Məhəmməd Əsədullazadə: “Aİ Rusiyanın yaratdığı bloklarda təmsil olunan Ermənistana bu imkanı niyə tez yaratsın ki?”
Avropa İttifaqı rəsmiləri İrəvanın qarşıya qoyduğu vizasız gediş-gəliş hədəflərinə münasibətdə ehtiyatlı mövqe sərgiləyirlər. Avropa Komissiyasının rəsmi nümayəndəsi Paula Pinyo Brüsseldə keçirilən brifinqdə bildirib ki, Ermənistanla Aİ arasında vizasız rejimin 2029-cu ilə qədər tətbiq olunacağına dair səsləndirilən proqnozlar hələlik tezdir: “Düşünürəm ki, belə dəqiq tarixlər üçün hələ çox erkəndir”.
Məlumat üçün qeyd edək ki, Ermənistan hökumətinin 2026–2031-ci illər üçün nəzərdə tutulmuş proqramında 2029-cu ilə qədər Aİ ilə tam vizasız rejimə nail olmaq məqsədi rəsmi şəkildə əksini tapıb. Ancaq buna baxmayaraq, Aİ Ermənistana belə bir şəraitin yaradılmasına tələsmir.
Sözügedən məsələni baki-xeber.com-a şərh edən politoloq Məhəmməd Əsədullazadənin fikrincə, Ermənistan hökuməti 2026–2031-ci illər üçün nəzərdə tutulmuş proqramı elan etsə də, orada əksini tapan məsələlərin həlli elə də asan olmayacaq: “Ermənistanın 2029-cu ilə qədər Aİ ilə tam vizasız rejimə nail olmaq planı ambisiyalı bir plandır. Bunu reallaşdırmaq o qədər də asan deyil. O baxımdan hesab edirəm ki, Avropa İttifaqı 2030-cu ildən sonra da Ermənistana bu imkanı tanımaya bilər. Çünki hələ ki, bir sıra məsələlər aydınlaşmayıb. Rusiya ilə Ermənistan arasında münasibətlərin necə olacağı və bunun nəyə gətirib çıxaracağı məlum deyil. Belə olan halda Aİ Rusiyanın yaratdığı bloklarda təmsil olunan Ermənistana bu imkanı niyə tez yaratsın ki? Üstəlik, Ermənistanda aparılası çoxsaylı islahatlar var. Ona görə də bu və digər məsələlər həll edilmədən, Rusiyanın bu ölkədə mövcud olan təsir imkanları ortadan qalxmadan Brüsselin İrəvana belə bir imkan yaradacağı real görünmür. Avroittifaq müəyyən bürokratik sistemə malik bir qurumdur. Başqa bir tərəfdən hələ ki, Ermənistanla Azərbaycan arasında yekun sülh sazişi yoxdur. Türkiyə ilə hələ ki, sərhədlər açılmayıb. Hələ ki, Erməni Kilsəsi və revanşist qüvvələr tam sıradan çıxarılmayıb. Hesab edirəm ki, bütün bunlar Aİ-nin mövqeyinə təsir edən amillərdən biridir. O baxımdan hesab edirəm ki, Ermənistanla Aİ arasında vizasız rejimin tətbiq edilməsi göründüyü qədər asan məsələ deyil. Ona görə də sözügedən məsələ hələ uzanacaq”.
Vidadi ORDAHALLI
