Azər Həsrət: "Ermənistanda koçaryanların və sarkisyanların cəmiyyəti hansı fəlakətlərə sürükləməsi ilə bağlı təsəvvürlər hələ dağılmayıb, onlar hələ də cəmiyyətin yaddaşındadır"
Ermənistanda keçirilən bələdiyyə seçkilərində Paşinyanın "Mülki Müqavilə" partiyası ölkənin ikinci ən böyük şəhəri olan Gümrüdə və Armavir bölgəsindəki Parakar şəhərində məğlubiyyətə uğrayıb. Hakim partiya ilə müxalifət liderləri arasında kəskin rəqabət müşahidə oldunğundan, seçicilər tərəfindən ciddi seçki aktivliyi nümayiş edilib.
Lakin səsvermənin nəticələrinə görə, müxalifətin namizədləri öndədir. Paşinyan bunu parlament seçkilərinə hazırlıq kimi dəyərləndirə bilərmi? Əgər Paşinyan bu göstəricidən nəticə çıxararaq öz mövqeyini gücləndirməyə çalışarsa, ölkənin siyasi və ya seçki sistemində hər hansı dəyişikliklərə gedə bilərmi? O buna ehtiyac duya bilərmi? Çünki seçkilərə bir il qalmasına rəğmən, ölkənin iki böyük şəhərində Paşinyanın partiyasının reytinqi cəmi 36 faizdir.
Baki-xeber.com-un sualını cavablandıran siyasi şərhçi Azər Həsrət bildirdi ki, xüsusi olaraq Paşinyanın partitasından olan namizədlərin Gümrüdə məğlub edilməsi təsadüf deyil: "Çünki Nikol Paşinyanı Moskva sevmir. Ümumiyyətlə, Rusiya Nikol Paşinyanla üzülüşmək üçün sərt addımlar atmağın tərəfdarıdır. Sadəcə olaraq, indiki vəziyyətdə Rusiya əvvəlki kimi qərarli davrana bilmir. Amma bununla belə boş da dayanmır. O baxımdan bu seçkidə Paşinyanın tərəfdarlarının məğlub etdirilməsi dəyərləndirilə bilər. Gümrünü ona görə xüsusi vurğulayıram ki, bu şəhərdə Rusiyanın 102-ci hərbi bazası yerləşir. Həmin bazanın hərbiçiləri həm də cəmiyyətin içindədirlər, seçicilərə təsir imkanları var. Onların sayı da kifayət qədər çoxdur. 102-ci hərbi baza Rusiya Müdafiə Nazirliyinin direktivi ilə 1 sentyabr 1994-cü il tarixində keçmiş SSRİ Silahlı Qüvvələrinin 7-ci ordusunun 127-ci motoatıcı diviziyasının bazasında yaradılıb. Hazırda şəxsi heyətinin 5000 nəfər olduğu bildirilən hərbi bazanın döyüş heyəti İrəvan və Gümrü qarnizonundan ibarətdir. İrəvan qarnizonuna İdarəetmə Qrupu, 123-cü motoatıcı alay, 3624-cü aviasiya bazası, hospital, mənzil-təchizat hissəsi, qarnizon məhkəməsi və rabitə mərkəzi daxildir. Gümrü qarnizonuna isə 128-ci motoatıcı alay, 124-cü motoatıcı alay, 988-ci zenit raket alayı (S-300 ZRK) və 992-ci artilleriya alayı tabedir. Bazanın nəzdində əlahiddə tank, kəşfiyyat, təmir, mühəndis-istehkam, radiasiya-kimyəvi və bakteroloji mühafizə taborları, tank əleyhinə divizion, radioelektron, tibb, komendant bölükləri, prokurorluq, televiziya mərkəzi və s. fəaliyyət göstərir.
Təbii ki, bu kontingent əsasən bu şəhərdə hərbiçi kimi fəaliyyət göstərsə də, bu baza Ermənistanın daxili siyasətinə bu və ya digər şəkildə təsir imkanları olaraq da istifadə edilir. Onların təsiri altında olan, onların sözləri ilə oturub-duran siyasi qüvvələr məhz Moskvaya bağlıdır. Onlar "revanşıst" qüvvələr adlandırılan koçaryanlar, sarkisyanlar və onların ətrafında olanlardır. Eyni zamanda, burada Moskva yönümlü yeni qüvvələr də var.
Gümrüdə bələdiyyə seçkisini bu rakursdan qiymətləndirmək daha doğru olardı.
Amma bu, ümumilikdə götürdükdə, ölkənin bütöv siyasi mənzərəsini özündə əks etdirmir. Sadəcə konkret bölgələrin siyasi durumunu əks etdirir. Bu hələ o demək deyil ki, Paşinyanın tərəfdarlarının imkanları zəifləyib və yaxud da tükənib.
İndi ölkə üzrə seçkilər keçirilərsə, Paşinyanın yüksək reytinqi hələ də qalmaqdadır. Ona görə ki, Ermənistanda koçaryanların və sarkisyanların cəmiyyəti hansı fəlakətlərə sürükləməsi ilə bağlı təsəvvürlər hələ də dağılmayıb, onlar hələ də cəmiyyətin yaddaşındadır. Yəni Ermənistan vətəndaşı başa düşür ki, həmin o "revanşisitlər" onları daima gərginlik altında saxlayıblar, əhalini bədbəxtliklərlə üz-üzə qoyublar. Bunun nəticəsində Qarabağ müharibəsində də uduzublar.
Hər halda, bütün bunları Ermənistan əhalusinin əksəriyyəti anlayır. Ona görə də Qarabağ müharibəsindən dərhal sonra keçirilən seçkilərdə Paşinyana yenidən etimad göstərildi. Həmin adamlar yenə ölkədədir, heç yerə getməyib. Üstəlik, hazırda Ermənistanda vəziyyət ovaxtkından pis deyil. Əksinə, ölkədə bir sakitləşnə, sabitləşmə var. Ümid var ki, Azərbaycanla sülh müqaviləsi bağlanacaq, kommunikasiyalar açılacaq, ölkə dünyaya daha intensiv inteqrasiya imkanları əldə edəcək. Bu baxımdan düşünmürəm ki, Paşinyanın parlament seçkiləri ilə bağlı ciddi narahatlığı olsun. Lakin sözsüz ki, siyasi vəziyyət, seçki prosesi daima ayaqda durmağı tələb edir. O baxımdan yəqin ki, Paşinyan bu məğlubiyyəti özü üçün təhlil edəcək və müəyyən nəticələr çıxaracaq. Həmin nəticələrə uyğun da müəyyən qərarlar verəcək. Yəni bu məğlubiyyət Paşinyan tərəfindən bir siqnal kimi qəbul edilə bilər. Bu siqnali o düzgün dəyərləndirəcəyi təqdirdə qarşıdan gələn parlament seçkilərində qələbəni asanlıqla təmin edə biləcək".
Dəniz NƏSİRLİ
