Vasif Talıbov Ali Məclisin sədri vəzifəsindən getdikdən sonra ortaya yeni iddialar, yeni fikirlər çıxır. Xüsusən də cəmiyyətimizin ən həssas mövzusu olan şəhidlərin adlarının əbədiləşdirilməsi ilə bağlı problemlərin onun dövründən "miras" qaldığı iddiası da mövcuddur.
Sosial şəbəkələrdə, daha dəqiq desək, aktiv Feysbuk istifadəçisi Babək Cəfərov statusunda yazıb ki, "Naxçıvanda 44 günlük müharibədən sonra indiyədək heç bir şəhidin adı əbədiləşdirilməyib". Bu statusda əks olunan məsələnin gerçək olub olmadığını araşdırmaq qərarına gəldik. Bizə təəccüblü gələn o oldu ki, ölkəmizin hər yerində şəhidlərin adlarının əbədiləşdirilməsi istiqamətində işlər getdiyi bir vaxtda Naxçıvanda hansı səbəbdən bu proses getmir?
Elyar İslamoğlu: "44 günlük Vətən müharibəsindən sonra Naxçıvanda hələ də heç bir şəhidin adının əbədiləşdirilməməsi xəbəri təəssüf ki doğrudur"
Məsələ ilə bağlı şəhid mayor Vüsal Vəliyevin qardaşı, filologiya üzrə fəlsəfə doktoru Elyar İslamoğlu ilə əlaqə saxladıq. Bu səbəbdən ki, E. İslamoğlu mütamadi olaraq Naxçıvanla əlaqədə olur və qardaşı da şəhiddir. E.İslamoğlu "Bakı-Xəbər"ə şərhində "44 günlük Vətən müharibəsindən sonra Naxçıvanda hələ də heç bir şəhidin adının əbədiləşdirilməməsi xəbəri təəssüf ki doğrudur. Möhtəşəm qələbəmizdən üç il keçsə də belə vacib bir məsələ ilə bağlı addımlar atılmayıb. Bu da şəhid ailələrinin küsgünlüyünə, incikliyinə səbəb olur. Müharibədən sonra demək olar ki, ayda bir neçə şəhid valideyninin övlad dərdinə dözməyərək vəfat etdiyi xəbərini oxuyuruq. Bəlkə də şəhid adlarının əbədiləşdirilməsi, layiq olduqları orden-medalların zamanında verilməsi valideynlərə də təskinlik olar, onların ömrünü uzada bilərdi. Ölkə başçısı müharibədən sonra bütün şəhidlərin adlarının əbədiləşdirilməsilə bağlı çıxış etmişdi. Amma bir çox rayonlarda şəhidin adının əbədiləşdirilməsi üçün iki orden tələb olunur.
Əvvəllər Naxçıvanda yol kənarına şəhid lövhələrinin vurulmasına, xatirə bulaqlarının tikilməsinə də icazə verilmirdi. Baxmayaraq ki lövhənin də, bulağın da xərcini şəhidin ailəsi qarşılayırdı. İndi lövhə qoyulmasına və xatirə bulağı tikilməsinə qadağa qoyulmur, amma şəhidlərin adlarının əbədiləşdirilməsi problemi hələ də qalmaqda davam edir"-deyə bildirdi.
E. İslamoğlunun sözlərinə görə, hazırda Naxçıvandakı bütün şəhid valideynləri və şəhidlərin ailə üzvləri övladlarının adının əbədiləşdirilməsini, məktəbə, küçəyə verilməsini gözləyir. "Ümid edirəm ki, bu problem ciddi narazılıqlara səbəb olmadan qısa zamanda həllini tapar.
Əslində “Şəhid adının əbədiləşdirilməsi və şəhid ailələrinə edilən güzəştlər haqqında Azərbaycan Respublikasının Qanunu”nda ciddi dəyişikliklər edilməlidir. Buna zərurət və ciddi ehtiyac yaranıb. Amma görünür aidiyyatı qurumların başı daha vacib məsələlərə qarışdığından bununla bağlı hələki heç bir addım atılmır.
