Ira8-4
Rasim Quliyev: “Rəsmi qurumları və rəsmi mətbuat orqanları saxta informasiyaları dövriyyəyə buraxmaqla manipulyasiya edir”
Ermənistan İstintaq Komitəsi 2020-ci ildə baş vermiş 44 günlük müharibədə həlak olanların yekun statistikasını yayıb. Erməni mediasının Komitəyə istinadən yaydığı məlumatda bildirilir ki, müharibə nəticəsində ümumilikdə 3833 nəfər həlak olub. Onlardan 3755-i hərbçi, 78-i isə guya mülki şəxsdir.
Bildirilib ki, 191 nəfərin (172 hərbçi, 19 mülki şəxs) taleyi hələ də naməlum olaraq qalır.
Məlum olduğu kimi, bir neçə gün əvvəl Praqada çıxış edən Ermənistan prezidenti Vaaqn Xaçaturyan müharibədə həlak olanların sayının 4800 nəfər olduğunu bəyan qeyd etmişdi.
Ermənistan İstintaq Komitəsinin mülkü şəxslərlə bağlı açıqladığı rəqəmlərə şərh verən Resurs Analitik İnformasiya İctimai Birliyinin sədri Rasim Quliyev baki-xeber.com-a bildirdi ki, əvvəla, Azərbaycanla Ermənistan arasında hazırda davam edən sülh prosesində pozitiv irəliləyişlər var. R.Quliyev qeyd etdi ki, burada birbaşa təmasların olması müsbət haldır. “Azərbaycan tərəfi əvvəlcədən təkid edirdi ki, biz danışıqları vasitəçilərsiz aparmalıyıq. Bunun nəticəsi artıq ortadadır ki, sülh müaaviləsi üçün xeyli yol qət edilib. Bu bizim Ermənistanla sülh müqaviləsinin imzalanması istiqamətində apardığımız işdir. Qalib ölkə kimi həmin sülh müqaviləsini də Ermənistana ilk dəfə biz təklif etmişik. Lakin bu o demək deyil ki, sülh müqaviləsi imzalanıb, yaxud da o demək deyil ki, sülh müqaviləsi son nəticəsədə imzalananda hansı bəndlər, hansı şərtlər qalacaq. Ona görə də Ermənistan tərəfi 30 il ərzində etdikləri cinayətləri, mülkü şəxslərimizə qarşı törətdikləri qətlləri ört-basdır etmək istəyir. Həm Birinci, həm də İkinci Qarabağ müharibəsində mülkü şəxslərə qarşı cinayətlər törədiblər. Ermənistanın Gəncəni və müharibə bölgəsindən uzaqda yerləşən şəhərlərimizi raket zərbələri ilə vurması nəticəsində dinc sakinlərimiz həlak oldular. Ermənistan tərəf bilir ki, dinc, mülkü vətəndaşlarımızı kütləvi şəkildə qətlə yetirməsinə gec-tez cavab verməli olacaq. Bu 30 ildə həm insani, həm psixoloji-mənəvi və sair baxımından vurduğu zərbələrin, dinc əhalimizə qarşı törətdiyi kütləvi qətllərin hesabı nə zamansa onlardan sorulacaq. Ona görə də hesab edirəm ki, Ermənistan tərəfi də özünü “zərər çəkmiş” kimi, yaxud bu müharibənin onlara da zərər vurduğunu göstərmək üçün belə dezinformasiyalar yayırlar. Yaxud da onların rəsmi qurumları və rəsmi mətbuat orqanları saxta informasiyaları dövriyyəyə buraxmaqla manipulyasiya edir. Bunun bir tərəfi budur”.
R.Quliyevin fikrincə, bu yanlış informasiyanın yayılmasının ikinci tərəfi də var. O, qeyd etdi ki, Ermənistanın apardığı işğalçı müharibədə və uduzduğu savaşda erməni xalqına zərərlər dəyib. “Ermənistan vətəndaşı olan erməni övladlarının başqa xalqa aid torpaqda-Qarabağda həlak olması erməni dövlətinin öz xalqına qarşı cinayətləridir. Ona görə də bu Ermənistan tərəfin yaydığı bu dezinformasiya iki məqsədə xidmət edir. Bu birincisi, Ermənistan dövlətinin erməni xalqı qarşısında bəraət qazanmaq, ikincisi isə gələcəkdə işğal faktından doğan bu müharibə cinayətlərinə görə cavab vermək öhtəliyindən yayınmaq cəhdidir”-deyə R.Quliyev qeyd etdi.
R.Quliyev əlavə etdi ki, 44 günlük müharibədə 78 dinc erməninin öldürülməsi iddiası da yalandan başqa bir şey deyil, bu Ermənistanın rəsmi qurumlarının növbəti saxtakarlığıdır.
İradə SARIYEVA
