Rəşad Bayramov: “Düşünmürəm ki, yeni kansler olacaq Fridrix Merts başqa dövlətlərin daxili işinə müdaxilə etsin”
Angela Merkelin kanserliyi dönəmində (2005-2021)Almaniya-Azərbaycan münasibətləri yaxşı olub. Hətta 2019-cu ildə Merkel çıxışların birində dolayı və üstüörtülü olaraq eyham vurdu ki, Qarabağda erməni separatçılarının arxasında Rusiya olub.
Ancaq 2021-ci ilin sonlarında Merkel gedəndən sonra ASDP-nin timsalında qurulan Almaniya hökuməti ermənilərin maraqlarından çıxış etməyə başladı və bu, bu günə qədər müxtəlif formalarda özünü göstərir. Dəfələrlə alman mediasında Azərbaycanla bağlı qərəzli matereallar dərc edilib, suverenliyimizə qarşı pozucu mövqe sərgilənib.
Müqayisə üçün qeyd edək ki, Merkel Xristian Demokrat Partiyasını təmsil edirdi. Bu dəfə də Almaniyada yeni hakimiyyəti fevralda seçkilərdə qalib gələn XDP qurur, Fridrix Mertsin başçılığı ilə. Maraqlıdır, Olaf Şoltsun kanslerliyi dönəmində Almaniyanın Azərbaycana münasibətdə yeritdiyi səhv siyasətə son qoyulacaqmı?
“Hər halda yeni hakimiyyət fərqində olacaq ki, Cənubi Qafqazın açar və lider dövləti Azərbaycandır”
Sözügedən məsələ ilə bağlı fikirlərini “Bakı-Xəbər”lə bölüşən AMİP Ali Məclisinin sədri Rəşad Bayramov hesab edir ki, birmənalı proqnoz vermək çətin olsa da hər halda münasibətlərin düzələcəyi ilə bağlı ümidlər var: “Bəli, Şolts dönəmində iki ölkə münasibətlərində müəyyən soyuqluq var idi. Almaniyada Azərbaycan əleyhinə səslənən bir sıra siyasi bəyanatlar iki ölkə münasibətlərinə soyuqlaşmasına öz təsirini göstərib. Xüsusən də 2023-cü ilin sentyabrında Qarabağda keçirilən antiterror əməliyyatlarından sonra Azərbaycanın öz suverenliyini tam təmin etməsi Almaniyanın timsalında necə deyərlər xoş qarşılanmadı. Almaniya xarici işlər naziri Analena Berbok ölkəmizin ünvanına qərəzli fikirlərini daha da gücləndirdi. Bəzi alman təmsilçiləri Fransanın, erməni lobbisinin yalanlarına uyaraq Azərbaycanı “etnik təmizləmədə” ittiham etdilər. Halbuki, bunun reallıqla heç bir bağlılığı yox idi. Etnik erməniləri kimsə zor gücü ilə Qarabağdan çıxarmamışdı. Onlar öz xoşu ilə Qarabağı tərk ediblər. XDP-nin ASDP-dən siyasəti fərqli olur. XDP daha çox Almaniya maraqlarının qorunmasına önəm verir. Düşünmürəm ki, yeni kansler olacaq Fridrix Merts başqa dövlətlərin daxili işinə müdaxilə etsin. Hər halda yeni hakimiyyət fərqində olacaq ki, Cənubi Qafqazın açar və lider dövləti Azərbaycandır. Çünki Azərbaycan həm də Avropa İttifaqı ilə Mərkəzi Asiya arasında vacib bir körpüdür. Almaniyanın Orta Asiya ölkələrində böyük iqtisadi maraqlarının olduğunu nəzərə alsaq çox güman ki, yeni hökumət bu amilləri nəzərə alacaq. Yəni Azərbaycana münasibətdə Şolts hakimiyyətinin səhvlərini təkrarlamayacaqlar. Çünki əks təqdirdə bundan Almaniya itirəcək. Nəzərə alsaq ki, Qarabağ məsələsi artıq öz həllini tapıb, hər halda əvvəlki birtərəfli yanaşmalar təkrarlanmayacaq”.
Vidadi ORDAHALLI