“Şəhid adının əbədiləşdirilməsi və şəhid ailələrinə edilən güzəştlər haqqında Azərbaycan Respublikasının Qanunu” çox ciddi məsələdir. Bununla bağlı xüsusi yazı lazım olacaq. Bu qanun illər əvvəl qəbul edilib. İndiki tələblərə cavab vermir. İnşallah bir dəfə də bununla bağlı sizə danışaram" - deyə E.İslamoğlu bildirdi.
Şəhid adlarının əbədiləşdirilməməsi olduqca ciddi və ağrılı məsələdir. Bunun səbəblərini araşdırmaq üçün Milli Məclisin deputatı, Naxçıvan Muxtar Respublikasının Gənclər Fondunun icraçı direktoru Cəbi Quliyevlə əlaqə saxladıq.
Cəbi Quliyev: "Şəhidlərə bağlı Muxtar Respublikada bütün lazımı işlər aparılır"
Millət vəkili "Bakı-Xəbər"ə bildirdi ki, yayılan iddianın əsası yoxdur, Naxçıvan Muxtar Respublikasında şəhidlərin xatirəsinin ədəbiləşdirilməsi istiqamətində işlər aparılır. "Adları əbədiləşdirilənlər də, abidələri qoyulanlar da, adlarına bulaqlar düzəldilənlər də var. Mən özüm hazırda şəhid ailəsini ziyarətdən gəlirəm. Eşitdik şəhidlərdən birinin atası narahatdır, xərcəng xəstəsidir, 20 nəfər gənclə şəhid atasını ziyarət etdik.
Şəhidlərə bağlı Muxtar Respublikada bütün lazımı işlər aparılır".
C.Quliyev qeyd etdi ki, həm Birinci Qarabağ müharibəsində, həm Aprel döyüşlərində, həm də Vətən müharibəsində şəhid olan şəxslərin xatirəsinin əbədiləşdirilməsi istiqamətində işlər davam etdirilir. "Bu bütün şəhidlərə aid edilir. Bu istiqamətdə işlər aparılır.
Şəhidlərin adlarının əbədiləşdirilməsi İstiqamətində proses gedir. Özünüz də bilirsiz ki, ölkə başçısı da bu məsələ ilə bağlı xüsusi tapşırıqlar verib. Mən Yeni Azərbaycan Partiyasının Gənclər Birliyinin idarə heyətinin üzvüyəm, orada şəhid ailələri ilə bağlı komissiya yaradılıb.Həmin komissiyaya mən baxıram. Ölkədə də, Muxtar Respublikada da bütün şəhid ailələri mütamadi ziyarət olunur, şəhidlərin adlarının əbədiləşdirilməsi ilə bağlı iş də gedir. İstər Birinci, istərsə də İkinci Qarabağ şəhidlərinin adlarına bulaq kompleksləri tikilir, parklar salınır.
Dəstə kəndində "Dəstə" Xeyriyyə Cəmiyyətinin və bizim dəstəyinizlə bir park salınıb, parkın ucu - bucağı yoxdur, yaşllıq, gözəllik göz oxşayır. Yəni bu işlər Muxtar respublikada getməsə mən bunları nece sadalaya bilərəm? Bilin ki, ən yüksək səviyyədə iş gedir, heç bir süni maneə, bürokratik problem yoxdur. Şəhidlərin adlarının əbədiləşdirilməsi ilə bağlı ən yüksək səviyyədə iş gedir.
Şəhidlərinin adlarının əbədiləşdirilməsi qanunvericiliklə tənzimlənir. Məsələn, bir kənddən üç şəhidimiz var, üçünün də valideyni "məktəb mənim oğlumun adına olmalıdır" deyir. Biz onu necə tənzimləməliyik? Qanunvericiliyin tələbləri var, ona uyğun da iş aparılır. Bu məsələ sizə çatdırılan kimi deyil. Sosial şəbəkələrdə yazırlar, elə bir məsələni gündəmə gətirirlər ki, onun da geniş mənada heç bir əsası da olmur. Mən öz adıma, parlamentdə təmsil etdiyim yer adına, Gənclər Fondunun rəhbəri kimi deyirəm ki, yüksək səviyyədə işlər gedir, bundan sonra da gedəcək. Şəhidlərin adlarının əbədiləşdirilməsi, küçələrə, məktəblərə verilməsi indən sonra da ən yüksək səviyyədə həyata keçiriləcək" - deyə millət vəkili qeyd etdi.
İradə SARIYEVA
