Abutalıb Səmədov: "Tehran şəhərinin meri Əlirza Zəkani də öz fəaliyyəti baxımından digərlərinə nisbətən daha çox şanslı görünür"
İranın növbəti Prezidenti 6 nəfərdən biri olacaq. Siyahı konkretləşib.İran Konstitusiyasının Keşikçilər Şurası prezident seçkilərində iştirak edə biləcək 6 şəxsin namizədliyini təsdiqləyib. Bu barədə İran mətbuatı məlumat yayıb.
Bildirilir ki, növbədənkənar prezident seçkilərdə aşağıdakı şəxslər namizəd kimi iştirak edə biləcəklər:
Məclisin (parlamentin) sədri Məhəmməd Baqir Qalibaf,
Tehran şəhərinin meri Əlirza Zəkani,
İran Təhlükəsizlik Şurasındakı ruhani liderin nümayəndəsi Səid Cəlili,
Prokuror və keçmiş ədliyyə naziri Mostafa Purmohammadi,
Məclis sədrinin keçmiş müavini Əmir Hüseyn Qazizadə Haşimi,
Parlament üzvü Məsud Pezeşkian.
Bu 6 nəfərdən hansının prezident seçilmək şansı daha çoxdur və niyə?
Müstəqil siyasətçi Abutalıb Səmədov "Bakı-Xəbər"ə açıqlamasında bildirdi ki,
ABŞ - da xeyli müddətdir, prezident seçkiləri kampaniyası keçirilir: "İki real namizəd var. Onlar çıxışlar edirlər, müxtəlif məsələlərə münasibət bildirirlər. Hər ikisi tanınan adamdır. Biri hazırki, biri də ondan əvvəlki prezidentdir. Ölkədə rəy sorğuları keçirilir və keçirilən rəy sorğularında Trampın öndə olduğu göstərilir. Təcrübə də onu sübut edir ki, ABŞ - da sorğular keçirən mərkəzlər nadir hallarda ciddi şəkildə yanılırlar. Ona görə də, təbii ki, ABŞ - da olacaq prezident seçkiləri və onun nəticələri barədə rəy demək asandır. İranda prezident qəza nəticəsində həlak oldu. Qısa müddətdə yeni seçkilər keçiriləcək. Namizədlər müəyyənləşib. Ola bilər ki, onları İranda müəyyən qədər tanıyırlar. İrandan kənarda onların gördüyü işlər, müxtəlif məsələlərə münasibəti, onların reytinqi barədə elə bir məlumat yoxdur. Bu səbəbdən İranda prezident seçkilərində kimin qalib gələcəyini söyləmək kənar müşahidəçi üçün çox çətindir. İran demokratik dövlətdirmi? Müəyyən elementlər var. Onları inkar etmək olmaz. Ancaq namizədlər süzgəcdən keçiriləndən sonra müəyyənləşdiyinə görə, onların hansının seçiləcəyini indiki halda demək çox çətindir və qeyri - ciddi yanaşma olardı. Ancaq bundan sonra da bir müddət müşahidəyə ehtiyac var. Namizədlərin siyahısına baxarkən diqqəti daha çox cəlb edən ruhani liderin təhlükəsizlik şurasında olan nümayəndəsi Səid Cəlilidir. Ruhani liderin İrandakı çəkisi və İranda söz sahibi olması məlumdur. Onun nüfuzu da danılmazdır. Bu səbəbdən məndə onun şansının daha çox olduğu təsəvvürü yaranır. Digər tərəfdən Tehran şəhərinin meri Əlirza Zəkani də öz fəaliyyəti baxımından digərlərinə nisbətən daha çox şanslı görünür. Çünki, böyük və milyonlarla əhalisi olan bir şəhərin meridir. Onun gördüyü işlər, onun fəaliyyəti prezident seçkilərində qalib gəlməyə imkan verə bilər. Düşünürəm ki, digərlərinin şansı o qədər də yüksək deyil. Ancaq əvvəlcədən proqnoz vermək çox çətindir. Təbiidir ki, bu proqnozların doğru çıxmaq ehtimalı da çox aşağıdır. Hər halda əsas məsələ odur ki, keçmiş prezidentin gətirdiyi son nöqtədən Azərbaycanla İran münasibətləri davam etdirilsin, Azərbaycanla İran arasında dostluq münasibətlərinin formalaşması və ya qorunması üçün yeni seçilən prezident əlindən gələni etsin, qarşıdurmaya getməsin, kəskin bəyanatlar verib münasibətləri daha da pisləşdirməyə çalışmasın. Dövlət başçımızın dediyi kimi, Azərbaycanla İranın münasibətlərinə heç bir kənar qüvvənin müdaxilə etmək şansı olmamalıdır".
Məhəmmədəli QƏRİBLİ
