Mediada Kremlin sözçüsü Dmitri Peskovun Ermənistanın Baş naziri Nikol Paşinyanın Moskvaya mümkün səfəri ilə bağlı açıqlaması yer alıb.
Peskov bildirib ki, Vladimir Putin və Nikol Paşinyanın görüşündə Ermənistanın gələcək inkişaf istiqamətinin seçilməsi, ölkənin hansı istiqamətə və orientasiyaya üstünlük verəcəyi, həmçinin Ermənistanda mümkün referendumun keçirilməsi məsələləri müzakirə olunacaq.
Onun sözlərinə görə, Putin və Paşinyan arasında əvvəlki görüşdə ticarət-iqtisadi əməkdaşlıqla bağlı konkret məsələlər müzakirə edilib və Paşinyanın Moskvaya səfərinin keçirilməsi barədə razılıq əldə olunub.
Peskov səfərin dəqiq tarixinin hələ müəyyənləşdirilmədiyini, bunun diplomatik kanallar vasitəsilə razılaşdırılacağını bildirib.
Yəni Moskva-Paşinyan görüşünün gündəliyinə təkcə iqtisadi əməkdaşlıq deyil, Ermənistanın xarici-siyasi istiqaməti və mümkün referendum kimi siyasi məsələlərin də daxil ediləcəyi açıqlanır.
Peskovun açıqlamasından görünür ki, Putinlə Paşinyanın Moskvada keçiriləcək görüşündə Ermənistanın gələcək siyasi istiqaməti və referendum məsələsi ayrıca müzakirə olunacaq. Paşinyan indiyədək referendumun keçirilməsini tələsmədən, yalnız Ermənistanın Aİ-yə üzvlüklə bağlı rəsmi müraciətindən sonra mümkün hesab edib. Sizcə, Moskva görüşündə bu məsələ ilə bağlı konkret razılaşma əldə olunması mümkündürmü? Paşinyan referendumun keçirilməsi ilə bağlı mövqeyindən geri addım ata və Rusiyanın tələbi ilə güzəştə gedə bilərmi?
Rusiya və Ermənistan arasında münasibətlər son dövrlərdə ciddi dəyişikliklər fonunda inkişaf edir. İki ölkə arasında siyasi fikir ayrılıqları, Ermənistanın Qərblə yaxınlaşması və xarici siyasət kursunun dəyişməsi Moskvanın İrəvana münasibətində də özünü göstərir. Bu baxımdan Kremlin sözçüsü Dmitri Peskovun Rusiya Prezidenti Vladimir Putinlə Ermənistanın Baş naziri Nikol Paşinyanın mümkün Moskva görüşündə Ermənistanın gələcək inkişaf istiqaməti, siyasi orientasiyası və referendum məsələsini müzakirə edəcəkləri barədə açıqlaması diqqət çəkib.
Azər Həsrət: "Ermənistan Rusiyanın vassalı olmağı seçirsə, artıq bunu qəbul etmiş olacaq"
Məsələ ilə bağlı “Bakı-Xəbər” qəzetinə açıqlama verən siyasi şərhçi Azər Həsrət hesab edir ki, referendum kimi məsələnin başqa dövlətin rəhbəri ilə müzakirə edilməsi Ermənistanın suverenliyi baxımından ciddi suallar yaradır. Onun sözlərinə görə, referendum keçirilib-keçirilməməsi Ermənistanın daxili məsələsidir və bu barədə qərarı Ermənistan xalqı verməlidir.
"Ümumiyyətlə, bir ölkənin daxili işi olan referendum kimi məsələnin başqa bir dövlətin rəhbəri ilə müzakirə olunması həmin dövlətə heç də başucalığı gətirmir. Ermənistan referendum keçirməlidirsə və ya keçirmək istəyirsə, bunu niyə xarici bir ölkənin rəhbəri, konkret olaraq Rusiya Prezidenti ilə müzakirə etməlidir? Bu, Ermənistanın müstəsna suveren hüququdur və bu məsələdə müraciət ediləcək əsas ünvan Ermənistan xalqıdır", – deyə siyasi şərhçi bildirib.
