Bəhruz Quliyev: “Ştaynmayerin bu açıqlaması, bir növ Ermənistanı sülhə sövq edən mesajdır”
Almaniya Prezidenti Frank-Valter Ştaynmayer mətbuata bəyanatında bildirdi ki, əminəm Ermənistan Əliyevin dediyi o 2 sülh şərti ki var, onları yerinə yetirəcək:
“Son üç onillik ərzində bu münaqişəni, onun kəskinləşməsini və yaratdığı əzab-əziyyətləri, eləcə də xeyli qurbanlara səbəb olmuş müharibələri müşahidə edən hər bir insan başa düşür ki, bu cür münaqişənin həlli, eləcə də tərəflər arasında qarşılıqlı etimadın bərpası üçün xeyli vaxt və səy tələb olunur. Hazırkı dövrdə razılığı əldə etmək çox böyük işdir. Ümidvaram ki, həmin müqaviləyə əlavə olaraq cənab Prezident Əliyevin indicə qeyd etdiyi şərtlər üzərində də razılaşma olacaq. Fikrimcə, onlar Azərbaycanla Ermənistan arasında davamlı sülhün əldə olunmasında maneəyə çevrilməməlidir. Təkrar edirəm, çox önəmli qətiyyət var, vacib an yetişib, onun ritmini itirmək məsuliyyətsizlik olardı”.
Çox maraqlı yanaşmadır. Necə deyərlər, Ştaynmayer bir növ Əliyevin 2 şərtinə görə üzərinə məsuliyyət götürdü.
“O, faktiki olaraq Ermənistanın Prezident Əliyevin irəli sürdüyü iki sülh şərtini yerinə yetirəcəyinə əmin olduğunu bildirib”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, bu bəyanat bir neçə baxımdan diqqətçəkəndir: “Ümumiyyətlə qeyd etmək istəyirəm ki, Almaniya prezidenti Frank-Valter Ştaynmayerin budəfəki səfəri səmərəli və yaddaqalandır. Görüşlərdə səslənən müxtəlif fikirlər həm Almaniyanın, həm də Avropa İttifaqının mövqeyini ifadə edir. Almaniya prezidentinin sözügedən bəyanatı çox maraqlı siyasi mesaj daşıyır. O, faktiki olaraq Ermənistanın Azərbaycan Prezidenti İlham Əliyevin irəli sürdüyü iki sülh şərtini yerinə yetirəcəyinə əmin olduğunu bildirib. Bu bəyanat bir neçə baxımdan diqqətçəkəndir. Belə ki, Ştaynmayer bu çıxışı ilə Qərbin, xüsusən də Almaniyanın, Cənubi Qafqazdakı sülh prosesinə maraq göstərdiyini nümayiş etdirir. Bu, Azərbaycanın mövqeyinin beynəlxalq arenada daha geniş qəbul edildiyini göstərir. Onun sözlərindən belə çıxır ki, Ermənistanın Əliyevin şərtlərinə əməl edəcəyi artıq bir reallıq kimi qəbul edilir. Yəni Ermənistan üçün artıq alternativin olmadığını diplomatik dildə ifadə edir. Ştaynmayer, bir növ, prosesin uğurlu nəticələnməsi üçün Qərbin də məsuliyyət daşıdığını və proseslərin mərkəzində olduğunu göstərmək istəyir. Bu, eyni zamanda, Ermənistana psixoloji təzyiq vasitəsi kimi görünə bilər, yəni əgər bu şərtlərə əməl olunmasa, beynəlxalq ictimaiyyət bunu Ermənistanın sülhə mane olması kimi dəyərləndirə bilər. Almaniya prezidentinin “Ritmin itirilməməsi” mesajı isə fürsəti əldən buraxmamaq anlamına gəlir. O, sülh prosesində yaranmış fürsətin itirilməsinin məsuliyyətsizlik olduğunu vurğulayır. Bu da o deməkdir ki, Qərb bu məsələnin uzadılmasını istəmir və tezliklə konkret nəticələr görmək istəyir. Sonda qeyd etmək lazımdır ki, bu bəyanat Azərbaycanın mövqeyini gücləndirən bir mesajdır. Ermənistan isə artıq açıq-aşkar bir seçim qarşısındadır: ya Azərbaycanın şərtlərini qəbul edib sülhə gedəcək, ya da beynəlxalq dəstəyini daha da zəiflədəcək. Ştaynmayerin bu açıqlaması, eyni zamanda, bir növ Ermənistanı sülhə sövq edən mesajdır”.
Vidadi ORDAHALLI
