Sentyabr ayının 1-də Azərbaycanda növbədənkənar parlament seçkiləri keçiriləcək. Avqustun 9-dan başlayaraq növbədənkənar parlament seçkiləri ilə əlaqədar seçkiqabağı təşviqat kampaniyasına start verilib.
"Milli Məclisə növbədənkənar seçkilərin keçirilməsi üzrə əsas hərəkət və tədbirlərin Təqvim Planı"na əsasən, təşviqat kampaniyası avqustun 31-dək davam edəcək. Təşviqat üçün ölkə üzrə 3259 açıq, 1854 qapalı yer ayrılıb.
Seçkiqabağı təşviqatın aparılması qeydə alınmış namizədlər, onların səlahiyyətli nümayəndələri və vəkil edilmiş şəxsləri, namizədi qeydə alınmış siyasi partiyalar, siyasi partiyaların blokları, onların səlahiyyətli nümayəndələri və vəkil edilmiş şəxsləri tərəfindən həyata keçirilə bilər. Bununla yanaşı, qanunvericiliyə görə, növbədənkənar seçkilərdə seçkiqabağı təşviqat aparmaq məqsədilə ölkə üzrə birmandatlı seçki dairələrinin 60-dan çoxunda namizədləri qeydə alınmış siyasi partiyalara, siyasi partiyaların bloklarına dövlət büdcəsindən maliyyələşən bir sıra media subyektlərində ödənişsiz efir vaxtı və dərc üçün yer ayrılacaq.
Bunlar İctimai Televiziya və Radio Yayımları Şirkəti, "Azərbaycan" qəzeti, "Xalq qəzeti", "Respublika" qəzeti, "Bakinski raboçi" qəzetidir.
Hiss olunur ki, hazırda deputatlığa namizədlərin əksəriyyəti öz auditoriyalarına müraciət üçün daha çox sosial şəbəkələrdən istifadə etməkdə maraqlıdır. Burada qəribə heç nə yoxdur. Çünki artıq seçkilər də müasir texnologiyaların inkişafı ilə ayaqlaşır. Əvvəllər namizədlər seçiciləri ilə görüşlər keçirir, televiziya və qəzetlər vasitəsilə təbliğat-təşviqat fəaliyyətini yerinə yetirirdi. İndi isə auditoriyaya müraciət forması köklü formada dəyişib. Artıq sosial şəbəkələr nəinki ənənəvi mətbuatı, hətta bir sıra internet KİV-ini də qabaqlayır.
Bu tendensiyanı nəzərə alan "Bakı-Xəbər" Media Qrupunun rəhbəri Aydın Quliyev ölkədə ilk sayılan çox maraqlı təşəbbüslə çıxış etdi. A.Quliyev öz sosial şəbəkə hesabında seçkidə rəsmi qeydiyyata alınan namizədlərə maraqlı müraciət etdi. Sitat: "Bütün namizədlərə "Bakı-Xəbər"in "YouTube" kanalında istədiyi alternativini ödənişsiz birbaşa debata dəvət etmək imkanı verirəm.
İstəyən buyursun…"
Aydın Quliyev bunu deyəndə həm də ən müasir avadanlıqlarla təchiz edilmiş "Bakı-Xəbər"in studiyasından ödənişsiz istifadəni və həmin materialların kanalda yayılmasını kompleks nəzərdə tutur. Artıq bu təşəbbüsə cəmiyyət tərəfindən müsbət reaksiyalar gəlməkdədir. Hətta rəsmi qeydiyyata alınan namizədlərin özləri belə müraciətə müsbət reaksiyalar veriblər.
Deputatlığa namizəd Zöhrab Məmmədov yazır:
"Aydın müəllim salam. Mən Məmmədov Zöhrab 57 saylı dairədən namizədəm. Həmin dairədən Ağalar Vəliyevi debata dəvət efirəm. Mob 0553989266".
Deputatlığa namizəd Anar Əliyev:
"Salam, Aydın müəllim! Yaratdığınız platformaya görə təşəkkür edirəm və 85 saylı Füzuli-Ağcabədi seçki dairəsindən bütün namizədləri - rəqiblərimi açıq debata, müzakirələrə dəvət edirəm. Sizdən də xahiş edirəm, belə bir debata çağırış edəsiniz!
Hörmətlə,
Anar Əliyev, politoloq".
Namizədliyi qeydə alınan Çingiz Şahbazlı isə bunları qeyd edir:
"Salam Aydın müəllim. Mən 58 saylı Xaçmaz kənd seçki dairəsindən deputatlığa namizəd Çingiz Şahbazi, 58 saylı Xaçmaz kənd seçki dairəsindən deputatlığa namizədlərin hər biri ilə, xüsusilə də elə bu dairədən deputat olmuş və yenidən namizəd olaraq bütün inzibati resurslar hesabına kampaniya aparan Sevil xanimla depata hazıram".
Yaxşı olardı ki, debat çağırışı ilə rəqiblərinə çağırış edən namizədlərin alternativləri bu təşəbbüsə qoşulsunlar ki, seçki marafonuna rəng qatmış olsunlar. Çünki bir nəfərlə debat olmur.
Məhəmmədəli QƏRİBLİ
