydana çıxmasında Paşinyanın və hakimiyyətin əli var, onları ortaya atıb və bu qüvvələrin əli ilə Ermənistan cəmiyyətini radikallaşdırmaq, müharibə əhval-ruhiyyəsi yaratmaq istəyirlər. Azərbaycan Prezidenti də növbəti dəfə onlara mesaj göndərir ki, bu cür avantürüst fikirlərdən əsl çəksinlər, Azərbaycanın haqlı tələblərini yerinə yetirsinlər, sülh müqaviləsi ilə bağlı təkliflərini qəbul etsinlər. Azərbaycanın təklif etdiyi şərtlər daxilində regionda sülh mümkündür. Onlar bu sülhə gəlməlidirlər, gələməyəclərsə, Azərbaycan onlarla başqa vasitələrlə danışa bilər.
Şəxsən mən özüm hesab edirəm ki, ermənilər doğrudan da yola gəlməsələr, özlərinin mənfur siyasətlərini davam etdirsələr, Azərbaycan başqa vasitələrə əl atmaq məcburiyyətində qalacaq"-deyə A.Nağı bildirdi.
İradə SARIYEVA
