Baydenin Paşinyana məktubunda dünyanı qorxudan bir cümlə...
Elşad Həsənov: "İşarə edirlər ki, çəkinməyin, arxanızdayıq"
Birləşmiş Ştatlarının prezidenti Cozef Bayden Müstəqillik Günü münasibətilə Ermənistanın Baş nazir Nikol Paşinyana təbrik məktubu göndərib.
Təbrik məktubunda Bayden Ermənistanla bağlı bir sıra məqamlara toxunub: "Xalqlarımız arasındakı dərin əlaqələrə bağlı olaraq, Ermənistan və ABŞ daha yaxşı gələcək qurmaq üçün, o cümlədən əlaqələrimizi strateji tərəfdaşlığa yüksəltməklə birlikdə çalışırlar. Bu, təhlükəsizlik və müdafiə sahəsində tərəfdaşlığımızın gücləndirilməsindən tutmuş təmiz enerji təşəbbüslərimizin sürətləndirilməsinə və ticarətin şaxələndirilməsinə qədər bütün istiqamətlərdə əməkdaşlığımızı inkişaf etdirəcək. ABŞ Ermənistanın suverenliyini, müstəqilliyini, ərazi bütövlüyünü və öz gələcəyini təyin etmək hüququnu dəstəkləyir. Biz regionda davamlı sülhə nail olmaq üçün davamlı öhdəliyinizi dəstəkləyirik".
Göründüyü kimi, Bayden təbrik məktubunda yazır ki, müdafiə və təhlükəsizlik sahəsində münasibətləri strateji tərəfdaşlıq səviyyəsinə çatdırmaq üçün çalışırıq.
Maraqlıdır, bu hansı perspektivdən xəbər verir?
"Baydenin məktubunda müdafiə və təhlükəsizlik sahəsində əksini tapan məqamlar da buna hesablanıb"
Sözügedən məsələyə aydınlıq gətirən siyasi ekspert Elşad Həsənov "Bakı-Xəbər"ə açıqlamasında bununla bağlı bir sıra məqamlara toxundu: "Bütün bunlar Bayden administrasiyasının Ermənistana sevgisindən irəli gəlir. Ötən il Nensi Pelosi İrəvana səfər etdi. Orada bir sıra bəyanatlar verərək bildirdi ki, biz Ermənistana lazımı köməkliyi göstərəcəyik. Təki Ermənistan ABŞ-la strateji tərəfdaşlıq etsin. Eyni zamanda Ermənistana lazımı yardımlar edəcəyik ki, bu ölkə öz təhlükəsizliyini təmin etsin. Açıq dedi ki, təhlükəsizlik məsələlərində lazım olan köməkliyi göstərəcəyik. Bundan sonra da ard-arda ABŞ rəsmilərinin Ermənistana səfərləri oldu, o cümlədən, Dövlət Departamentinin rəsmiləri mütəmadi olaraq İrəvana səfərlər etməyə başladılar. O cümlədən, bu ilin 5 aprelində Bresseldə ABŞ Avropa İttifaqı ilə birlikdə Ermənistana yardım edəcəkləri ilə bağlı ortaq mövqedən çıxış etdilər. Eyni zamanda, ABŞ Ermənistanla bu il ikinci birgə hərbi təlimlər keçirdi. Birləşmiş Ştatların strateji planı odur ki, Cənubi Qafqazda yerləşsin və regiondan Rusiyanı sıxışdırıb çıxarsın. Artıq buna da 50 faiz nail olub. Çünki ABŞ-ın təsiri ilə Ermənistan İrəvanda "Zvartnots" hava limanından Rusiya sərhədçilərini çıxarıb. ABŞ-ın növbəti məqsədi odur ki, Gümrüdəki 102-ci hərbi baza oradan çıxarılsın. Baydenin məktubunda müdafiə və təhlükəsizlik sahəsində əksini tapan məqamlar da buna hesablanıb. İşara edirlər ki, çəkinməyin, arxanızdayıq. Ən son məlumatlara görə, ABŞ-ın Ermənistandakı səfirliyinin əməkdaşlarının sayı 3200 nəfərdir. Bu, çox böyük rəqəmdir. Nəzərə almaq lazımdır ki, Rusiyanın Ermənistandakı hərbi bazalarında rus əsgərlərinin sayı 5 min nəfərdir. Bütün bunlar onu deməyə əsas verir ki, ABŞ bundan öz məqsədlərinə çatmaq üçün istifadə edəcək".
Vidadi ORDAHALLI
