Hüseyn İbrahimov: “Bütün bunlar Fransada siyasi repressiyaların açıq göstəricisidir”
Fransa məhkəməsi ifrat sağçı lider Marin Le Peni Avropa İttifaqının (Aİ) vəsaitinin israfında təqsirli bilib və onu 5 il müddətinə vəzifəyə namizədliyini irəli sürməkdən məhrum edib. Bu qərar 2027-ci il prezident seçkilərinin əsas favoriti olan Le Peni yarışdan kənarda qoya bilər.
Məhkəmə martın 31-də "Milli Cəbhə" partiyasının üzvü olan Le Peni 4 il həbs cəzasına məhkum edib. Onun 2 ilini ev dustaqlığında keçirməsi, qalan 2 ilinin isə şərti cəza kimi təxirə salınması qərara alınıb. Le Pen kimi, Avropa Parlamenti üzvü olmuş partiyanın hazırkı və keçmiş səkkiz üzvü, eləcə də Le Penin və partiyasının 12 köməkçisi "Milli Cəbhə"nin xeyrinə Aİ vəsaitlərini israf etməkdə təqsirli bilinib. Le Pen 2011-2021-ci illərdə partiyaya rəhbərlik edib.
Təqsirləndirilən bu şəxslər vəsaitləri şəxsi məqsədləri üçün mənimsəməkdə deyil, 2004-2016-cı illərdə partiya üçün çalışan işçilərin maaşlarını ödəmək məqsədilə Avropa Parlamentinin vəsaitlərini qanunsuz istifadə etməkdə ittiham olunublar. Halbuki, bu vəsaitlər Avropa Parlamentinin köməkçiləri üçün nəzərdə tutulub.
Məlum olduğu kimi, 2027-ci ildə keçiriləcək prezident seçkilərində Le Penin qalib gələcəyi ehtimalı böyük idi. Ancaq dempkratiyadan, azad seçimdən dəm vuran Avropa siyasi rəqibləri ağlagəlməz vasitələrlə sıradan çıxarır. Düzdür, 2017 və 2022-ci il prezident seçkilərində Le Pen Emmanuel Makrona məğlub olub. Makron 2017-ci ildə səslərin 66.06 faizini toplayaraq 33.94 faiz qazanmış Le Peni məğlub edib. Ancaq Makron 2022-ci il seçkilərində birinci turda Le Penə qalib gələ bilmədi. Makron birinci raundda 28.1-29.7%, Le Pen isə 23.3-24.7% səs yığıb. Yalnız ikinci turda Makron 58,55 faiz toplayaraq qalib gəlib. Onun rəqibi Le Pen o zaman seçicilərin 41,45 faizini qazanıb. Bu baxımdan məlum idi ki, 2027-cu ildə favorit Le Pen olacaq. Bunun qarşısını almaqdan ötrü Makron hakimiyyəti belə pozucu təxribatı törətdi.
“Le Penə qarşı atılan addımlar Avropanın ikili standartlarını bir daha gündəmə gətirir”
Sözügedən məsələni “Bakı-Xəbər”ə şərh edən İdarəçilik Akademiyasının müəllimi, sosioloq Hüseyn İbrahimov hesab edir ki, bütün bunlar Fransada siyasi repressiyaların açıq göstəricisidir: “Qərb dəyərləri ümumbəşəri dəyərlər və bəşər sivilizasiyasının əldə etdiyi ortaq dəyərlər idi. Ancaq məlum olur ki, Fransanın timsalında bunlar ortadan qaldırılır. Bunun bariz nümunəsi Fransada Makronun rəqibini qondarma maliyyə iddiaları ilə sıradan çıxarmasıdır. Faktiki olaraq süni, antidemokratik vasitələrlə onun növbəti prezident seçkilərində iştirakını məhdudlaşdırırlar. Burada artıq heç bir siyasi dəyərdən danışmağa dəyməz. Le Pen son prezident seçkilərində Emmanuel Makrona az fərqlə məğlub olmuşdu, lakin ölkədə böyük bir elektorata sahib olduğu üzə çıxdı. Makron hökuməti son parlament seçkilərində ciddi məğlubiyyətə uğrayıb və hazırda hökumət daxilində də parçalanma yaşanır. Baş nazirlə Makron arasında fikir ayrılıqları mövcuddur və bu, ölkədə hökumət böhranını daha da kəskinləşdirir. Bütün bunlar fonunda Le Penə qarşı atılan addımlar Avropanın ikili standartlarını bir daha gündəmə gətirir. Bu, Avropada demokratiya adı altında baş verən biabırçılıqların daha bir göstəricisidir. Fransada radikal sağa qarşı atılan addımlar fonunda Le Penin istintaqa cəlb edilməsi ilə bağlı proseslər çoxdan gedirdi. İndi isə məhkəmə sisteminin siyasiləşməsi həmin biabırçılığın nə həddə olduğunu bütün dünyaya nümayiş etdirir. Bu, siyasi repressiyadır. Makron Le Peni həbs etməklə onun qarşısını kəsmək istəyir. Düzdür, Makron iki dönəm prezident olduğu üçün daha namizəd ola bilməz. Ancaq o, bu cür vasitələrlə Le Penin prezidentlik yolunu bağlamağa çalışır. Bu isə antidemokratik bir addımdır”.
Vidadi ORDAHALLI
