Faiq Ələkbərli: “Erməniləri narahat edən məqamlardan biri odur ki, Azərbaycan Prezidenti erməni faşizminin dəhşətlərini açıb ifşa edir”
“Xirosima atom bombası nəticəsində viran qoyulmuşdu, Ağdamı isə 30 il ərzində oğrular, talançılar, erməni talançılar sökərək daşlarını da aparıb müxtəlif yerlərdə satırdılar”. Bu sözləri Prezident İlham Əliyev Ağdamın Sarıcalı kəndinin birinci mərhələsinin açılışında deyib.
Prezident Əliyev bildirib ki, Ağdam şəhəri, rayonun bütün kəndləri mənfur düşmən tərəfindən tamamilə dağıdılmışdı, bir dənə də salamat bina qalmamışdı: "Bu, bir daha düşmənin xislətini göstərir, bizə tamamilə əsassız olan düşmənçiliyi göstərir. Təsadüfi deyil ki, bəzi xarici ekspertlər, jurnalistlər Ağdama səfər edərkən öz təəccübünü və hətta hiddətini gizlədə bilmirlər. Çünki uzun illər işğal dövründə xarici vətəndaşlar Ağdam bölgəsinə, Ağdam şəhərinə, şəhərdən qalan o yerlərə gələ bilmirdilər. İşğala son qoyulandan sonra həm Azərbaycan vətəndaşları, həm xarici qonaqlar gəlməyə başladılar və gördülər ki, biz hansı düşmənlə üz-üzə idik".
Prezident qeyd edib ki, işğal dövründə şəhər tamamilə sökülüb, yerlə-yeksan edilib və Ağdamı “Qafqazın Xirosiması” adlandırırlar:"Amma fərq ondadır ki, Xirosima atom bombası nəticəsində viran qoyulmuşdur, Ağdamı isə 30 il ərzində oğrular, talançılar, erməni talançılar sökərək daşlarını da aparıb müxtəlif yerlərdə satırdılar. Yəni, bu, misli görünməmiş vəhşilikdir. Mən bunu dəfələrlə demişdim, erməni faşizmi faşizmin ən yüksək nöqtəsidir. Biz Ağdamı yenidən qururuq və quracağıq".
Prezident İlham Əliyevin Ağdamdakı çıxışı Ermənistan mediasında tamamilə təhrif olunaraq təqdim olunur. Azərbaycan Prezidentinin çıxışında tam yerində işlətidiyi, ifadə etdiyi “ mənfur düşmən”, “erməni faşizmi faşizmin ən yüksək nöqtəsidir” kimi fikirlərini erməni mediası belə qələmə verir ki, bu guya ermənilərə nifrət çıxışıdır. Burda ermənilərə nifrət ruhlu nə var ki? Prezident olanı deyir, ermənilərin etdiyi cinayətləri vurğulayır, bildirir ki, ermənilər Ağdamda misli görünməmiş vəhşiliklər törədib, daşı daş üstündə qoymayıb. Bu reallıqdır.
Çox təəssüflər olsun ki, ermənilər bu reallığı qəbul etmək əvəzinə, Azərbaycana qarşı həqiqətə uyğun olmayan iddialar irəli sürürlər.
Ermənilərin Azərbaycan Prezidentinin çıxışı ətrafında belə yanlış rəy yaratması nə ilə bağlıdır?
“Azərbaycan dövləti heç zaman erməni xalqına nifrət siyasəti yürütməyib, irqçilik bizə yaddır, bizi bunda ittiham etmək gülüncdür”
AMEA-nın Fəlsəfə və Sosiologiya İnstitutunun şöbə müdiri, fəlsəfə doktoru, siyasi ekspert Faiq Ələkbərli “Bakı-Xəbər”ə şərhində bildirdi ki, Azərbaycan Prezidentinin Ağdamdakı çıxışı ətrafında erməni mediasının və bəzi erməni siyasilərin yanlış rəy yaratmaq cəhdi qəribə görsənmir, çünki onlar mütəmadi olaraq belə yanlış mövqe sərgiləyirlər. Ermənistanda uzun illərdir irqçi, terror, faşist siyasəti yeridildiyini deyən F.Ələkbərlinin sözlərinə görə, onlar öz adlarını Azərbaycana qoymaq istəyir və əsassız olaraq Azərbaycan hökumətini “irqçi” siyasət yürütməkdə ittiham edirlər. F.Ələkbərli qeyd etdi ki, Azərbaycan dövləti heç zaman diskriminasiya siyasəti yürütməyib, irqi, milli, dini ayrı-seçkilik bizim siyasətə yaddır, bu, Ermənistanın yürütdüyü siyasətdir. “Prezident İlham Əliyevin Ağdamdakı çıxışından ermənilər çox narahat olub. Çünki Azərbaycan Prezidenti çıxışında gerçəyi dilə gətirib, Ağdam şəhərinin ermənilər tərəfindən tamamilə viran qoyulduğunu, hətta Xirosima ilə müqayisədə daha dəhşətli şəkildə yerlə yeksan edildiyini deyib. Gerçəklik budur ki, Ağdam 30 il ərzində tamamilə dağıdıldı, talandı, daşı-daş üstündə qalmadı. Bu da erməni vəhşiliyinin, vandalizminin bir nümunəsdir. Azərbaycan Prezidenti bütün bunları erməni faşizminin, vandalizminin təzahürü, mahiyyəti olaraq ifadə edib. Ağdam və Füzuli şəhərlərini ermənilər tamamilə viran qoyublar. Zəngilan, Cəbrayıl, eləcə də başqa şəhər və kəndlərimizin də bütün tikililərini, yaşayış və inzibati binalarını, mədəniyyət evlərini dağıdıb taladılar, abidələrimizi məhv etdilər. Hətta dağıdılan bu abidələr arasında məscidlər də var, alban xristianlıq dövrünə aid məbədlər də var ki, ya dağıdılıb, ya da təhrif olunublar.
