Məhəmməd Əsədullazadə: “Hər halda, artıq YPG təşkilatı müstəqil şəkildə fəaliyyət göstərməyəcək”
Suriyada Türkiyənin təsir imkanları böyük olsa da, son bir ayda Suriyada baş verənlər diqqət çəkir. 1.Martın 10-da ABŞ-ın vasitəçiliyi ilə Suriya rəhbəri Əhməd əş-Şaraa və “Suriya Demokratik Qüvvələri”nin komandiri Mazlum Abdi arasında imzalanan anlaşmaya əsasən PKK-nın Suriya qolu YPG-nin Suriya ordusunun tərkibinə keçəcəyi elan edildi.
Bununla da Türkiyənin terror təşkilatı saydığı silahlı struktur bir anda leqal (qanuni) status qazanmış oldu. Əslində YPG buraxılsaydı bu, Türkiyənin mənafeyinə uyğun olardı. Ancaq YPG buraxılmadı və Suriya hökumətində yer almaq imkanı əldə etdi. 2.Suriyada qurulan yeni hökumətdə ölkədəki bütün etnik-dini qrupların təmsilçiləri yer aldığı halda, türkmənlərin nümayəndəsinə yer verilmədi. Türkmənlər bundan ciddi şəkildə narazı qalıb. 3.Aprelin 2-də İsrail Suriyanın Hama, Homs və Şam şəhərləri ətrafındakı hərbi infrastruktura zərbələr endirdi. Bombalanan obyektlər arasında Tiyas (T4) aviabazası da var. Halbuki, Türkiyənin burada aviabaza yaratmaq niyyəti var. Maraqlıdır, Suriyada Türkiyə maraqlarına qarşı nə baş verir?
“Türkmənlərin Suriya hökumətində yer almamaq məsələsinə gəldikdə isə, burada müəyyən narahatlıq var”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Suriyada YPG terror təşkilatının Suriya ordusunun tərkibinə keçməsi əlbəttə ki, sıradan bir hadisə deyil: “Fikrimcə, burada Türkiyənin də mövqeyi nəzərə alınıb. Hər halda artıq YPG təşkilatı müstəqil şəkildə fəaliyyət göstərməyəcək. Çünki faktiki olaraq Suriya ordusunun tərkibinə qatılıblar. Bu baxımdan sözügedən məsələdə elə bir narahatçılıq görmürəm. Türkiyə tədricən prosesi öz nəzarətinə alacaq. Digər tərəfdən, İsrail bir sıra yerləri vursa da, Türkiyənin Suriyada hərbi baza yaratmasına mane ola bilməyəcək. Çünki Türkiyə ilə hesablaşmaq məcburiyətindədilər, başqa yol yoxdur. Bir şeyi nəzərə almaq lazımdır ki, artıq ABŞ İsrailin Suriyada əməliyyatlar keçirməsinə icazə vermir. Çünki əks təqdirdə İsrail Türkiyə ilə toqquşmalı olacaq. Türkmənlərin Suriya hökumətində yer almamaq məsələsinə gəldikdə isə, burada müəyyən narahatlıq var. Artıq Türkiyə xarici işlər naziri Hakan Fidan Suriya türkmənləri ilə bağlı ortaya mövqe qoyub. Bu məsələ gərək öz həllini tapsın. Çünki Suriyada yeni hakimiyyətin qurulmasında türkmənlərə haqsızlıq edildi. Gərək onlara yer veriləydi. Çünki Suriyada milyonlarla türkmən yaşayır. Hesab edirəm ki, Türkiyə bu məsələdə aktivliyini artırmalıdır. Suriyada türkmən xalqını görməzdən gəlmək olmaz. Artıq türkmənlər buna öz etirazını bildirib. İsrail çox çalışdı ki, Türkiyəni Suriyada bloklasın, amma alınmadı. Ona görə də hesab edirəm ki, nə qədər çalışsalar da Türkiyəni Suriyada sıxışdıra bilməzlər”.
Vidadi ORDAHALLI