Azər Həsrət hesab edir ki, Ermənistanın xarici siyasi kursunun da Moskva ilə bu şəkildə müzakirə edilməsi suveren dövlət prinsipləri ilə uzlaşmır.
"Özünə hörmət edən heç bir dövlət gedib xarici ölkənin prezidenti ilə öz dövlətinin xarici siyasi kursunu müzakirə etməz. Təbii ki, qarşılıqlı müzakirələr, hansısa güzəştlər, bir-birinə münasibətdə nəzakət və əməkdaşlıq məsələləri ola bilər. Amma dövlətin hansı istiqamətdə inkişaf edəcəyi və hansı xarici siyasi kursu seçəcəyi kimi məsələlərin bu şəkildə müzakirəyə çıxarılması Ermənistan üçün başucalığı gətirməyəcək", – deyə o vurğulayıb.
Siyasi şərhçi Kremlin açıqlamasının formasını da diqqətəlayiq hesab edir. Onun fikrincə, Rusiya prezidentinin sözçüsünün Ermənistanın siyasi orientasiyası və referendum kimi məsələləri açıq şəkildə Moskvanın gündəliyinə daxil etməsi İrəvana münasibətdə müəyyən mesajlar ehtiva edir.
"Rusiya dövlətinin sözçüsünün, prezidentin sözçüsünün bu cür qaba ifadələr işlətməsi Ermənistana qarşı hörmətsizlikdən başqa bir şey deyil. Yenə də görünür ki, Rusiya imperiya ambisiyalarından əl çəkmir. Ermənistanı yenə də qapazaltı, vassal dövlət kimi görür", – deyə Azər Həsrət bildirib.
Onun sözlərinə görə, Paşinyanın Moskva görüşündə bu məsələləri Rusiyanın diqtə etdiyi çərçivədə müzakirə etməsi Ermənistanın müstəqil xarici siyasəti baxımından mənfi görüntü yarada bilər.
"Əgər Ermənistanın Baş naziri də gedib bu müzakirəni aparsa, o artıq Rusiyanın vassalı olduqlarını qəbul etmiş olacaq. Özünə hörmət edən dövlət və onun rəhbəri bu cür aşağılanmamalıdır. Mən şəxsən olsam, Rusiyaya deyərdim ki, get işinlə məşğul ol. Referendum keçirməliyəmsə, xarici siyasi kursumu müəyyən etməliyəmsə, bunu səninlə müzakirə edəcək deyiləm. Bununla bağlı müzakirə edəcəyim əsas ünvan öz xalqımdır", – deyə siyasi şərhçi qeyd edib.
Azər Həsrət hesab edir ki, Ermənistan üçün bu mərhələdə əsas məsələ öz suverenliyini və müstəqil qərarvermə imkanını qorumaqdır. Onun fikrincə, İrəvan Moskvanın siyasi təsir dairəsinə qayıtmaq görüntüsü yaratmamalıdır.
"Ermənistanın bu halda Rusiyaya yerini göstərməsi və öz simasını qoruması daha doğru olardı. Əgər bunu etməyəcəksə, artıq bəlli olacaq ki, yenə də vassal dövlət olmağı seçirlər", – deyə o bildirib.
Siyasi şərhçi əlavə edib ki, Ermənistanın qonşuları və onunla əməkdaşlıq etməkdə maraqlı olan dövlətlər üçün də İrəvanın müstəqil siyasi kurs yürütməsi daha məqbul variantdır.
"Ümumiyyətlə, Ermənistanın tərəfdaşı və ya onunla iş birliyində maraqlı olan dövlətlərin bu ölkənin yenidən Rusiyanın vassalına çevrilməsini istəməyəcəyini düşünürəm. Əlbəttə, bunu dövlət adına demirəm, şəxsi mövqeyimi ifadə edirəm. Məncə, bizim yanımızda, qonşuluğumuzda özünə, özünün müstəqil siyasətinə və suverenliyinə hörmət edən dövlət olmalıdır”, – deyə Azər Həsrət fikrini yekunlaşdırıb.
Akif NƏSİRLİ
