Ölkə KİV-ində “Göyçə Zəngəzur Respublikası”nın prezidenti və “Qərbi Azərbaycana Qayıdış” İctimai Birliyinin rəhbəri kimi təqdim edilən Rizvan Talıbov, həmçinin “respublika”nın yeni prezidenti olduğu bildirilən, müvəqqəti olaraq Türkiyədən Azərbaycana gəlmiş Tünzalə Çələbiyeva barəsində Azərbaycan Respublikası Dövlət Təhlükəsizliyi Xidmətində (DTX) araşdırmalar aparıldığı haqda məlumat yayılıb.
Müvafiq axtarışların həyata keçirilməsi, sorğulanmaları ilə əlaqədar hər iki şəxs istintaq orqanına cəlb olunub.
Bildirilir ki, R.Talıbov və T.Çələbiyeva ilə əlaqə saxlanılması mümkün olmayıb.
Xatırladaq ki, 2022-ci ildə “Qərbi Azərbaycana Qayıdış” İctimai Birliyinin rəhbəri Rizvan Talıbov “Göyçə Zəngəzur Respublikası”nın yaradıldığını elan etmiş, onun “respublika”nın dövlət başçısı olduğu, həmçinin “respublika”nın öz parlamenti, nazirlər kabinetinin olduğu iddia edilmişdi. (Qeyd olunan təşkilatların Qərbi Azərbaycan İcması ilə heç bir bağlılığı mövcud deyil).
Sentyabrın 19-da Türkiyənin Ankara şəhərində “respublika”nın nümayəndəliyinin açıldığı bəyan edilib.
2023-cü ilin yanvar ayında “Göyçə Zəngəzur Respublikası” və “Qərbi Azərbaycana Qayıdış” İctimai Birliyi tərəfindən Rizvan Talıbovun “Göyçə Zəngəzur Respublikası”na rəhbər vəzifələrə təyinatları barədə məlumatlar və siyahı yayılıb.
Qərbi Azərbaycan İcması bəyanat verərək, belə bir təşəbbüsün tərəfindən dəstəklənmədiyini bəyan etmişdi.
Daha sonra Rizvan Talıbovun rəhbər vəzifələrə təyin etdiyini bildirdiyi xarici ölkə vətəndaşlarının İraq kürd icmaları ilə və digər ölkələrdə müəmmalı görüşləri, xarici ölkə vətəndaşları tərəfindən Rizvan Talıbovun “respublika” prezidentliyindən uzaqlaşdırılaraq Tünzalə Çələbiyevanın prezident elan edilməsi ictimaiyyətdə əlavə çaşqınlıq və suallar yaratmışdı.
Məlum olduğu kimi, Azərbaycan dövləti Prezident səviyyəsində Qərbi Azərbaycan İcmasının fəaliyyətinə ciddi önəm verir. Belə olan təqdirdə bu cür önəmli məsələdə güclərin parçalanması deyil, səfərbər olması gərəkdir. Qərbi Azərbaycanla bağlı məsələnin vahid mərkəzdən idarə olunması nə dərəcədə önəmli sayıla bilər?
Əslən həmin regiondan olan Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, Rizvan Talıbovun DTX-ya dəvət edilməsilə bağlı informasiya ilə o da tanışdı: “Mən əlaqə saxlamaq istədim, telefonları bağlı idi. Bu gün əlaqə yarada bildim. Onunla bağlı heç bir problem yoxdur, artıq sərbəst buraxılıb. Mən başqalarından fərqli olaraq, zamanında onunla görüşüb, atdığı addımın yanlış olduğunu demişəm. Onun kürd əsilli hansısa xarici ölkə vətəndaşlarını bu prosesə cəlb etməyi ilə bağlı ciddi narazılıqların olduğunu nəzərinə çatdırmışam. Ona izah etdim ki, bu cür məsələlər dövlət səviyyəsində həll edilir. Hərə bir tərəfdən addım atsa, bu bizim ümumi işimizə ziyan verə bilər. Rizvan Talıbov mənə dedi ki, adı narazılıq doğuran həmin adamı sıralarından uzaqlaşdırıblar. Bildiyim qədərilə son vaxtlar bu məsələ ümumiyyətlə gündəmdə deyildi. Ölkə başçısı bu məsələnin üstündə çox ciddi dayanıb. Qərbi Azərbaycan İcması yaratmaqla ölkəmizin bu sahədəki iddialarını ortaya qoyub. Bu istiqamətdə ciddi nəticələr əldə etmək üçün hamı Prezidentin yürütdüyü bu xətti müdafiə etməlidir. Bu, doğru olan və perspektivə yönəlik strateji xətdir. Hərə özünü bir bölgənin “prezidenti” adlandırsa, bu qeyri-ciddi qəbul edilər. Artıq bu strateji xətt dövlət səviyyəsində götürülüb. Yaxşı olar ki, bu sahədə təcrübəsi, enerjisi olan bütün fərdlər mübarizələrini bir istiqamətə yönəltsin”.
Qeyd edək ki, 1989-cu ildən fəaliyyət göstərən “Azərbaycan Qaçqınlar Cəmiyyəti” İctimai Birliyinin hüquqi varisi olan Qərbi Azərbaycan İcması həmin ildən etibarən Qərbi Azərbaycan qaçqınlarının problemləri ilə məşğul olan və 1987-1991-ci illərdə qaçqın düşən azərbaycanlılar barədə faktların və sənədlərin toplandığı və saxlandığı yeganə leqal ictimai qurumdur.
Məhəmmədəli QƏRİBLİ
