Azərbaycan Prezidentinin köməkçisi – Prezident Administrasiyasının xarici siyasət məsələləri şöbəsinin müdiri Hikmət Hacıyev qərəzli, anti-Azərbaycan hüquqi hesabat hazırlayan vəkil Luis Moreno Okamponun ittihamlarına cavab verib.
Hikmət Hacıyev sosial şəbəkə hesabındakı paylaşımında Okamponun əslində kim olduğu barədə faktlar ortaya qoyub.
Belə ki, Okampo Beynəlxalq Cinayət Məhkəməsində baş prokuror vəzifəsində çalışarkən dünyanın ən bədnam vergi sığınacağında bəzi şirkətləri idarə edib.
Bununla yanaşı, Xocalı soyqırımını törətmiş hərbi cinayətkar olan Ermənistanın eks-prezidenti Serj Sarkisyanın İrəvanda Okamponu qarşılaması bildirilir:
“Bu cür qaranlıq keçmişə malik olan şəxs öz qərəzli hesabatında Beynəlxalq Ədalət Məhkəməsinin qərarlarını və Laçın yolunun fəaliyyəti ilə bağlı real vəziyyəti bilərəkdən təhrif edir”.
Bu cür prinsipial məsələ ilə bağlı mövzular niyə belə ermənipərəst adamlara tapşırılır?
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, əslinə baxanda, bu bütövlükdə beynəlxalq hərbi cinayəti bilib gizlətməkdir: “Təcrübəli hüquqşunas, beynəlxalq hərbi cinayətlərə prosesual qiymət verməyi bacaran adam belə addım atmamalıdır. Ermənistanın Azərbaycan vətəndaşlarına qarşı uzun illər törətdiyi genosidi, soyqırımı görməlidir. Təkzib olunmuş faktlarla tarixə düşən, ərazilərimizi vandallıqla dağıdan insanların əməlinə dürüst qiymət verməlidir. O, bir növ kənara çəkilmə əvəzinə, bilavasitə onların yanında olmaqla, açıq dəstək ifadə edir. Ona görə də, beynəlxalq hərbi tribunal yaradılmalıdır. Çox təəssüf ki, onun da yaradılmasında maneələr var. Amma mən bir məsələni hər zaman müqayisə edirəm. İkinci Dünya müharibəsindən təxminən 6 ay sonra Nürnberq hərbi tribunalı bəşəriyyətin qarşısında nasist ordusunun 20 - dən çox yüksək rütbəli zabitini ən müstəsna cəza olan ölüm hökmü və uzunmüddətli azadlıqdan məhrum etmə ilə cəzalandırdı. Düşünürəm ki, belə bir məhkəmə yaradılmalıdır. Üstündən 30 il ötməsinə baxmayaraq, bunun yaranmamasının özü bu kimi insanların Ermənistan tərəfində olmaları ilə nəticələnir və müstəsna həyasızlıqla qüvvədə olan beynəlxalq normalara hörmətsizliyin canlı təzahürü sayılır. Onun bu əməli cinayətdə iştirakçı, təşkilatçı, faktları gizlətmə və sözün əsl mənasında hərbi cinayətkar dairələrin yanında olmaq anlamına gəlir. Mən Hikmət müəllimin dediklərini tam alqışlayıram. Əsl Azərbaycan vətəndaşı belə də olmalı və konkret mövqe sərgiləməlidir. Hazırda Azərbaycanın beynəlxalq aləmdə artan nüfuzu, regionda qalib dövlət olması, beynəlxalq səviyyəli tədbirlərə ev sahibliyi etməsi Ermənistan kimi bir sıra ölkə və təşkilatları da narahat edir. Onlar Azərbaycanın ünvanına əsassız iddialar səsləndirirlər. Bu cür yanaşma Azərbaycana qarşı ikili standart göstərən nüfuzlu qurumlara xalqımızın inamını azaldır. Nüfuzlu beynəlxalq təşkilatların Azərbaycana qarşı qərəzli bəyanatlar verməsi həmin təşkilatları gülünc vəziyyətə salır. İkinci Qarabağ müharibəsində cəmi 44 gün ərzində Ermənistan üzərində qazandığımız tarixi Qələbə münasibətilə Prezident İlham Əliyevə dünyanın müxtəlif dövlət başçılarından çoxlu sayda təbrik məktubları gəldi. Bu o deməkdir ki, həmin dövlətlər Azərbaycanın beynəlxalq səviyyədə tanınan ərazi bütövlüyünü və “Qarabağ Azərbaycandır!” reallığını qəbul edir. Otuz il ərzində Azərbaycanın ərazilərinin işğalına göz yuman bir sıra beynəlxalq təşkilatların yenidən qərəzli bəyanatlar verməsi həmin qurumların ikili standartlar mərəzindən hələ də xilas ola bilməməsindən xəbər verir. Təəssüf ki, bu günlərdə belə qərəzli iddiaların birinin də şahidi olduq”.
Məhəmmədəli QƏRİBLİ
