Arzuxan Əlizadə: "Ermənistanda rəsmi səfərdə olan prezident erməni katolikosunun müraciətinə cavab verməməklə diplomatik dildə ona cavab vermiş sayılır"
Digər ölkə rəhbərləri kimi Ermənistanın katolikos II Qaregin Almaniya prezidenti Frank-Valter Ştaynmayeri də İrəvana səfəri zamanı təxribata çəkib.
Belə ki, Almaniya prezidenti Frank-Valter Ştaynmayer martın 30-31-də Ermənistanda işgüzar səfərdə olub. Ardınca isə o, Azərbaycana səfər edib.
Ştaynmayerin Ermənistana səfəri zamanı katolikos II Qaregin prezidentin Azərbaycana gözlənilən səfərini nəzərə alaraq, Bakıda "Artsax xalqının ədalətli hüquqları", habelə "erməni hərbi əsirləri"n azad edilməsi, "erməni mənəvi və mədəni irsinin" qorunması məsələsini qaldırmaq xahişi ilə ona müraciət edib.
Lakin Almaniya prezidenti bu müraciətə heç bir reaksiya verməyib. Əslində Ştaynmayerin buna dərhal reaksiyası ola bilərdi, amma çox təəssüf ki, biz bunu müşahidə etmədik. Prezident əslində belə şəraitdə hansı mövqedən çıxış etməli idi?
Baki-xeber.com-un suallarını cavablandıran deputat, AMİP sədri Arzuxan Əlizadə bildirdi ki, ermənilərin bu cür təxribatları bundan sonra da davam edəcək: "Əslində erməni kalolikosunun müraciətinə Almaniya prezidentinin reaksiya verməməsi elə ona tutarlı cavabdır. Əlbəttə, biz istərdik ki, prezident ədalətli mövqedən çıxış edərək, kakolikosu birdəfəlik yerində oturdaydı. Amma nəzərə almaq lazımdır ki, bir diplomatik etiket qaydaları da mövcuddur. Ermənistanda rəsmi səfərdə olan prezident erməni katolikosunun müraciətinə cavab verməməklə diplomatik dildə ona cavab vermiş sayılır. Çünki müraciəti reaksiyasız buraxmağın özü də bir cavabdır. Bu katolikosun müraciətinin konkret olaraq prezident üçün əhəmiyyətsiz bir məsələ olduğu deməkdir. Cavab verməmək o deməkdir ki, Almaniya prezidenti Frank-Valter Ştaynmayer katolikos II Qareginin fikirlərini bölüşmür, onunla razı deyil. Burada prezidentin reaksiya verməsi əlavə şərhlərə səbəb ila bilərdi.
Bu müraciətin cavabı ondan ibarətdir ki, Qarabağ ərazisini ermənilərin könüllü tərk etməsini bütün dünya dəqiq bilir. Köç edən əhalidən alınan müsahibələr bunun bariz nümunəsidir. Onlar açıq şəkildə bəyan edirdilər ki, azərbaycanlılarla birgə yaşamaq istəmirlər, azəbaycanlılara qarşı etdikləri hərəkət və əməllərdən xəcalət çəkirlər. Ona görə də Qarabağı tərk edirlər.
Azərbaycan mediası ermənilərin köçünü demək olar ki, anbaan çəkdi və dünyaya yaydı. Hətta, bunun ardınca Nikol Paşinyan da etiraf etdi ki, dinc əhaliyə qarşı zorakılıq edilməyib və silah tətbiqi olmayıb. Dinc əhaliyə qarşı zor tətbiq edilməyibsə, bu halda etnik təmizləmədən söhbət gedə bilməz. Bu Ermənistanın birinci şəxsi səviyyəsində etiraf edilirsə, digər bu barədə danışanların sözləri boşboğazlıqdan başqa bir şey deyil.
Qarabag əhalisinə Azərbaycan hökuməti erməni dilində müraciət etdi ki, getmeyin, sizin təhlükəsizliyinizə öz vətəndaşlarımız kimi zəmanət veririk. Amma onlar Ermənistanı seçdilər. Əhalinin ərazini tərk etməsində seperatçilərın xüsusi rolu oldu. Əhali etiraf edirdi ki, bizə köçmək əmri verildi. Onlar Azərbaycan vətəndası olmaq istəmədilər. İnsanların yaşayış yeri seçmək hüququ var və bu normal bir şeydir. Qarabağ Azərbaycan ərazisidir, burada yaşamaq istəyən Azərbaycan dövlətinin vətəndaşlığını qəbul etməlidir, ölkə qanunlarına tabe olmalıdır. Bunu Ştaynmayer də bilir, üztəgəl, artıq ermənilərin son illər uydurduğu "Artsax" adlı qurum da yoxdur.
O ki qaldı Azərbaycanda mühakimə olunan erməni əsilli seperatçılara, onlar erməni olduqlarına görə mühakimə edilmir. Onlar insanlığa qarşı cinayət törətdiklərinə görə mühakimə edilir. Yenə qeyd edirəm ki, Azərbaycan mediası Qarabağdan çıxan hər bir erməninin hərəkətini, fikrini və mövqeini fiksasiya edib. Laçin dəhlizindəm on minlərlə erməni keçib. Biz etnik erməniləri mühakimə etmək fikrində olsaydıq, onların hamısıni mühakimə edərdik. Bizim belə bir fikrimiz olmayıb və yoxdur. Mühakimə edilənlər erməni əsilli olmaqla yanaşı, həm də Azərbaycan xalqına ve dövlətinə qarşı qatı cinayət törətməkdə sübhəlidirlər və onlar ədalət məhkəməsindən layiqli cəzalarını alacaqlar.
Sonda qeyd edək ki, Almaniya prezidenti Ştaynmayerin katolikos II Qareginin müraciəti ilə bağlı Azərbaycan hökuməti qarşısında heç bir məsələ qaldırmaması, onun bu müraciəti cavabsız buraxmasının nə demək olduğunu bir daha təsdiqlədi".
Ermənilər Qarabağda "erməni mənəvi və mədəni irsi" deyəndə nəyi nəzərdə tutduqları anlaşılmır. Qarabağda həqiqi abidələr Azərbaycan xalqına və albanlara məxsusdur. Onlar da yüksək səviyyədə qorunur.
İşğal dövrü ərzində inşa edilən cinayetkarlara məxsus və saxta heykəlciklərə gəlincə, onlar artıq çoxdan sökülüb və onlar heç bir xalqın mədəni irsi ola bilməz. Çünki onların hamsı son 30 ildə saxtakarcasına hazırlanıb və ya inşa edilib. Təsadüfi deyil ki, Qarabağda ermənilərin saxta "tarixi abidələr" hazırlayan sexi aşkarlanıb.
Hətta, Ermənistanda ucaldılan buna bənzər heykəlciklər də nə vaxtsa söküləcək, cinayetkarlar və terrorçular cəmiyyətə öz adı ilə tanıdılacaq. Hazırda ermənistanda onlarla insanlığa qarşı cinayet törətmiş şəxslərin heykəli və ya büstü var. Onlar hamısı sökülməli, cinayətkar və terrorçu şəxslərin iç ücü cəmiyyətə açılıb göstərilməlidir.
Dəniz NƏSİRLİ
