Əli Orucov: “Almaniya məqsədyönlü şəkildə Paşinyan hakimiyyətinin pozucu fəaliyyətinə göz yumur”
Ermənistanda səfərdə olan Almaniya prezidenti Frank-Valter Ştaynmayer deyib ki, Ermənistan son həftələr Azərbaycanla sülh prosesində çox konstruktiv yanaşma nümayiş etdirib və iki ölkə arasında razılaşdırılmış sülh sazişinin imzalanmasına heç nə mane olmur.
İrəvanda erməni həmkarı Vaaqn Xaçaturyanla birgə keçirdiyi mətbuat konfransı zamanı Ermənistan və Azərbaycan arasında sülh sazişinin mətni üzrə razılaşmanı "təsiredici" adlandıran Almaniya dövlət başçısı bildirib ki, bu saziş regionda uzunmüddətli sülhə yol aça bilər. "Hər iki tərəfin bu əlverişli məqamdan Cənubi Qafqazda uzunmüddətli və sabit sülhün bərqərar olması üçün istifadə etməsi arzuolunandır", - deyən Ştaynmayer Bakıdakı görüş zamanı da bu məsələni müzakirə edəcəyini bildirib. Almaniya prezidenti Ermənistanla Azərbaycan arasında sülh sazişinin müddəalarının əlaqələndirilməsinə və bu istiqamətdə İrəvanın atdığı addımlara toxunaraq bəyan edib ki, Ermənistan prezidenti Vaaqn Xaçaturyanla müzakirələr zamanı bu illər ərzində dünyanın münaqişələrdən böyük zərər çəkdiyi vurğulanıb ki, bu da səmərəli idarəçiliyi getdikcə çətinləşdirir.
Almaniya prezidentinin sözlərinə görə, Ermənistan və Azərbaycanın münaqişənin həlli üçün sülhün bərqərar olması istiqamətində son addımları atması vacibdir: “Biz hamımız bunun şahidiyik ki, Ermənistan son həftələr özünü çox konstruktiv göstərib. Sülh sazişində artıq açıq suallar yoxdur və onun imzalanması, ratifikasiyası və icrasına heç nə mane olmur. Ermənistan sülh sazişinin mümkünlüyünə səbəb olan qərarlar qəbul edib və indi Azərbaycan bütün mümkün şübhələri aradan qaldırmalıdır”.
Göründüyü kimi, Ştaynmayer Ermənistanın “konstruktiv”liyindən dəm vurur. Maraqlıdır, doğrudanmı Almaniya kimi bir dövlətin başçısı Ermənistanın oyun oynadığını başa düşmür? Ştaynmayer necə belə sadəlövh düşüncə tərzinin qurbanı ola bilər? Nə əcəb anlamır ki, Ermənistan belə şəraitdə həqiqətən sülhə meylli deyil?
“Rəsmi Berlin iki ölkə münasibətlərinin tənzimlənməsi məsələsində Parisin tezisləri əsasında siyasətini qurur”
Sözügedən məsələyə aydınlıq gətirən AMİP funksioneri Əli Orucov “Bakı-Xəbər”ə açıqlamasında bildirdi ki, Almaniya prezidenti Fransa prezidenti kimi danışır: “Sanki danışan Ştaynmayer yox, Emmanuel Makrondur. Əfsuslar olsun ki, Angela Merkel 2021-ci ildə kansler vəzifəsindən gedəndən sonra Almaniyanın Cənubi Qafqaz siyasətində tərəfsizlikdən əsər-əlamət qalmayıb. Rəsmi Berlin Azərbaycan-Ermənistan münasibətlərinin tənzimlənməsi məsələsində Parisin tezisləri əsasında siyasətini qurur. Qərəzli formada məsələlərə yanaşaraq Azərbaycanı hədəf alırlar. Sanki 30 il ərazilərimizin işğal altında qalması, viran qoyulması uzaq tarixdə baş verib. Bütün bunları unudaraq Ermənistanı sülh göyərçini kimi təqdim etmək böyük ədalətsizlikdir. Almaniya son illər açıq-aşkar Fransa ilə eyni mövqedən çıxış edərək ədalətsiz syasət yeridir. Azərbaycan ərazi bütövlüyünü və suverenliyini tam təmin edəndən sonra alman mediası davamlı olaraq Azərbaycanı hədəf alan materiallar dərc edir. Aydın məsələdir ki, Almaniya siyasi hakimiyyətinin razılığı olmadan bunlar baş verməz. O baxımdan hesab edirəm ki, Almaniya məqsədyönlü şəkildə Paşinyan hakimiyyətinin pozucu fəaliyyətinə göz yumur. Çünki Azərbaycanın Ermənistanla sülh sazişi məsələsində gizli heç nə yoxdur. Azərbaycanın əsas tələbi ondan ibarətdir ki, Ermənistan Konstitusiyasından Azərbaycana yönəlik ərazi iddiaları çıxarılmalıdır. Ştaynmayerin bunu Ermənistandan tələb etmək və prosesi sürətləndirmək əvəzinə, İrəvanı “konstruktiv” tərəf kimi təqdim etməsi sadəcə tərəf tutmaq anlamına gəlir”.
Vidadi ORDAHALLI
