Yazıya başlamazdan əvvəl oxucuları ermənilərin xislətini özündə dürüst ehtiva edən bir zərb-məsəllə tanış etmək istəyirik. Erməniyə deyirlər ki, sən bizdən nə diləsən verəcəyik, amma bir şərtlə ki, sənə verilənin iki qatını türklərə verəcəyik. Erməni isə dərin düşüncədən sonra deyir ki, gəlin gözümün birini çıxarın! Bu zərb-məsəl el arasında "gəl gözümün birini çıxar" kimi lakonik forma alıb, paxıl və xain adamların hərəkətlərinə ictimai qınağı özündə ifadə edir.
İndi ermənilər Azərbaycan xalqına və dövlətinə ziyan vurmaq üçün çox geniş çeşidli "intellektual tryuklar" düşünür. Amma unudurlar ki, dünya yalnız ermənilikdən ibarət deyil və hər kəs öz maraqlarına uyğun qərar verir. Ağıllı hökumətlər bu maraqlardan bəhrələnmək, ermənilər isə Azərbaycana yalnız zərər vurmaq yollarının axtarışındadırlar...
ABŞ-ın dövlət EXIM Bankının direktorlar şurası Azərbaycanın “Silk Way” aviaşirkətinə “Boeing” təyyarələrinin alınması üçün 339 milyon dollar kredit ayrılmasını təsdiqləyib. Təyyarə 2026-cı ilin yayına qədər təhvil veriləcək. Ermənilərin uydurmasına görə, “Silk Way” təyyarələrinin silah daşınmasında iştirak etməsi Amerika tərəfinin krediti təsdiqləməsinə mane olmayıb.
EXIM Bankın (ABŞ İxrac-İdxal Bankı) “Silk Way” üçün “Boeing”i maliyyələşdirməsi haqqında ilk məlumat yanvarın əvvəlində ortaya çıxıb. Bank sövdələşmənin maliyyələşdirilməsi ilə bağlı ictimai rəyləri toplayırdı. Tərəflər tədarük edilən təyyarələrin sayını açıqlamayıblar. Bu əməliyyatlarda bir halda İspaniya bankı Santander, digər halda isə ABŞ-ın Özəl İxrac Maliyyə Korporasiyası (PEFCO) zamin kimi çıxış edib. “Azadlıq Radiosu”nun sorğusuna cavab olaraq, Santander sövdələşmədəki rolunu şərh etməkdən imtina edib.
“Silk Way”ın kredit sövdələşməsinə bank məsləhətçisi David Qolden, EXIM-in nəqliyyat üzrə vitse-prezidenti David Fiori və eyni departamentdə kredit mütəxəssisi Şeril Konlin nəzarət edirdi. 2021-ci ilin aprelində “Silk Way” şirkəti ABŞ-ın Bakıdakı Səfirliyi tərəfindən təşkil edilən virtual forumda iştirak etdi. Bu forumda Amerika rəsmiləri və iş adamları logistika məsələlərində Amerika texnologiyalarını və maliyyə imkanlarını təqdim etdilər. Müzakirə zamanı Türkiyə və Gürcüstan rəsmiləri regional “Şərq-Qərb tranzit dəhlizi və ABŞ-ın ticarət həlləri” haqqında danışıblar. 2017-ci ildə Şeril Konlin ABŞ-ın Azərbaycandakı Ticarət Palatasının təşkil etdiyi tədbirdə də iştirak edib və EXİM-in Azərbaycan şirkətləri ilə həyata keçirdiyi proqramlardan danışıb. Keçən ilin noyabrında EXIM nümayəndələri COP29-da iştirak etmək üçün Bakıya səfər ediblər. Bu ilin əvvəlindən başlayaraq Ermənistan hökuməti və müxtəlif ölkələrdə yerləşən erməni diaspora təşkilatları EXIM Banka kütləvi müraciətlər ünvanlamağa başladılar ki, guya “Silk Way” aviaşirkəti Azərbaycana yalnız silah daşıyır, ona görə də bu şirkətə yeni “Boeing” təyyarələrinin alınması üçün kredit vermək olmaz. Halbuki Azərbaycana məxsus “Silk Way” aviaşirkəti daha çox beynəlxalq mülki yükdaşımalarda və qismən sərnişin daşıma reyslərində aktiv iştirak edir. “Silk Way” beynəlxalq hava logistikasının artıq bir hissəsinə çevrilib. Bunu Amerika hökuməti ermənilərdən daha yaxşı bilir. Ona görə də ermənilərin kütləvi müraciətinə baxmayaraq, EXIM Bank “Silk Way”a nəzərdə tutulan kreditin ayrılmasına qərar verib. Digər tərəfdən, prezident Donald Trampın əsas məqsədi ABŞ iqtisadiyyatının dirçəldilməsidir. Sözügedən əqd isə Amerika şirkətlərinə ikitərəfli fayda verir. Bir tərəfdən ABŞ-a məxsus EXIM Bankı kredit verməklə divident qazanır, digər tərəfdən yenə Amerikaya məxsus “Boeing” şirkətinin təyyarələri satılır və şirkət buradan öz mənfəətini götürür. Bir əqdlə Amerika iqtisadiyyatı iki istiqamətdə milyonlarla divident əldə edir. Hətta, Tramp dönəmi olmasa da belə, Amerika bu cür ikitərəfli milyonlar qazandıran əqddən vaz keçməzdi.
EXIM Bank “Silk Way”a kredit vermənin risqləri ilə bağlı “Azadlıq Radiosu”nun sorğularına cavab olaraq bildirib: "EXIM-in məqsədi ABŞ istehsalı olan mal və xidmətlərin alınmasını asanlaşdırmaq üçün kreditlər, zəmanətlər və yaxud sığorta təmin etməklə Amerika iş yerlərini dəstəkləməkdir. Silk Way Airlines və EXIM arasında əməkdaşlığın mahiyyətinə gəlincə, qeyd edirik ki, Silk Way West Airlines Amerika istehsalı olan təyyarələrin icarəçisi və son istifadəçisi, həmçinin kreditin ödənilməsi mənbəyi olacaq. EXIM bu kreditlər üçün zamin rolunu oynayacaq”.
Akif NƏSİRLİ