Azərbaycan Prezidentinin səsləndirdiyi fikirlər ermənilər tərəfindən təhrif edilir, tamamilə başqa yerlərə yozulur. Xüsusilə də, Prezidentin Ağdamda baş verən vəhşilikləri, vandalizmi, erməni faşizmini faşizmin ən yüksək nöqtəsi adlandırması tamamilə düzgün ifadədir. Ötən 30 il ərzində biz erməni faşizminin bütün çalarlarını, tərəflərini görmüşük, bu, Azərbaycan xalqının həyatında özünün ən dəhşətli formasını ortaya qoyub. Ermənilər bunu görmək əvəzinə iddia edirlər ki, Azərbaycan Prezidentinin səsləndirdiyi bu fikirlər guya “irqçiliyi”, “ermənilərə nifrəti” ortaya qoyur. Tamamilə yanlış yanaşmadır, gerçəyi ifadə etmir, Azərbaycan dövləti heç zaman erməni xalqına nifrət siyasəti yürütməyib, irqçilik bizə yaddır, bizi bunda ittiham etmək gülüncdür. Biz torpaqlarımızı işğal edən, kəndlərimizi, şəhərlərimizi viran qoyan, var-dövlətimizi talayıb satan, öz adına çıxan, işğalçılıq düşüncəsindən əl çəkməyənləri ifşa edirik. Azərbaycan Prezidenti erməni vəhşiliyinin, erməni vandalizminin, erməni faşizminin daha dəhşətli olduğunu ifşa edib”.
F.Ələkbərlinin sözlərinə görə, Azərbaycan Cənubi Qafqazda sülhün, sabitliyin, əminamanlığın yaranması üçün çalışır, bu yöndə böyük töhfələr verir, Ermənistan isə əksinə, sülhün və sabitliyin yaranmasına qarşı olduğunu ortaya qoyur. “Bölgədə sülhün, əminamanlığın, sabitliyin yaranması üçün Azərbaycan böyük səylər göstərir, bunun üçün də erməni faşizminin kökünün tamamilə kəsilməsinin vacibliyini vurğulayır. Bu gün bölgədə sülhün, sabitliyin ən böyük düşməni erməni faşizmidir ki, onun tamamilə silinməsi zərurətə çevrilib. Erməniləri narahat edən məqamlardan biri odur ki, Azərbaycan Prezidenti erməni faşizminin dəhşətlərini açıb ifşa edir”.
F.Ələkbərli bildirdi ki, Azərbaycan xalqına qarşı soyqırımlar, qırğınlar törətdiklərini, işğal dövründə torpaqlarımızın məqsədli şəkildə viran qoyduqlarını, işğalı davam etdirmək niyyətində olduqlarını Ermənistanın keçmiş prezidentləri Petrosyan, Köçəryan, Sarkisyan özləri etiraf edib. Ekspert vurğuladı ki, 44 günlük müharibədə və 23 saatlıq antiterror tədbirlərində Ermənistanın işğalına son qoyuldu və ermənilər tamamilə ifşa olundular, dünya onların kim olduğunu aydın görə bildi. Azərbaycan ordusunun qələbəsini həzm edə bilməyən qüvvələrin Azərbaycan Prezidentinin fikirlərini məqsədli şəkildə təhrif etməsinin yolverməz olduğunu deyən F.Ələkbərli bildirdi ki, bizim dinc erməni əhali ilə heç bir zaman işimiz olmayıb, ölkəmizdə ermənilər də yaşayır və onlar heç bir ayrıseçkiliklə üzləşmirlər. “Amma bu gün Ermənistan deyilən ölkədə bir nəfər də olsun azərbaycanlı yaşamır. Bu, Ermənistanın milli-dini, irqi ayrıseçkilik siyasətinin təzhürüdür”.
F.Ələkbərli qeyd etdi ki, Ermənistan revanşizm, faşizim siyasətindən əl çəkməzsə, sülh müqaviləsinin imzalanmasına hər vəchlə mane olarsa, bundan itirən yalnız bu dövlət özü olacaq. Bu gün Ermənistanda antisülh mövqeyindən çıxış edənlərin çox olduğunu deyən F.Ələkbərli hesab edir ki, onların məqsədi bölgədə dincliyin pozulmasıdır, buna isə Azərbaycan heç vaxt icazə verməz.
İradə SARIYEVA
