Xəqani Cəfərli: "Bütövlükdə Azərbaycana qarşı ciddi təzyiqlərin edilməsi üçün erməni diasporunun arzuladığı əlverişli şərait mövcud deyil"
Erməni müxalifəti və diasporu Azərbaycanda mühakimə edilən erməni əsilli cinayətkarların mühakimədən yayındırılması üçün hər cür əmələ əl atırlar. Birincisi, onlar beynəlxalq ictimaiyyətə təqdim etmək istəyirlər ki, guya Azərbaycan hökuməti qərəzli olaraq, bu adamları erməni etnosuna aid olduqlarına görə mühakimə edir.
İndiyə qədər Azərbaycan hökuməti erməni əsilli minlərlə hərbi və mülki əsiri təmənnasız olaraq Ermənistan tərəfinə təhvil verib. Azərbaycan hökumətinin belə bir məqsədi olsaydı, həmin əsirləri də qarşı tərəfə təhvil verməzdı, onları da müttəhimlər kürsüsünə əyləşdirərdi, mühakimə edərdi. Amma belə bir hal olmayıb.
Digər tərəfdən, Laçın dəhlizindəki yoxlama-buraxılış məntəqəsindən minlərlə erməni keçib. Onlar hamısı bir neçə dəqiqəlik yoxlamadan sonra yoluna davam edib. Bu gün Azərbaycanda ittiham edilən, müttəhimlər kürsüsündə əyləşən ermənilər haqqında isə Azərbaycan hüquq-mühafizə orqanları tərəfindən illər əvvəl cinayət işi açılıb, hətta, bəziləri haqqında qiyabi həbs qətimkan tədbiri seçilib. Hələ Azərbaycan hüquq-mühafizə orqanları tərəfindən haqqında cinayət işi açılan minlərlə Ermənistan vətəndaşı var ki, Paşinyan hökumətinin "ayı xidməti" sayəsində azadlıqda gəzir. Həttə, bu cür ağır cinayətlərdə suçlanan şəxslərə qəhrəman kimi heykəllər qoyulub, qəhrəman adları verilib, orden və medallarla təltif olunublar. Bu insanlar Azərbaycan hökuməti tərəfindən ağır cinayətlərdə şübhəli bilinir və onlar ilk fürsətdə həbs olunaraq ədalət məhkəməsinin mühakiməsinə təqdim ediləcəklər.
Belə də isə “Daşnaksütyun” Bürosunun Mərkəzi Aparatı Azərbaycanda saxlanılan erməni əsilli cinayətkarların azad edilməsi tələbi ilə ATƏT-in yüksək rütbəli rəsmilərinə petisiya göndərib.
Erməni diasporunun bu cür təxribat xarakterli müraciətləri hansısa nəticəyə gətirib çıxara bilərmi?
Məsələyə münasibət bildirən politoloq Xəqani Cəfərli dedi ki, erməni diasporunun, xüsusilə də “Daşnaksütyun” Partiyasına bağlı qüvvələr özlərinin varlığını və erməni cəmiyyəti üzərində təsir imkanlarını saxlamasının əsas vasitəsi Azərbaycan və Türkiyə əleyhinə düşmənçilikdir: "Son illər erməni lobbisinin təsir gücü azaldığına görə bunu daha çox fəallıq göstərməyə çalışmaqla kompensasiya etmək, pərdələmək istəyirlər. ATƏT-in rəsmi şəxslərinə müraciət də bu qəbildəndir. Müraciət müəlliflərinin bu təşəbbüsü Azərbaycana qarşı ciddi təzyiq yaradacağı ehtimalı azdır. Əlbətdə, bölgədə marağı olan və yeni dünya düzənində Cənubi Qafqazda öz maraqlarını təmin etmək istəyən dövlətlər belə müraciətlərdən faydalanmağa çalışa bilərlər. Ancaq bütövlükdə Azərbaycana qarşı ciddi təzyiqlərin edilməsi üçün erməni diasporunun arzuladığı əlverişli şərait mövcud deyil. Əksinə, beynəlxalq şərait indi Azərbaycanın maraqlarına daha çox uyğundur. Belə ki, ABŞ Avropadan çəkilməyə başlayıb. Rusiya Ukraynada müharibə bataqlığına düşüb və nə zaman çıxacağı məlum deyil. Hətta, müharibəyə son qoyulsa belə, Rusiya beynəlxalq münasibətlərdə əvvəllər sahibləndiyi gücünü və mövqeyini artıq itirib. Avropa isə ABŞ və Rusiya ilə rəqabətə davam gətirməyə çalışır və Azərbaycana ciddi ehtiyacı var. Digər beynəlxalq təşkilatlar kimi ATƏT də böhran keçirir və gələcəyi müəyyən deyil. Bütün bunlar onu deməyə əsas verir ki, erməni lobbisinin son təşəbbüsü də ciddi nəticələr doğura bilməz".
Akif NƏSİRLİ
